01-Aug-2022

ବଲାଙ୍ଗିର : ସଦାନନ୍ଦ ଅଗ୍ରଓ୍ବାଲ ଥିଲେ ଓଡିଶାର ଜଣେ ଜଣାଶୁଣାଐତିହାସିକ, ଗବେଷକ, ଲିପିତତ୍ବବିଦ ,ସାହିତ୍ୟିକ, ସାମ୍ବାଦିକ, ନାଟ୍ୟକାର ଓ ସଙ୍ଗୀତଜ୍ଞ । ତେବେ ତାଙ୍କ ସହିତ ମିଶିବା ଭିତରେ ଜଣେ  କଲେଜ କିମ୍ବା ବିଶ୍ବବିଦ୍ୟାଳୟରେ ପାଠ ପଢିପାରିନଥିବା ଦରପାଠୁଆ ମଣିଷ ଶେଷରେ କିଭଳି  ନିଜ ଅଧ୍ୟବସାୟ ବଳରେ ବିଶ୍ବବିଦ୍ୟାଳୟରେ ଲିପିତତ୍ବ ବିଷୟ ଉପରେ ଶିକ୍ଷାଦାନ କରୁଥିଲେ ତାହା ମୁଁ ନିଜେ ଦେଖିଛି । ସୋନପୁର ଜିଲ୍ଲାର ମେଣ୍ଡା ହାଇସ୍କୁଲରୁ ପ୍ରଥମ ଶ୍ରେଣୀରେ ଉତ୍ତିର୍ଣ୍ଣ ହେଲାପରେ ମଧ୍ୟ ସେ ଆର୍ଥିକ ଅନାଟନ କାରଣରୁ କଲେଜରେ ପଢିବାର ସୁଯୋଗ ପାଇନଥିଲେ । କମ ବୟସରେ ବାପାଙ୍କୁ 

 ହରାଇ ପରିବାର ର ବୋଝ ସମ୍ଭାଳିଥିଲେ । ତେବେ ତାଙ୍କ ପଢିବାର ନିଶା ଯାଇନଥିଲା । ତରଭାରେ ତାଙ୍କର ଜଣେ ସମ୍ପର୍କିୟଙ୍କ ସାଙ୍ଗରେ ବ୍ୟବସାୟ କଲାବେଳେ ସାମ୍ବାଦିକତା ଆଡକୁ ଢଳିଥିଲେ । ପ୍ରଥମେ ବଲାଙ୍ଗୀରରୁ ପ୍ରକାଶିତ ଯୁଗବାର୍ତ୍ତାରୁ ସାମ୍ବାଦିକ ଜୀବନ ଆରମ୍ଭ କରି ପ୍ରଜାତନ୍ତ୍ର ଦୈନିକ ଖବରକାଗଜରେ ତରଭା ପ୍ରତିନିଧି ହୋଇଥିଲେ । ସେହି ସମୟରେ ଡ.ହରେକୃଷ୍ଣ ମହତାବ ଓ ପରେ ଓଡିଶାର ପ୍ରଖ୍ୟାତ ଐତିହାସିକ ଡ.ନବୀନକୁମାର ସାହୁଙ୍କ ସହିତ ଘନିଷ୍ଠତା ବଢିଥିଲା । ସେଇଠୁ ଆରମ୍ଭ ହୁଏ ତାଙ୍କ ଐତିହାସିକ ଜୟଯାତ୍ରା । ଉଭୟଙ୍କ ଠାରୁ ପ୍ରେରଣା ପାଇ ଐତିହାସିକ ଗବେଷଣା ଆରମ୍ଭ କରିଥିଲେ । ସୋନପୁର ଇତିହାସ, ଖାରବେଳ(ଓଡିଆ,ହିନ୍ଦି,ଇଂରାଜୀ), ଓରିଶାନ ପେଲେଓଗ୍ରାଫି, ଦକ୍ଷୀଣକୋସଳ ଓ ଅନ୍ୟାନ୍ୟ ପ୍ରବନ୍ଧ', ସୌରାପେଣ୍ଟିଂ ଅଫ ଓରିଶା, ଟୁ କପର ପ୍ଲେଟ ଗ୍ରାଣ୍ଟସ ଫ୍ରମ ଓ୍ବେଷ୍ଟର୍ଣ୍ଣ ଓରିଶା,କୋସଲି ନାଟକ ରକତ ଇତ୍ୟାଦି ପୁସ୍ତକ ରଚନା କରିଥିଲେ । ଏହା ସହିତ ତାଙ୍କର ଅନେକ ଉପାଦେୟ ସନ୍ଦର୍ଭ ଓ ସ୍ତମ୍ବଗୁଡିକ ମଧ୍ୟ ବିଭିନ୍ନ ଜର୍ଣ୍ଣାଲ ତଥା ଖବରକାଗଜରେ ପ୍ରକାଶିତ ହେଉଥିଲା । ଶେଷରେ ତାଙ୍କ କୃତିକୁ ସମ୍ମାନ ଜଣାଇ ରାଷ୍ଟ୍ରୀୟ ସଂସ୍କୃତପ୍ରତିଷ୍ଠାନ ତିରୁପତି ବିଶ୍ବ ବିଦ୍ୟାଳୟରୁ ତାଙ୍କୁ ସମ୍ମାନଜନକ ଡି.ଲିଟପ୍ରଦାନ କରାଯାଇଥିଲା ।  ସେ ଲିପିତତ୍ବ ଉପରେ ଯଥେଷ୍ଟ ଗବେଷଣା କରି ପୁରାତନ ଲିପି, ଶିଳାଲିପି, ତାମ୍ରଫଳକ ଇତ୍ୟାଦିକୁ ପାଠଦ୍ଧାର କରୁଥିଲେ ।  ଦେଶର ଅନେକ ମ୍ୟୁଜିୟମରୁ ସେଥିପାଇଁ ତାଙ୍କୁ ଡାକରା ଆସୁଥିଲା । ଲିପିର କ୍ରମବିକାଶ ଉପରେ ତାଙ୍କର ଅନେକ ସନ୍ଦର୍ଭ ପ୍ରକାଶିତ ହୋଇଛି । ବ୍ରାହ୍ମି,ପାଲି ଓ ଅନ୍ୟାନ୍ୟ ପୁରାତନ ଭାଷା ଉପରେ ତାଙ୍କର ଖୁବ ଦଖଲ ଥିଲା । ଲିପିତତ୍ବ ଉପରେ ଶିକ୍ଷାଦାନ ପାଇଁ ଜଣେ ଭିଜିଟିଙ୍ଗ ପ୍ରଫେସର ଭାବରେ ବିଶ୍ବଭାରତୀ  ଶାନ୍ତିନିକେତନ ବିଶ୍ବ ବିଦ୍ୟାଳୟ ତରଫରୁ ତାଙ୍କୁ ଅନେକଥର ନିମନ୍ତ୍ରଣ କରାଯାଇଥିଲା । ୨୦୧୩ ମସିହାରେ ତାଙ୍କର ଜଣେ ସହଯୋଗୀ ଭାବରେ ଶାନ୍ତିନିକେତନକୁ ଯିବାର ସୁଯୋଗ

ମିଳିଥିଲା । ସେଠାରେ ଓଡିଆ ବିଭାଗ ତରଫରୁ କରାଯାଇଥିବା ଓ୍ବାର୍କସପରେ ସେ ଜଣେ ଦକ୍ଷ ଲିପିତତ୍ବବିଦ ଭାବରେ ଛାତ୍ରଛାତ୍ରୀଙ୍କୁ ଶିକ୍ଷାଦାନ କରିଥିଲେ । ଜଣେ ମାଟ୍ରିକପଢା ଲୋକ ଭାରତବର୍ଷର ଏକ ବିଖ୍ୟାତ ବିଶ୍ବବିଦ୍ୟାଳୟରେ ଲିପିତତ୍ବ ଉପରେ ଯେଭଳି କଳାପଟାରେ ଚକ ଖଡିରେ ଲେଖିଲେଖି ପଢାଉଥିଲେ ତାହା ମୋତେ ଅଭିଭୂତ କରିଥିଲା । ମୁଖ୍ୟତଃ ଛାତ୍ରଛାତ୍ରୀଙ୍କ ଲିପି ଉପରେ ଜାଣିବାର ଆଗ୍ରହ ମୋତେ ଖୁବ ଆଶ୍ଚର୍ଯ୍ୟ କରିଥିଲା । ଅଧ୍ୟବସାୟ ହିଁ ମଣିଷକୁ ସଫଳ କରିଥାଏ ତାହା ତାଙ୍କଠୁ ଶିଖିବାକୁ ମିଳିଥିଲା ।
   ଆଜି ସେହି ପୂଣ୍ୟାତ୍ମାଙ୍କ ୫ମ ଶ୍ରାଦ୍ଧଦିବସ । ଶ୍ରାଦ୍ଧ ଦିବସରେ ତାଙ୍କୁ ଗଭୀର ଶ୍ରଦ୍ଧାଞଳି ଜ୍ଞାପନ କରୁଛି ।