28-Feb-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ ):  ଗତ ୧୯ ତାରିଖରେ ସଦର ବ୍ଲକର ବରକାନୀ ପଞ୍ଚାୟତର ପଣ୍ଡରାପିଟା ଗ୍ରାମରେ ଏକ ଅଭାବିତ ଘଟଣା ଘଟିଛି । କିଛିଦିନ ଆଗରୁ ଏହି ଗ୍ରାମରେ ପାଟଖଣ୍ଡା ବଳିଯାତ୍ରାର ଅନୁକରଣ କରି ଏହି ଗାଁ'ର ୭/ ୮ ବର୍ଷର  ୫ ଜଣ ଶିଶୁ ବଳିଯାତ୍ରାର ଖେଳ ଖେଳି ଏକ କୁକୁରଛୁଆକୁ ଫୁଲମାଳ ପିନ୍ଧାଇ ସିନ୍ଦୁର ଲଗାଇ ପ୍ଲାଷ୍ଟିକ୍ ଡବାର ବାଜା ବଜାଇ  ବଳିବୋଦା ସଜାଇ ନେଇ ଖେଳଦେବୀଙ୍କ ପାଖରେ ବଳି ଚଢାଇ ରକ୍ତ ପିଇଥିଲେ । ବଳିଯାତ୍ରା ପରି ସେମାନେ ବରୁଆ ବା କାଳିସୀ, ପୂଜକ, ଘାତକ ଇତ୍ୟାଦି ସାଜିଥିଲେ । ଏହା ଦେଖିପକାଇ ଗାଁ'ର କିଛିଲୋକ ସେମାନଙ୍କ ଘରଲୋକଙ୍କୁ କହିବାରୁ କାଳେ କିଛି ଅସୁସ୍ଥତା ଆଶଙ୍କାରେ ଘରଲୋକେ ସେମାନଙ୍କୁ ଆଣି ଭୀମଭୋଇ ମେଡିକାଲ କଲେଜ ହାସପାତାଲରେ ଚିକିତ୍ସା କରାଇଥିଲେ । ଗତକାଲି ସେମାନଙ୍କ ଆଉଥରେ ଦ୍ବିତୀୟ ଡୋଜ୍  ଇଞ୍ଜେକସନ୍ ଦେବାକୁ ଅଣାଯାଇଥିବାବେଳେ ଘଟଣାଟି ପ୍ରଘଟ ହୋଇଥିଲା  ଓ ଆଜି ଗଣମାଧ୍ୟମରେ ପ୍ରକାଶ ପାଇଛି ।  ସେମାନେ ଏବେ ସୁସ୍ଥ ରହିଥିବା ଜଣାଯାଇଛି । ତେବେ ଏସବୁ ତଥାକଥିତ ପରମ୍ପରା ବା ବଳିପ୍ରଥାର ଦୃଶ୍ୟ କୋମଳମତୀ ଶିଶୁଙ୍କ ଉପରେ କିପରି ପଡୁଛି ,  ସମସ୍ତେ ଚିନ୍ତା କରିବାର ଅବକାଶ ପହଞ୍ଚିଛି । କେହି ନିଜର ନିକୃଷ୍ଟସ୍ବାର୍ଥ, ମାଂସଲାଳସା ବା କୌଣସି ସଂପ୍ରଦାୟର ଭୋଟରାଜନୀତି ଉଦ୍ଦେଶ୍ୟରେ ଏତେବଡ କୁପ୍ରଭାବ ସମ୍ପର୍କରେ ଉଦାସୀନ ରହିବା ଅନୁଚିତ୍ । ରାଜନେତା, ବୁଦ୍ଧିଜିବୀ, ଶିକ୍ଷିତବର୍ଗ, ପ୍ରଶାସନ, ସରକାର ଏଥିପାଇଁ ଚିନ୍ତାଶୀଳ ହେବା ନିହାତି ଆବଶ୍ୟକ ।

 ଆଦିବାସୀ ପରମ୍ପରା ନାଁ'ରେ ପଶ୍ଚିମ ଓଡିଶାର ବିଭିନ୍ନ ଜାଗାରେ ବଳିପର୍ବ ବହୁତ ପୁରୁଣା । ବଲାଙ୍ଗୀର ଜିଲ୍ଲାର ବି ସୁଲିଆଯାତ୍ରା, ପାଟଖଣ୍ଡା ଓ ଅନ୍ୟାନ୍ୟ ପୂଜାପର୍ବରେ ମଇଁଷି, ଛେଳିବୋଦା, ମେଣ୍ଢା, କୁକୁଡା, ପାରା, ବତକ ଇତ୍ୟାଦି ଗୃହପାଳିତ ପଶୁପକ୍ଷୀଙ୍କୁ ଏକତ୍ର ବଳି ଦିଆଯାଇଥାଏ । ଏଥରୁ ସାରା ଓଡିଶାର ସବୁଠୁଁ ବଡ ସୁଲିଆଯାତ୍ରାରେ ହଜାର ହଜାର ସଂଖ୍ୟାରେ ମଇଁଷି , ଛେଳି , ମେଣ୍ଢା , କୁକୁଡା ପାରା ବତକ ଏକତ୍ର ବଳି ଦିଆଯାଉଛି ।  ବଲାଙ୍ଗୀର ଜିଲ୍ଲା ସଦରମହକୁମାଠାରୁ ମାତ୍ର ୨୦/୨୫ କିମି ଦୂରରେ ଦେଓଗାଁ ବ୍ଲକ୍ ର ତୁଷୁରାଥାନାନ୍ତର୍ଗତ ଖଇରଗୁଡା ଗ୍ରାମର ବଡଖଳା ଓ କୁମୁରିଆ ସାନଖଳା ସହ ଜିଲ୍ଲାର ଅନ୍ୟାନ୍ୟ ସ୍ଥାନ ରେ ମଧ୍ୟ ଏହା ଚାଲିଆସୁଛି । ଏତଦ୍ ବ୍ୟତୀତ ପାଟଖଣ୍ଡାଯାତ୍ରାରେ ମଧ୍ୟ ସଦର ବ୍ଲକ୍ ର ବରକାନୀ ଆଦି ଅଞ୍ଚଳରେ ଏହି ବଳିପର୍ବ ହୋଇଥାଏ । ମଝିରେ ସୁଲିଆଯାତ୍ରାର ଏଭଳି ବହୁପଶୁବଳିକୁ ବନ୍ଦ କରାଯିବାକୁ କେତେକ ସଂଗଠନ ପକ୍ଷରୁ ଉଦ୍ୟମ କରାଯାଇଥିଲା । ଏପରିକି ସ୍ଥାନୀୟ ପ୍ରଶାସନ ପକ୍ଷରୁ ମଧ୍ୟ ଅଦାଲତର ଆଦେଶ ମୁତାବକ ବିବାଦୀୟ ବଳିସ୍ଥାନରେ ୧୪୪ଧାରା ଭଳି ଆଇନଗତ କଟକଣା ଜାରୀ ହୋଇଥିଲା । କିନ୍ତୁ ଏହାପଛରେ କେତେକ ନେତା ରାଜନୈତିକ ଉଦ୍ଦେଶ୍ୟରେ ଏହାକୁ ଆଦିବାସୀପରମ୍ପରା ନାଁ'ରେ ପ୍ରବଳ ଜିଦ୍ ଓ ବିରୋଧ କରି ଶେଷରେ ସୁପ୍ରିମକୋର୍ଟର ଏକ ଆଦେଶନାମା ହାସଲକରି ଅଦ୍ୟାବଧି ପୂର୍ବାପେକ୍ଷା ଆହୁରି ଅଧିକମାତ୍ରାରେ ଏହି ନୃଶଂସ ସମୂହ ଗୃହପାଳିତ ମହାପଶୁପକ୍ଷୀବଳିଯାତ୍ରାକୁ ଅବ୍ୟାହତ ରଖି ଆସିଛନ୍ତି  ! ଏପରିକି ପୁଲିସ୍ , ପ୍ରଶାସନ ଓ ନିର୍ବାଚିତ ଲୋକପ୍ରତିନିଧିମାନେ ନିଜେ ଏହି ବଳିଯାତ୍ରାର ଅଂଶବିଶେଷ ପାଲଟୁଥିବା ଦେଖାଯାଇଛି । ଶାନ୍ତିଶୃଙ୍ଖଳା ରକ୍ଷା ନାଁ'ରେ ସେଠାରେ ସମବେତ ପୁଲିସ୍ ବଳିମାଂସର ଭୁରିଭୋଜନରେ ଆପ୍ୟାୟିତ ହୋଇଥା'ନ୍ତି  !

ତେବେ ଏବେ ଏହି ଚାଞ୍ଚଲ୍ୟକର  ଶିଶୁଙ୍କ ଦ୍ବାରା ବଳି ଅନୋକରଣର ଖେଳର କୁକୁରଛୁଆର ବଳି ଓ କଞ୍ଚାରକ୍ତପିଇଯିବା ସମାଜରେ ସବୁଠାରୁ ଭୟାନକ ଘଟଣା ବୋଲି କୁହାଯାଉଛି । ଏହା ବିରୁଦ୍ଧରେ ସମାଜସେବୀମାନେ ତୁରନ୍ତ ସଚେତନତା ସୃଷ୍ଟି ଦିଗରେ ତତ୍ପର ହୋଇପଡିବା ଜରୁରୀ ବୋଲି ଆହ୍ବାନ କରାଯାଉଛି ।