15-May-2026

ବଲାଙ୍ଗୀର(ପ୍ରେରଣା ଖବର): ନିଟ୍ ପ୍ରଶ୍ନପତ୍ର ଲିକ ଘଟଣାରେ ପଦବୀ ଓ କ୍ଷମତା ନିର୍ବିଶେଷରେ  ସମ୍ପୂକ୍ତ ସମସ୍ତ ଦୋଷୀଙ୍କୁ କଠୋର ଦଣ୍ଡ ଦେବା,ବିଚାର ବିଭାଗୀୟ ତଦାରଖରେ ଏକ ସ୍ୱଚ୍ଛ ଓ ସମୟ ବଦ୍ଧ ତଦନ୍ତ କରିବା ,ତଦନ୍ତର ଫଳାଫଳକୁ ସମ୍ପୂର୍ଣ୍ଣ ଭାବରେ ସର୍ବସାଧାରଣରେ ପ୍ରକାଶ କରିବା, ସମସ୍ତ ଜାତୀୟ ସ୍ତରୀୟ ପରୀକ୍ଷାରେ ଉତ୍ତରଦାୟୀତ୍ୱ ଓ ସ୍ୱଚ୍ଛତା ସୁନିଶ୍ଚିତ କରିବା ପାଇଁ ତୁରନ୍ତ ପଦକ୍ଷେପ ନେବା ତଥା ନେଟ ୟୁଜି ଏବଂ ଅନ୍ୟାନ୍ୟ କେନ୍ଦ୍ରୀୟ ପରୀକ୍ଷା ପରିଚାଳନା କରୁଥିବା ଏନଟିଏ(NTA) କୁ ସମ୍ପୂର୍ଣ୍ଣ ବାତିଲ କରିବା ଏବଂ ସମସ୍ତ ପରୀକ୍ଷା ସରକାର ନିଜେ ସ୍ୱଚ୍ଛତା ଏବଂ ଉତ୍ତରଦାୟୀତ୍ୱର ସହ ପରିଚାଳନା କରିବା ଦାବିରେ ଆଜି ବିପ୍ଲବୀ ଛାତ୍ର ସଂଗଠନ  ଏଆଇଡ଼ିଏସଓ ବଲାଙ୍ଗୀର ଜିଲ୍ଲା କମିଟି ପକ୍ଷରୁ  ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି।ସଂଗଠନ ପକ୍ଷରୁ  କେନ୍ଦ୍ର ସରକାରଙ୍କ ଅପରାଧୀସୁଲଭ ମାନସିକତାକୁ ନିନ୍ଦା କରିବା ସହ କେନ୍ଦ୍ର ଶିକ୍ଷା ମନ୍ତ୍ରୀ ତୁରନ୍ତ ଇସ୍ତଫା ଦିଅନ୍ତୁ ବୋଲି ବକ୍ତା ମାନେ କହିଥିଲେ।ତା ସହ 
କୁହାଯାଇଛି ଯେ ଏକ ଗଭୀର ତ୍ରୁଟିପୂର୍ଣ୍ଣ ଏବଂ ସମ୍ପୂର୍ଣ୍ଣ କେନ୍ଦ୍ରିକୃତ ପରୀକ୍ଷା ବ୍ୟବସ୍ଥାର ଏହି ବାରମ୍ବାର ବିଫଳତା କ୍ରମାଗତ ଭାବେ କୋଚିଂ ଶିଳ୍ପର ସ୍ୱାର୍ଥ ସାଧନ କରୁଛି ଯାହା ଛାତ୍ରଛାତ୍ରୀ ଏବଂ ସେମାନଙ୍କ ପରିବାର ଉପରେ ବ୍ୟାପକ ମାନସିକ, ଆର୍ଥିକ ଏବଂ ଶୈକ୍ଷିକ ଚାପ ସୃଷ୍ଟି କରୁଛି।ଏହି ଚରମ ଦୁର୍ନୀତି ହେଉଛି ମେଡ଼ିକାଲ ଶିକ୍ଷାର ଘରୋଇକରଣର ପରିଣାମ। ଆଜିର ବିକ୍ଷୋଭରେ ସଂଗଠନର ରାଜ୍ୟ ଉପସଭାପତି ସୁନୀଲ କୁମାର ଭୋଇ,ଜିଲ୍ଲା ସଭାପତି ମଧୁସୂଦନ ବାଗ, ଜିଲ୍ଲା ଉପସଭାପତି ଅହଲ୍ୟା ସାହୁ, ଜିଲ୍ଲା କମିଟି ସଭ୍ୟ ନିମାଇଁ କୁମ୍ଭାର, ଅଞ୍ଜଳି ସୁନା, ପ୍ରଭାସିନୀ ଭୋଇ ସହ ବହୁ ଛାତ୍ରଛାତ୍ରୀ ସାମିଲ ଥିଲେ।