10-Mar-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ):  ପାଟଣାଗଡ ପାର୍ସଲ୍ ବୋମାକାଣ୍ଡକୁ ଚାରିବର୍ଷ ପୁରିଗଲା । ଚାରିବର୍ଷପରେ ଯାଇ ଦାଖଲ ହେଲା ଚାରଜସିଟ୍ । କ୍ରାଇମବ୍ରାଞ୍ଚର କାଢୁଆ ସାହେବ ପ୍ରସ୍ତୁତ କରିଛନ୍ତି କୁଆଡେ ପ୍ରାୟ ୭ ହଜାର ଅଭିଯୋଗଫର୍ଦ୍ଦର ବିଡା  !  ଯାହାକୁ ପଢିବାକୁ ଡିଫେନ୍ସ ଓକିଲଙ୍କର ବି ଅକଲ ଗୁଡୁମ୍  !

ହଁ , ଆମେ କହୁଛୁ , ଗତ ୨୦୧୮ ଫେବୃଆରୀ ୨୩ ତାରିଖରେ ପାଟଣାଗଡ ବ୍ଲକ୍ ଛକର ଅଧ୍ୟାପିକ ରବୀନ୍ଦ୍ର ସାହୁଙ୍କ ଘରେ ତାଙ୍କ ପୁଅବାହାଘର ପରେ ପରେ ଘଟିଥିବା ସାରା ରାଜ୍ୟରେ ଚାଞ୍ଚଲ୍ଯ ଖେଳାଇ ଦେଇଥିବା ପାର୍ସଲ୍ ବୋମା ବିସ୍ଫୋରଣର ଅମାନବୀୟ ଅପରାଧର ଘଟଣା । ଯୋଉଥିରେ ତାଙ୍କର ନବବିବାହିତ ପୁତ୍ର ସୌମ୍ଯ ଶେଖର ଓ ତାଙ୍କ ଜେଜେମାଆ ଜେମାମଣିଙ୍କର ମର୍ମନ୍ତୁଦ ମୃତ୍ୟୁ ଘଟିବା ସହିତ ନବବଧୂ ରୀମା ଗୁରୁତର ଆହତ ହୋଇ ସୌଭାଗ୍ଯବଶତଃ ଦୀର୍ଘଦିନର ଚିକିତ୍ସାପରେ ବର୍ତ୍ତିଯାଇଛନ୍ତି । ତଥାପି ସେ ମାତ୍ର ପାଞ୍ଚଦିନର ଦାମ୍ପତ୍ୟରେ ମଧ୍ୟ ସ୍ବାର୍ଥପର ନ ହୋଇ ବାପଘରକୁ ପଳାଇ ନଯାଇ ପୁତ୍ରହରା ଶାଶୁଶଶୁରଙ୍କ ପାଖରେ ରହୁଛନ୍ତି । ଗତକାଲି ଥିଲା ମାସେକାଳ ସ୍ଥାନୀୟ ପୁଲିସ୍ ଓ ଦୀର୍ଘ ଚାରିବର୍ଷପରେ କ୍ରାଇମବ୍ରାଞ୍ଚ ଦାଖଲ କରିଥିବା ଫାଇନାଲ ଚାର୍ଜସିଟ୍ ଦାଖଲର ଦିନ । ଏହିଦିନ ସ୍ଥାନୀୟ ପାଟଣାଗଡ ଉପକାରାଗାରରେ ନାନାଦି ଉତ୍ପାତ ଅଭିଯୋଗରେ ସ୍ଥାନାନ୍ତରିତ ଜିଲ୍ଲାକାରାଗାରରେ ବିଚାରବିଭାଗୀୟ ହାଜତରେ ଥିବା 'ଖୋଳ୍ ପର୍ବତ , ମାର୍ ମୂଷା 'ତଦନ୍ତ ପରେ ମାମଲାର ଏକମାତ୍ର ଅଭିଯୁକ୍ତ ପୁଞ୍ଜିଲାଲ୍ ମେହେରଙ୍କୁ ଆଣି ପାଟଣାଗଡ ଏଡିଜେଙ୍କ କୋର୍ଟରେ ହାଜର କରାଯାଇଥିଲା । 

ନିହାତି ଏହାକୁ ବଡ ମାମଲା କୁହାଯିବ । ସମଗ୍ର ଦେଶରେ ଚାଞ୍ଚଲ୍ଯ ଖେଳାଇଦେଇଥିବା ଏହି ସୁନିୟୋଜିତ ଷଡଯନ୍ତ୍ରର ଡବଲହତ୍ୟାକାଣ୍ଡର ବର୍ଷାଧିକକାଳଧରି ମିଡିଆଟ୍ରାଏଲ୍ ମଧ୍ୟ ଚାଲିଥିଲା , ଯାହା ଅଦ୍ୟାପି ଥମିନାହିଁ ।  ଫିଲ୍ମ ମଧ୍ୟ ହେଇଛି !  ଅନୁଗୋଳ ' ପରୀ ' କାଣ୍ଡ ଫେମ୍ ବିଚକ୍ଷଣ କ୍ରାଇମବ୍ରାଞ୍ଚ ଡିଆଇ ଜି ଅରୁଣ ବୋଥ୍ରାଙ୍କର ଇଏ ଏକ ସାଇଣ୍ଟିଫିକ୍ ରିପୋର୍ଟ ଉପରେ ପର୍ଯ୍ୟବେଶିତ ସ୍ବତନ୍ତ୍ର ତଦନ୍ତ । ମାତ୍ର କେଇଟାଦିନରେ ସେ ଚଟାପଟ୍ ଗିରଫ କରି ଜେଲ୍ ରେ ଢୁକାଇଦେଇ  ହିରୋ ହେଇଗଲେ । ଭିଡିଓ ଡେମୋନଷ୍ଟ୍ରେସନ , ଫଟୋ ସୁଟ୍ , ରେକର୍ଡିଂ , ଟେବୁଲ୍ ଉପରେ ଚା' ପିଆଇ କାଚପାଣିଗ୍ଲାସ୍ ଥୋଇ ସନ୍ଦିଗ୍ଧ ଅଭିଯୁକ୍ତର ଫିଙ୍ଗର୍ ପ୍ରିଣ୍ଟ୍ ସଂଗ୍ରହର କଳା , ଅଠରବର୍ଷ ତଳର ଅଭିଯୁକ୍ତର ବାହାଘର ପ୍ରସେସନ୍ ରୋଷଣୀର ବଳିପଡିଥିବା ସଂରକ୍ଷିତ ଫୋଟକାବାଣରୁ ବୋମା ରସଦ ସଂଗ୍ରହ , ଲାପଟପ୍ ରେ ୟୁଟ୍ୟୁବ୍ ଦେଖି ଦେଖି ବୋମାତିଆରି କୌଶଳଶିକ୍ଷା ସହ ଘରର ଉପରମହଲାର ଏକାନ୍ତପଢାକୋଠରୀ ଓ କଲେଜପାଖ ବଣରେ ଯାଇ ଟ୍ରାଏଲ୍ ବା ଅନ୍ୟାନ୍ୟ ଅପରାଧର କୌଶଳକୁ ଧରିପାରିବା କଣ କମ୍ କାହାଣୀ  ? 

ସେ ଯା'ହେଉ , ବାର ବାର କୋର୍ଟଆଦେଶ ସତ୍ତ୍ୱେ ଚଳିତ ମାର୍ଚ୍ଚ ୯ ତାରିଖ ଶେଷସୁଦ୍ଧା ତଥାପି ଅଭିଯୁକ୍ତ ପକ୍ଷର ଆବେଦନ ପରେ ବି ପୁଲିସ୍ ତଦନ୍ତର ସେହି ତଥ୍ୟପ୍ରମାଣ ସମ୍ବଳିତ ଅଭିଯୋଗଫର୍ଦ୍ଦ ଅଭିଯୁକ୍ତଙ୍କୁ ନ ମିଳିବାରୁ ସେ ସେସବୁ ଅଭିଯୋଗକୁ ଅସ୍ବୀକାର କରିଥିବା ପ୍ରକାଶ ।

ତେବେ ଆଶ୍ଚର୍ଯ୍ୟର ବିଷୟ ଯେ , ଅଭିଯୁକ୍ତ ପକ୍ଷରୁ ତାଙ୍କର ଡିଫେନ୍ସ ପାଇଁ ତାଙ୍କ ପକ୍ଷରୁ ସେପରି କେହି ବଡଓକିଲଙ୍କୁ ନିୟୋଜିତ ନ କରିବା  !  ଅବଶ୍ୟ ତାଙ୍କ ପାଇଁ ଲଢୁଥିବା ଓକିଲମାନେ ଯେ ଛୋଟ ବା ଗୌଣ , ସେକଥା ଆମେ କି ଲୋକେ କହୁନାହାଁନ୍ତି । ସାଧାରଣତଃ ଏଭଳି ବଡ ବଡ ଅପରାଧ ମାମଲାରେ ଅଭିଯୁକ୍ତପକ୍ଷରୁ ନାମୀଦାମୀ ଓକିଲଙ୍କୁ ନିୟୋଜିତ କରାଯିବା ଦେଖାଯାଉଥିଲେ ହେଁ , ଏ କ୍ଷେତ୍ରରେ ଅଭିଯୁକ୍ତପକ୍ଷରୁ ପ୍ରଚୁର ଟଙ୍କାପଇସା ଖର୍ଚ୍ଚ ନକରି ଅପେକ୍ଷାକୃତ ନୂଆ ଯୁବଓକିଲମାନଙ୍କୁ ନିଯୁକ୍ତ କରାଯାଇଆସିଥିବାରୁ ଲୋକେ ଏପରି ଚର୍ଚ୍ଚା କରୁଛନ୍ତି ।

ତେବେ ଏହି ଅପରାଧର ଦୋଷୀ ଯିଏ ହେଇଥାଉ ନା କାହିଁକି , ତାଙ୍କୁ ଦୃଷ୍ଟ୍ବାନ୍ତମୂଳକ ଦଣ୍ଡବିଧାନ ହେବା ଉଚିତ୍  ।