15-May-2026

ବଲାଙ୍ଗିର-  ସ୍ଥାନୀୟ କୋଳ୍‌ଡ ଷ୍ଟୋରେଜ ନିକଟସ୍ଥ ନାଗରିକ କମିଟୀ ସଭାଗୃହରେ ବଲାଙ୍ଗିର ନାଗରିକ କମିଟୀର ବର୍ଦ୍ଧିତ କାର୍ଯ୍ୟକାରୀ ବୈଠକ ହୋଇଥିଲା । ଏହି ସଭାରେ ସଭାପତି ଡ. ଶ୍ରୀକର ମିଶ୍ର ଅଧ୍ୟକ୍ଷତା କରିଥିଲେ । ବଲାଙ୍ଗିର ରେ ରେଲୱେ ପିଟ୍ ଲାଇନ କରିବା ପାଇଁ ସର୍ବସମ୍ମତି କ୍ରମେ ପ୍ରସ୍ତାବ ଗୃହିତ ହୋଇଥିଲା ଏବଂ ଏହି ଦାବୀ ବହୁ ଦିନର ହୋଇଥିଲେ ମଧ୍ୟ ଆଜି ପର୍ଯ୍ୟନ୍ତ ହୋଇପାରି ନାହିଁ । ତେଣୁ ପୁଣି ଥରେ ରେଲୱେ କତ୍ତୃପକ୍ଷଙ୍କୁ ଜଣାଇବା ପାଇଁ ସଂପାଦକଙ୍କୁ କ୍ଷମତା ଅର୍ପଣ କରାଯାଇଥିବା ଜଣାଯାଇଛି । ପୁନଶ୍ଚ ଗ୍ରୀଷ୍ମ୍ମ କାଳିନ ବିଶାଖାପାଟନମ୍‌-ଦିଲ୍ଲୀ ଏକ୍ସପ୍ରେସ (ଟ୍ରେନ ନ, ୦୮୫୧୭) ଭାୟା ପ୍ରୟାଗରାଜଟ୍ରେନ ଚଳାଚଳକୁ ସ୍ୱାଗତ କରିଥିବା ବେଳେ ଟିଟିଲାଗଡ ଓ ବରଗଡ ରେ ରହଣି ଥିବାର ଘୋଷଣା କରାଯାଇଛି । କିନ୍ତୁ ମଝିରେ ବଲାଙ୍ଗିର ଜିଲ୍ଲା ସଦର ମହକୁମା ରେ ରହଣି ପାଇଁ ବ୍ୟବସ୍ଥା ହୋଇ ନାହିଁ ।  ତେଣୁ ବଲାଙ୍ଗିର ରେ ଏହି ଟ୍ରେନ ରହଣି ପାଇଁ ଦାବୀ କରାଯାଇଛି । ଅନ୍ୟାନ୍ୟ ଆଲୋଚନା ମଧ୍ୟରେ ବଲାଙ୍ଗିର ପୌରାଂଚଳରେ ବିଭିନ୍ନ ପୋଖରୀ ମାନଙ୍କ ପଙ୍କୋଧାର ପାଇଁ ପାଣି ନିଷ୍କାସନ କରାଯାଇଛି । କେତେ ଜାଗାରେ କାମ ଆରମ୍ଭ ହୋଇଥିବା ବେଳେ ଅନ୍ୟ କେତେ ପୋଖରୀରେ ପାଣି ସୁଖି ନାହିଁ । ଏହି କାର୍ଯ୍ୟକୁ କାଳ ବିଳମ୍ବ ନ କରି ବର୍ଷା ପୂର୍ବରୁ ଶେଷ କରିବା ପାଇଁ ପଦକ୍ଷେପ ନେବା ପାଇଁ ଅନୁରୋଧ କରାଯାଇଛି । ପୁନଶ୍ଚ ନାଳ ନର୍ଦମା ସଫାକଲେ ମଧ୍ୟ ମଇଲା ରହି ଯାଉଥିବା କେତେକ ସଭ୍ୟଙ୍କ ନଜରକୁ ଆସିଛି । ତାକୁ ଧ୍ୟାନ ଦେଇ ନର୍ଦମା ପାଣି ଯେମିତି କୌଣସି ପୋଖରୀକୁ ନ ପସିବ, ସେଥିପ୍ରତି ଦୃଷ୍ଟି ଦେବାକୁ ପୌରାଧ୍ୟକ୍ଷାଙ୍କୁ ଅନୁରୋଧ କରାଯାଇଛି । ସୋସିଏଲ ମିଡିଆ ଜରିଆରେ ଲୋକଙ୍କ ସୁବିଧା ଅସୁବିଧା ବୁଝି ତାର ପ୍ରତିକାର କରିବା ପାଇଁ ନାଗରିକ କମିଟୀର ସୋସିଏଲ ମିଡିଆ ସେଲ ଗଠନ କରି ସଭ୍ୟ ଅଂକୁଶ ପାଣ୍ଡିଆଙ୍କୁ ଦାୟିତ୍ୱ ଦିଆଯାଇଛି । ଶ୍ରୀ ପାଣ୍ଡିଆ ଏହି ସେଲ୍ ଜରିଆରେ ନାଗରିକ କମିଟୀର କାର୍ଯ୍ୟକ୍ରମକୁ ଲୋକଲୋଚନକୁ ଆଣିବା ସଙ୍ଗେସଙ୍ଗେ ବିଭିନ୍ନ ମିଟିଂ, କନଫରେନ୍ସ  ତଥା କର୍ମଶାଳାର ଅୟୋଜନ କରିବା ପାଇଁ ଅନୁରୋଧ କରାଯାଇଛି । ଜିଲ୍ଲାର ସର୍ବବିଧ ଉନ୍ନତି ପାଇଁ ଏଣୁ ଏଣିକି ନାଗରିକ କମିଟୀର ବିଭିନ୍ନ ସଭାରେ ଯୋଗଦାନ କରିବା ପାଇଁ ଜନପ୍ରତିିନିଧି ମାନଙ୍କୁ ଡକାଯିବା ପାଇଁ ନିଷ୍ପତ୍ତି ହୋଇଛି । ସଭାରେ ସଂପାଦକ ମଧୁସୁଦନ ନାୟକ, ଗୋପବନ୍ଧୁ ପୁରୋହିତ, ତରୁଣ କୁମାର ମିଶ୍ର, ପ୍ରଦୀପ ସାହୁ,ସୁମିତ ପୁରୋହିତ, ତ୍ରିନାଥ ସାହୁ, ଡା. ପ୍ରମୋଦ କୁମାର ମିଶ୍ର, ଅଂକୁଶ ପାଣ୍ଡିଆ,    ମୋତିଲାଲ ସାହୁ, ସତ୍ୟବାଦୀ ନାଏକ, ଆଦି ଆଲୋଚନାରେ ଅଂଶ ଗ୍ରହଣ କରିଥିଲେ । ଶେଷରେ ସହ-ସଂପାଦକ ସୁନିଲ ଚନ୍ଦ୍ର ବିଶ୍ୱାଳ ଧନ୍ୟବାଦ ଅର୍ପଣ କରିଥିଲେ ।