17-Nov-2021

ବଲାଙ୍ଗୀର, ହସ ହସ ମୁହଁ, ମନରେ ଗଭୀର ଆତ୍ମବିଶ୍ୱାସ । କିଛି ଭିନ୍ନ କରିବାର ପ୍ରବଳ ଇଚ୍ଛା । ମନରେ କୌଣସି ଦୁଃଖ, ନାହିଁ କି ଭଗବାନଙ୍କ ଉପରେ ଅଭିମାନ ନାହିଁ । ଜନ୍ମରୁ ସେ ପୋଲିଓରେ ଆକ୍ରାନ୍ତ । ଠିକ ଭାବରେ ଚାଲିବା ମଧ୍ୟ କଷ୍ଟକର । ହେଲେ ଭିନ୍ନକ୍ଷମଙ୍କୁ ନୂଆ ବାର୍ତ୍ତା ଦେଉଛନ୍ତି,  କେବେ ସ୍କୁଟିରେ ହଜାର ହଜାର କିଲୋମିଟର ଅତିକ୍ରମ କରି ତ କେବେ ଜିମରେ ସିକ୍ସପ୍ୟାକ ଦେଖାଇ ଅନ୍ୟ ମାନଙ୍କୁ ଚକିତ କରୁଛନ୍ତି । ଆଉ କେବେ ସମାଜସେବାରେ ଦେଖାଇଛନ୍ତି ନିଜର ପାରିବା ପଣିଆ । ଏମତି କିଛି କାମ କରି ଭିନ୍ନକ୍ଷମ ହୋଇ ବି ସକ୍ଷମ ସାଜିଛନ୍ତି ବଲାଙ୍ଗିର ବରପାଲିପଡାର ବବଲୁ ମିଶ୍ର ।

 ୩୨ ବର୍ଷୀୟ ଦିବ୍ୟାଙ୍ଗ ଯୁବକ ବବଲୁ ମିଶ୍ର ବଲାଙ୍ଗିର ବରପାଲି ପଡାରେ ଘର । ପ୍ୟାଲେସ ଲାଇନ ପଡାର ୱମେନ୍ସ କଲେଜ ଛକରେ ଏକ ଗିଫ୍ଟ ଦୋକାନ ଖୋଲିକି ବବଲୁ ଆତ୍ମ ନିର୍ଭରଶୀଳ ହୋଇଛନ୍ତି । ବବଲୁ ମିଶ୍ର ଜନ୍ମରୁ ପୋଲିଓରେ ଆକ୍ରାନ୍ତ । ତଥାପି ମନରେ ଭରି ରହିଛି ଗଭୀର ଆତ୍ମବଳ । ସବୁବେଳେ କିଛି ଭିନ୍ନ କରିବାର ଇଚ୍ଛା ତାଙ୍କୁ ଅସାଧାରଣ କରିଛି । ତେବେ ସେ ଶିରଡି ସାଇ ବାବାଙ୍କ ଜଣେ ବଡ ଭକ୍ତ । ସାଇ ବାବାଙ୍କ ଧାମକୁ ଯିବା ପାଇଁ ବବଲୁ ମିଶ୍ର ସ୍କୁଟିରେ ଶିରଡି ଧାମ ଯିବା ପାଇଁ ସଂକଳ୍ପ କରିଥିଲେ ।
ଗତ ୯ ତାରିଖରେ ନିଜର ସ୍କୁଟି ସାହାଯ୍ୟରେ ସିଙ୍ଗଲ ରାଇଡ କରିକି ବାହାରିଥିଲେ ବବଲୁ । ଦୁଇ ଦିନରେ ଶିରଡି ଧାମ ପହଞ୍ଚି ବାବାଙ୍କ ଦର୍ଶନ କରିବା ସହିତ ଶନି ସିଙ୍ଗଣାପୁର ଯାଇ ଶନିଦେଵ ଙ୍କ ଦର୍ଶନ କଲେ । ଆଉ ତା’ପରେ ପୁଣି ଦୁଇଦିନର ଯାତ୍ରା କରି ବଲାଙ୍ଗିରକୁ ଫେରିଆସିଥିଲେ । ଚାରିଦିନରେ ପାଖାପାଖି ତିନି ହଜାର କିଲୋମୋଟର ସ୍କୁଟିରେ ସିଙ୍ଗଲ ରାଇଡ କରି ପୋଲିଓ ଆକ୍ରାନ୍ତ ବବଲୁ ମିଶ୍ର ଅନ୍ୟ ଦିଵ୍ୟାଙ୍ଗ ମାନଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତିଆଜି ସମାଜରେ,
 କେବଳ ଶିରଡି ଧାମ ସ୍କୁଟି ରାଇଡ କରି ଚର୍ଚ୍ଚାକୁ ଆସି ନାହାନ୍ତି ବବଲୁ ମିଶ୍ର, ତାଙ୍କର ଅନ୍ୟାନ୍ୟ କାମ ମଧ୍ୟ ବେଶ ପ୍ରଶଂସନୀୟ । ବବଲୁ ମିଶ୍ର କଂପ୍ୟୁଟରରେ ଇଂଜିନିୟରିଂ କରିଛନ୍ତି । କିନ୍ତୁ ଚାକିରୀ ପଛରେ କେବେ ଗୋଡାଇ ନାହନ୍ତି କେଵେ ମଧ୍ୟ । ନିଜେ ଏକ ଗିଫ୍ଟ ଦେକାନ ଖୋଲି ଆତ୍ମ ନିର୍ଭରଶୀଳ ହୋଇଛନ୍ତି । ପୋଲିଓ ଆକ୍ରାନ୍ତ ହୋଇ ମଧ୍ୟ ସକ୍ଷମଙ୍କ ଭଳି ଜିମକୁ ଯାଇ ସିକ୍ସ ପ୍ୟାକ ବଡି ବନାଇଛନ୍ତି ।
 କୋଭିଡ ସମୟରେ ପଦାକୁ ବାହାରି ଲୋକଙ୍କୁ ଖାଇବା ଦେଉଥିଲେ ବବଲୁ । ଅସହାୟ ରୋଗୀଙ୍କ ଚିକିତ୍ସା ମଧ୍ୟ କରାଉଥିଲେ । କେବେ କାହାକୁ ରକ୍ତ ଦରକାର ହେଲେ ଖୋଜାପଡନ୍ତି ଦିବ୍ୟାଙ୍ଗ ବବଲୁ । ବବଲୁଙ୍କ ଭକ୍ତି ଏବଂ ଶକ୍ତି ଆଗରେ ହାର ମାନିଛି ଦିବ୍ୟାଙ୍ଗ ଶରୀର । ବବଲୁଙ୍କ ଏହି ମହତ କାମକୁ ଦେଖି ସାଙ୍ଗ ମାନେ କହୁଛନ୍ତି ବବଲୁ ମିଶ୍ର ଦି ବେଷ୍ଟ ।

(ବଲାଙ୍ଗୀର ଜିଲ୍ଲାରୁ ଅନ୍ତର୍ୟାମୀ ସାହୁଙ୍କ ରିପୋର୍ଟ)