24-Jun-2021

ଭୁବନେଶ୍ବର(ସୁଶାନ୍ତ କୁମାର ଖଟୁଆ) : ବରିଷ୍ଠ ପୋଲିସ ପ୍ରଶାସନିକ ସ୍ତରରେ ଅଦଳବଦଳ କରିଛନ୍ତି ରାଜ୍ୟ ସରକାର । ଗୃହ ବିଭାଗର ଓଏସଡି ହେଲେ ଡ଼. ସୁଧାଂଶୁ ଷଡ଼ଙ୍ଗୀ । ସେହିପରି ନୂଆ ପରିବହନ କମିଶନ ହୋଇଛନ୍ତି ଅରୁଣ ବୋର୍ଥରା । ଏ ନେଇ ଗୁରୁବାର ଗୃହ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି ।  

   ଡ଼. ସୁଧାଂଶୁ ଷଡ଼ଙ୍ଗୀଙ୍କୁ ଗୃହ ବିଭାଗର ଓଏସଡି ଭାବରେ ନିଯୁକ୍ତି ଦେଇଛନ୍ତି ରାଜ୍ୟ ସରକାର । ପୂର୍ବରୁ ପୋଲିସ ଗୃହ ନିର୍ମାଣର ସିଏମଡି ଦାୟିତ୍ବରେ ଥିଲେ ୧୯୯୦ ବ୍ୟାଚର ସୁଧାଂଶୁ । ନୂଆ ଗୁଇନ୍ଦା ନିର୍ଦେଶକ ହୋଇଛନ୍ତି ୧୯୯୨ ବ୍ୟାଚର ଅଫିସର ଲଳିତ ଦାସ ।  ସେ ପୋଲିସ ମୁଖ୍ୟାଳୟର ଅତିରିକ୍ତ ଡିଜି ଦାୟିତ୍ବ ଥିଲେ । 
ପରିବହନ କମିଶନ ଥିବା ସଂଜୀବ ପଣ୍ଡାଙ୍କୁ କ୍ରାଇମବ୍ରାଞ୍ଚର ଅତିରିକ୍ତ ଡିଜି ଭାବେ ବଦଳି କରାଯାଇଛି । ଏହା ସହ 1994 ବ୍ୟାଚର ସଂଜୀବଙ୍କୁ ପୋଲିସ ଗୃହ ନିର୍ମାଣର ଅତିରିକ୍ତ ଦାୟିତ୍ବ ଦିଆଯାଇଛି ।
ସେହିପରି ଭିଜିଲାନ୍ସ ନିର୍ଦ୍ଦେଶକ ହେଲେ ୧୯୯୪ ବ୍ୟାଚର  ଯଶୱନ୍ତ ଜେଠୱା । ପୂର୍ବରୁ ସେ ପୋଲିସ ଆଇନ ଏବଂ ଶୃଙ୍ଖଳାର ଅତିରିକ୍ତ ଡିଜି ଥିଲେ । ଗୁଇନ୍ଦା ନିର୍ଦ୍ଦେଶକ ଥିବା ୧୯୯୫ ବ୍ୟାଚର ଆର. କେ ଶର୍ମାଙ୍କୁ ପୋଲିସ ଆଇନ ଏବଂ ଶୃଙ୍ଖଳାର ଅତିରିକ୍ତ ଡିଜି ଭାବେ ନୂଆ ନିଯୁକ୍ତି ଦିଆଯାଇଛି ।
ନୂଆ ପରିବହନ କମିଶନ ହୋଇଛନ୍ତି ଅରୁଣ ବୋର୍ଥରା । ୧୯୯୬ ବ୍ୟାଚର ଅରୁଣ ଓଏସଆରଟିସିର ସିଏମଡି ଏବଂ କ୍ରୁଟର ସିଇଓ ଥିଲେ । ଅରୁଣ ପରିବହନ କମିଶନର ଭାବେ ବଦଳି ହେବା ପରେ ଓଏସଆରଟିସିର ସିଏମଡି ଏବଂ କ୍ରୁଟର ସିଇଓ ପଦ ଫାଙ୍କା ହେଇଛି ।  
ହେଲେ କିଛି ଦିନ ପରେ ଏନେଇ ନୂଆ ନିଯୁକ୍ତି ହେବ ବୋଲି ସୂଚନା ମିଳିଛି । ସେହିପରି ଆଇଜି ଭିଜିଲାନ୍ସ ଭାବେ ବଦଳି ହୋଇଛନ୍ତି ୧୯୯୭ ବ୍ୟାଚର ଅସିତ କୁମାର ପାଣିଗ୍ରାହୀ । ସେ ଆଇଜି ହୋମଗାର୍ଡ ଏବଂ ଅଗ୍ନିଶମ ଦାୟିତ୍ବରେ ଥିଲେ । ଅସିତଙ୍କ ବଦଳି ପରେ ଏଠାରେ ନୂଆ ନିଯୁକ୍ତି ହୋଇନି ।