15-May-2026

ବରପାଲି : (ସୁଦାମ ଦୀପ)ଦୀର୍ଘ ଦିନ ଧରି ଫ୍ଲୋରାଇଡ୍ ଯୁକ୍ତ ପାଣି ସମସ୍ୟାରେ ଜର୍ଜରିତ ଥିବା ବରଗଡ଼ ଜିଲ୍ଲା ବିଜେପୁର ନିର୍ବାଚନ ମଣ୍ଡଳୀ ଅନ୍ତର୍ଗତ ଗାଇସିଲେଟ ବ୍ଲକର ସେମେଲଗୁଡ଼ିଆ ଗାଁର ଲୋକମାନେ ଅବଶେଷରେ ଶୁଦ୍ଧ ପାନୀୟ ଜଳ ସୁବିଧା ପାଇଛନ୍ତି। ଗ୍ରାମବାସୀଙ୍କ ଦୀର୍ଘଦିନର ଦାବିକୁ ଗୁରୁତ୍ୱ ଦେଇ ମାନ୍ୟବର ବିଧାୟକ ସନତ କୁମାର ଗଡ଼ତୀୟା ନିଜ ପ୍ରତିଶ୍ରୁତି ପାଳନ କରି ନିଜ ହାତ ପାଣ୍ଠିରୁ ଗାଁରେ ଆରଓ ପାଣି ପ୍ରକଳ୍ପ ସ୍ଥାପନ କରାଇଛନ୍ତି।ସେମେଲଗୁଡ଼ିଆ ଗାଁରେ ଦୀର୍ଘ ବର୍ଷ ଧରି ଭୂଗର୍ଭ ଜଳରେ ଫ୍ଲୋରାଇଡ୍ ପରିମାଣ ଅଧିକ ଥିବାରୁ ଲୋକମାନେ ବିଭିନ୍ନ ହାଡ଼ ଓ ଦାନ୍ତ ସମସ୍ୟା ସହ ସ୍ୱାସ୍ଥ୍ୟ ଜନିତ ଅସୁବିଧାର ସମ୍ମୁଖୀନ ହେଉଥିଲେ।ଗ୍ରାମବାସୀ ବାରମ୍ବାର ଶୁଦ୍ଧ ପିଇବା ପାଣିର ବ୍ୟବସ୍ଥା ପାଇଁ ଦାବି କରୁଥିବାବେଳେ ବିଧାୟକ ଶ୍ରୀ ଗଡ଼ତୀୟା ଏହାର ସ୍ଥାୟୀ ସମାଧାନ ପାଇଁ ପଦକ୍ଷେପ ନେଇଥିଲେ। ତାଙ୍କର ପ୍ରୟାସ ଓ ନିଜସ୍ୱ ଅର୍ଥ ସହଯୋଗରେ ଗାଁରେ ଘଣ୍ଟାକୁ ଦୁଇ ହଜାର ଲିଟର କ୍ଷମତା ବିଶିଷ୍ଟ ଆରଓ ପ୍ଲାଣ୍ଟ ସ୍ଥାପନ ହୋଇଛି।ଏହି ପ୍ରକଳ୍ପ ଆରମ୍ଭ ହେବା ପରେ ସେମେଲଗୁଡ଼ିଆ ସହ ଆସପାସ ଅଞ୍ଚଳର ଲୋକମାନେ ମଧ୍ୟ ଉପକୃତ ହେବେ । ବର୍ତ୍ତମାନ ଗ୍ରାମବାସୀ ସହଜରେ ବିଶୁଦ୍ଧ ପିଇବା ପାଣି ପାଇପାରୁଥିବାରୁ ଲୋକଙ୍କ ମଧ୍ୟରେ ଖୁସିର ଲହରୀ ଦେଖାଦେଇଛି। ଗାଁର ବୟସ୍କ ଓ ମହିଳାମାନେ ବିଶେଷ କରି ଏହି ପ୍ରକଳ୍ପକୁ ସ୍ୱାଗତ କରିଥିବାବେଳେ, ଏହା ଗାଁର ସ୍ୱାସ୍ଥ୍ୟ ସୁରକ୍ଷା ଦିଗରେ ଏକ ବଡ଼ ପଦକ୍ଷେପ ବୋଲି କହିଛନ୍ତି।ବିଧାୟକ ଶ୍ରୀ ଗଡ଼ତୀୟା କହିଥିଲେ ଯେ ଲୋକଙ୍କ ମୌଳିକ ସମସ୍ୟାର ସମାଧାନ କରିବା ହେଉଛି ତାଙ୍କର ପ୍ରଥମ କର୍ତ୍ତବ୍ୟ। ପାନୀୟ ଜଳ, ଶିକ୍ଷା, ରାସ୍ତା ଓ ସ୍ୱାସ୍ଥ୍ୟ ସେବା ଭଳି ମୌଳିକ ସୁବିଧା ପ୍ରତ୍ୟେକ ଗାଁକୁ ପହଞ୍ଚାଇବା ପାଇଁ ସେ ସଦା ପ୍ରୟାସ ଜାରି ରଖିବେ ବୋଲି ମତ ପ୍ରକାଶ କରିଥିଲେ।
ଉଦଘାଟନ କାର୍ଯ୍ୟକ୍ରମରେ ସ୍ଥାନୀୟ ଜନପ୍ରତିନିଧି, ସମାଜସେବୀ, ଯୁବକ ଓ ବହୁ ସଂଖ୍ୟକ ଗ୍ରାମବାସୀ ଉପସ୍ଥିତ ଥିଲେ।