07-Aug-2026

ବଲାଙ୍ଗିର: ବଲାଙ୍ଗିର ବିଧାୟକ କଳିକେଶ ନାରାୟଣ ସିଂହଦେଓ ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ ତଥା ଜଳସମ୍ପଦ ବିଭାଗର ଦାୟିତ୍ୱରେ ଥିବା ମନ୍ତ୍ରୀଙ୍କୁ ପତ୍ର ଲେଖି ସମ୍ପ୍ରତି ବର୍ଷାରେ ନବନିର୍ମିତ ଛତାମଖନା ବନ୍ଧରେ ଘଟିଥିବା ଗୁରୁତର କ୍ଷୟକ୍ଷତିର ଏକ ଜରୁରୀ, ନିରପେକ୍ଷ ଏବଂ ବୈଷୟିକ ତଦନ୍ତ କରାଯିବାକୁ ଦାବି କରିଛନ୍ତି। ବନ୍ଧର କଟ୍-ଅଫ୍ ୱାଲ୍ ଭାସିଯିବା ଏବଂ ଡାଉନଷ୍ଟ୍ରିମ୍ ଏମ୍ବାଙ୍କମେଣ୍ଟର କ୍ଷତି ଯୋଗୁଁ ପ୍ରକଳ୍ପର ସୁରକ୍ଷା ଓ ଗଠନାତ୍ମକ ଦୃଢ଼ତାକୁ ନେଇ ଗଭୀର ପ୍ରଶ୍ନ ସୃଷ୍ଟି ହୋଇଛି।

ଶ୍ରୀ ସିଂହଦେଓ ତାଙ୍କ ପତ୍ରରେ ଉଲ୍ଲେଖ କରିଛନ୍ତି ଯେ, ପ୍ରକଳ୍ପଟି ଇଞ୍ଜିନିୟରିଂ, ପ୍ରୋକ୍ୟୁରମେଣ୍ଟ ଆଣ୍ଡ କନ୍ସ୍ଟ୍ରକ୍ସନ୍ (EPC) ପଦ୍ଧତିରେ ନିର୍ମାଣ କରାଯାଇଥିଲେ ମଧ୍ୟ, ଅନୁମୋଦିତ ଡିଜାଇନ୍‌ରେ ମୂଳ ଟେଣ୍ଡର ଡିଜାଇନ୍‌ଠାରୁ ବ୍ୟାପକ ପରିବର୍ତ୍ତନ କରାଯାଇଥିଲା। ତାଙ୍କ କହିବା ଅନୁସାରେ, ବନ୍ଧର ମୋଟ ୱାଟରୱେ ୨୫୬ ମିଟରରୁ ୨୦୬ ମିଟରକୁ କମାଯାଇଥିବା ବେଳେ, ଗେଟ୍ ସଂଖ୍ୟା ୧୮ରୁ ୧୪କୁ ଏବଂ ଇମ୍ପର୍ଭିଅସ୍ ଫ୍ଲୋରର ଲମ୍ବ ୮୦ ମିଟରରୁ ୫୦ ମିଟରକୁ ହ୍ରାସ କରାଯାଇଥିଲା। କିନ୍ତୁ ଡିଜାଇନ୍ ଡିସ୍ଚାର୍ଜ ୨,୭୬୦ କ୍ୟୁମେକ୍ ଅପରିବର୍ତ୍ତିତ ରଖାଯାଇଥିଲା। ଏପରି ପରିବର୍ତ୍ତିତ ଡିଜାଇନ୍ ପ୍ରଚଳିତ ଇଞ୍ଜିନିୟରିଂ ମାନଦଣ୍ଡ ସହ ସଙ୍ଗତିପୂର୍ଣ୍ଣ ଥିଲା କି ନାହିଁ ଏବଂ ନିର୍ଦ୍ଧାରିତ ବନ୍ୟା ପ୍ରବାହକୁ ସୁରକ୍ଷିତ ଭାବେ ବହନ କରିବାର କ୍ଷମତା ରଖୁଥିଲା କି ନାହିଁ, ତାହାର ତଦନ୍ତ କରାଯିବାକୁ ସେ ଦାବି କରିଛନ୍ତି।

ଏହାସହ ଶ୍ରୀ ସିଂହଦେଓ ଦାବି କରିଛନ୍ତି ଯେ, ବନ୍ଧର ଡିଜାଇନ୍ ଫ୍ଲଡ୍ ନିର୍ଦ୍ଧାରଣ ବେଳେ ଉପରମୁଣ୍ଡରେ ଥିବା ଲୋୟର ସୁକତେଲ ବନ୍ଧର ପ୍ରଭାବକୁ ବିଚାର କରାଯାଇଥିଲା କି ନାହିଁ, ତାହା ମଧ୍ୟ ତଦନ୍ତର ପରିସରଭୁକ୍ତ କରାଯାଉ। ଯେଉଁଠାରେ ତ୍ରୁଟି କିମ୍ବା ଅବହେଳା ପ୍ରମାଣିତ ହେବ, ସେଠାରେ ସମ୍ପୃକ୍ତ ବ୍ୟକ୍ତି କିମ୍ବା ସଂସ୍ଥାର ଦାୟିତ୍ୱ ନିର୍ଦ୍ଧାରଣ କରାଯାଉ।

ସେ ଆହୁରି ଅନୁରୋଧ କରିଛନ୍ତି ଯେ, ଏହି ତଦନ୍ତରେ ରାଜ୍ୟ ଡ୍ୟାମ୍ ସେଫ୍ଟି ଅର୍ଗାନାଇଜେସନ୍ ଏବଂ ସ୍ୱାଧୀନ ବିଶେଷଜ୍ଞମାନଙ୍କୁ ସାମିଲ କରାଯାଉ। ବନ୍ଧ ତଳମୁଣ୍ଡରେ ବସବାସ କରୁଥିବା ଲୋକଙ୍କ ସୁରକ୍ଷା ପାଇଁ ତୁରନ୍ତ ଆବଶ୍ୟକ ପଦକ୍ଷେପ ଗ୍ରହଣ କରାଯିବା ସହିତ ତଦନ୍ତ ରିପୋର୍ଟକୁ ସାର୍ବଜନୀନ କରାଯାଉ। ଯଦି ତଦନ୍ତରେ ଡିଜାଇନ୍, ନିର୍ମାଣ କିମ୍ବା କାର୍ଯ୍ୟର ଗୁଣବତ୍ତାରେ ତ୍ରୁଟି ପ୍ରମାଣିତ ହୁଏ, ତେବେ EPC ଚୁକ୍ତିର ସର୍ତ୍ତାନୁସାରେ ସମସ୍ତ ମରାମତି ଓ ସଂଶୋଧନ କାର୍ଯ୍ୟ ସମ୍ପୂର୍ଣ୍ଣ ଭାବେ ଠିକାଦାରଙ୍କ ଖର୍ଚ୍ଚରେ ତୁରନ୍ତ କରାଯିବାକୁ ସେ ଦାବି କରିଛନ୍ତି।

ଏହି ପ୍ରସଙ୍ଗରେ ଶ୍ରୀ କଳିକେଶ ନାରାୟଣ ସିଂହଦେଓ କହିଛନ୍ତି—

"ଏହା କେବଳ ଗୋଟିଏ ପ୍ରକଳ୍ପର ପ୍ରସଙ୍ଗ ନୁହେଁ, ବରଂ ଜନସୁରକ୍ଷା ଏବଂ ଜବାବଦେହିତାର ପ୍ରଶ୍ନ। ଏକ ନବନିର୍ମିତ ବନ୍ଧରେ ଯଦି ଏପରି ଗୁରୁତର କ୍ଷୟକ୍ଷତି ଘଟିଛି, ତେବେ ଏହା ତଳମୁଣ୍ଡରେ ବସବାସ କରୁଥିବା ଲୋକଙ୍କ ପାଇଁ କୌଣସି ବିପଦ ସୃଷ୍ଟି କରୁଛି କି ନାହିଁ, ତାହା ତୁରନ୍ତ ଜାଣିବା ଆବଶ୍ୟକ। ସମ୍ପୂର୍ଣ୍ଣ ସ୍ୱଚ୍ଛ, ନିରପେକ୍ଷ ଏବଂ ନିର୍ଦ୍ଧାରିତ ସମୟସୀମା ମଧ୍ୟରେ ବୈଷୟିକ ତଦନ୍ତ କରାଯିବା ସହ ଯଦି କୌଣସି ତ୍ରୁଟି ଚିହ୍ନଟ ହୁଏ, ତେବେ ଜନସାଧାରଣଙ୍କ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦେଇ ଠିକାଦାରଙ୍କ ଖର୍ଚ୍ଚରେ ତୁରନ୍ତ ମରାମତି କାର୍ଯ୍ୟ କରାଯିବା ଉଚିତ୍।"