28-Feb-2022

ପଦ୍ମପୁର:-ବରଗଡ଼ ଜିଲ୍ଲା ବିଜେପୁର ବ୍ଲକର ଯୋଖିପାଲି ଗ୍ରାମ ପଞ୍ଚାୟତର ସରପଞ୍ଚ ଭାବରେ ବିଜୟୀ ହେଲେ ଶ୍ରୀମତୀ ସବିତା ସାହୁ । ସେ ତାଙ୍କର ନିକଟତମ ପ୍ରତିଦ୍ୱନ୍ଦୀ ରୀତା ସୁନାଙ୍କ ଠାରୁ ୪୮ ଖଣ୍ଡ ଭୋଟ ବ୍ୟବଧାନରେ ବିଜୟୀ ହୋଇଛନ୍ତି। ଶ୍ରୀମତୀ ସାହୁ ୧୦୨୦ ଟି ଭୋଟ ପାଇଥିବା ବେଳେ ଶ୍ରୀମତୀ ସୁନା ମାତ୍ର ୯୭୨ ଖଣ୍ଡ ଭୋଟ ପାଇଛନ୍ତି । ଏହି ବିଜୟ ପାଇଁ ସେ ଯୋଖିପାଲି ଗ୍ରାମ ପଞ୍ଚାୟତବାସୀଙ୍କୁ ଧନ୍ୟବାଦ ଦେବା ସହିତ ସେମାନଙ୍କର ସୁଖ ଦୁଃଖର ସାଥି ହେବାପାଇଁ ପ୍ରତିଶୃତି ଦେଇଛନ୍ତି ।ଏଠାରେ ସୂଚନା ଯୋଗ୍ୟ ଯେ, ଶ୍ରୀମତୀ ସାହୁ ଜଣେ ଉଚ୍ଚ ଶିକ୍ଷିତା ମହିଳା ହେବା ସଙ୍ଗେ  ଗୃହିଣୀ ଅଟନ୍ତି।ସେ ସ୍ନାତକୋତ୍ତର ପାଠ ପଢ଼ିଛନ୍ତି ।ତାଙ୍କ ପିତା ଗୁଡ଼ିଆ ଶଙ୍କର ସାହୁ ଜଣେ ଦକ୍ଷ ରାଜନୈତିଜ୍ଞ ତଥା ସମାଜସେବୀ ହୋଇଥିବା ବେଳେ ମାତା ସୁଲୋଚନା ସାହୁ ବଡ଼ବାଉଁସେନ ଗ୍ରାମ ପଞ୍ଚାୟତର ପୂର୍ବତନ ସମିତି ସଭ୍ୟା ଅଟନ୍ତି । ପିଲାଦିନୁ ନିଜ ବାପା ମାଁଙ୍କୁ ଦେଖି ଆସିଥିବା ଅଭିଜ୍ଞତା ପଞ୍ଚାୟତର ବିକାଶ ପାଇଁ କାର୍ଯ୍ୟକାରୀ ହୋଇ ପାରିବ ବୋଲି ମତ ପ୍ରକାଶ ପାଇଛି ।ଅପରପକ୍ଷରେ ଯୋଖିପାଲି ଗ୍ରାମ ପଞ୍ଚାୟତବାସୀ ଜଣେ ଉଚ୍ଚ ଶିକ୍ଷିତା ମହିଳାଙ୍କୁ ସରପଞ୍ଚ ରୂପେ ପାଇ ପଞ୍ଚାୟତର ବହୁମୁଖୀ ବିକାଶ ହେଇପାରିବ ବୋଲି ଆଶାବାନ୍ଧିଛନ୍ତି ।