11-Mar-2022

ବଲାଙ୍ଗୀର  :(ମଳୟ ମିଶ୍ରଙ୍କ ରିପୋର୍ଟ ):ସଂପ୍ରତି ପୌର ନିର୍ବାଚନର ତାତିରେ ମାତିଛନ୍ତି ଲୋକେ । ପଞ୍ଚାୟତନିର୍ବାଚନ ନ ସରୁଣୁ ଏ ନିର୍ବାଚନ ।  ଆଗରୁ ଅହେତୁକ ବିଳମ୍ବ ପରେ କରୋନାକାଳ । ପୁଣି ଅନ୍ୟାନ୍ୟ ପଡୋଶୀରାଜ୍ୟର ବିଧାନସଭା ନିର୍ବାଚନ ପରେ  ଆସିବ ଦି'ବର୍ଷପରେ ଆମ ବିଧାନସଭା ନିର୍ବାଚନ । ତେବେ ଚଳିତଥର ପୌରପାଳିକାର ନଗରପାଳ ପଦକୁ ପ୍ରତ୍ୟେକ୍ଷ କରିଦେବାର  ଦୂରଦୃଷ୍ଟି କାଳେ ଅନାଗତ ବିଧାନ ପରିଷଦ ଆଡକୁ ସଂକେତ ଦେଉଛି ବୋଲି କେତେକେ ଅଧିକାଭାବୁକ ଭବିଷ୍ୟତରାଜନୀତିବିଶାରଦେ କହିଲେଣି । ତେବେ ସେ ଯାହାହେଉ , ଆଜିର ନିର୍ବାଚନ ଯେ ଆଉ ଗଣତନ୍ତ୍ରର ପ୍ରକୃତ ମୂଲ୍ୟବୋଧକୁ ଆଧାର କରି ଲୋକଙ୍କର ସେବା ବା ଆଞ୍ଚଳିକ ବିକାଶ ପ୍ରତି ପ୍ରତିନିଧିତ୍ବ କରେ , ଏହା ଭୁଲ୍ ପ୍ରମାଣିତ ହୋଇ ସାରିଲାଣି । ବରଂ ଆଜିର ନିର୍ବାଚନ ଓ ନିର୍ବାଚିତ ତଥାକଥିତ ଲୋକପ୍ରତିନିଧିମାନେ ଲୋକଙ୍କ ପାଇଁ ଖର୍ଚ୍ଚ କରାଯାଉଥିବା ସରକାରୀ ଅର୍ଥଅନୁଦାନର ବାଟମାରଣା ବା ହଡପରେ ଲିପ୍ତ , ଏକଥା ବୁଝିବାକୁ ବାକିନାହିଁ । ତେଣୁ ଏହା ଏକ ସବୁଠାରୁ ମୁନାଫାଦାୟକ ବେପାରରେ ପରିଣତ ହେଲାଣି । ଏକଥା ଉପକ୍ରମଣିକାରେ ଉଲ୍ଲେଖ କରିବାର ଉଦ୍ଦେଶ୍ୟ ଏହା ଯେ , ଏହି ନିର୍ବାଚନରେ ଜିତିବାପାଇଁ ଜିତିବାର ସମ୍ଭାବନା ରହିଥିବା ଦଳର ଟିକେଟ୍ କିଣି ପ୍ରାର୍ଥୀହେବାକୁ ପ୍ରତିଦ୍ବନ୍ଦିତା । ସଂପ୍ରତି ଦୁଇଟି ଜାତୀୟଦଳ ଓ ଗୋଟିଏ ପ୍ରମୁଖ ଆଞ୍ଚଳିକଦଳର ଚାହିଦା ରହିଛି । ତେଣୁ ମୁଖ୍ୟତଃ ଏହିତିନୋଟି ଦଳର ଟିକେଟ୍ ପାଇଁ ଯୋର୍ ସୋର୍ ଲବି  ଓ ମୂଲଚାଲ ହୋଇଥିଲା ।  ମୁଖ୍ୟତଃ ଏବେ ପୌରପରିଷଦର ନଗରପାଳ ବା ମେୟର ପଦର ପ୍ରାର୍ଥୀ ବା ସଂରକ୍ଷିତ ଆସନରେ ପ୍ରାର୍ଥିନୀଙ୍କର ଦଳୀୟଟିକେଟ୍ ଦେବାକୁ ରାଜ୍ୟସ୍ତରୀୟ ବନାମ ସ୍ଥାନୀୟ ଦଳୀୟନେତାମାନେ ବେଶ୍ ହାତଚିକ୍କଣ କରିଥିବା ଶୁଣାଯାଇଛି । ଏଠି , ସେଠି , ସବୁଠି  ଏଇ ମୂଲଚାଲ ଯୋଗୁଁ ହଠାତ୍ ପ୍ରାର୍ଥୀମାନେ ଆବିର୍ଭୂତ ହୋଇଛନ୍ତି । ଏହା ମଧ୍ୟ ଦଳରେ ଅସନ୍ତୋଷ ସୃଷ୍ଟିର କାରଣ ହୋଇଛି । ପୂର୍ବରୁ ଦଳର ପ୍ରାଥମିକ ସଦସ୍ୟ ନ ହୋଇଥିଲେ ହେଁ ,  ଦଳୀୟ ପୁରଣାମୂଷା ପାଲଟିଥିବା ବଦନାମ ବିକାଉ ସ୍ଥାନୀୟନେତାମାନେ ଆଖିବୁଜା ଟିକେଟ୍ ବାଣ୍ଟିବାର ଦାୟିତ୍ୱରୁ ବେଶ୍ ଫାଇଦା ଉଠାଇଛନ୍ତି । ଏହି ପରିମାଣ ଦଶକୋଡିଏ , ପଚାଶଲକ୍ଷରୁ କୋଟି କୋଟି ହୋଇଥିବା ଚର୍ଚ୍ଚା ହେଉଛି । ଏପରିକି ସୋସିଆଲ୍ ମିଡିଆରେ କଟକର  ଏକ ଏଭଳି ଷ୍ଟିଙ୍ଗ୍ ଭିଡିଓ ଚର୍ଚ୍ଚାକୁ ଖୋରାକ୍ ଯୋଗାଇଛି । ତେବେ କେବଳ କଟକ କାହିଁକି , ଧନୀଲୋକମାନେ ପଶ୍ଚିମଓଡିଶା ବା ଆମ ଅଞ୍ଚଳରେ ବି ବିଭିନ୍ନ ଦଳର ଦ୍ବାର ଦ୍ବାର ବୁଲି ବୁଲି ଶେଷରେ ପଚାଶଲକ୍ଷ ଦେଇ ଟିକେଟ୍ କିଣିଥିବାରେ ସଫଳ ହୋଇଥିବା କୁହାଯାଉଛି । ଏପରିକି ଭୁବନେଶ୍ବର ମହାନଗର ନିଗମର ମହିଳାମେୟର୍ ପ୍ରାର୍ଥିନୀଙ୍କ ମଧ୍ୟରେ କୋଟିପତି ରହିଥିବାରୁ ସେଠି ମଧ୍ୟ ଏକ ଜାତୀୟଦଳର ନେତାମାନଙ୍କୁ ଏହା ସୁହାଇଥିବା ଶୁଣିବାକୁ ମିଳୁଛି ।ଏପଟୁ ଯାଇ ସେପଟେ ହାତମାରି ଠିକିଯାଇଥିବା ଲୋକେ ବି ଏଭଳି ବ୍ୟାପାରରେ ମାହିର୍ ହେଇଯାଇଛନ୍ତି  !