04-Sep-2026

ବଲାଙ୍ଗୀର(ପ୍ରେରଣା ଖବର): ଅପେକ୍ଷାର ଅନ୍ତଘଟିଲା । ଦେଓଗାଁ ଅଞ୍ଚଳବାସୀଙ୍କ ଦୀର୍ଘଦିନର ଦାବି ପୂରଣ ହୋଇଛି । ପୂର୍ବସରକାର ଅମଳରେ ଘୋଷଣା ହୋଇଥିବା ପ୍ରସ୍ତାବିତ ସୋନଗଡ ନଦୀର ସିକୁଆଁଠାରେ ଆଇଏସଏସ ନିର୍ମାଣ ପାଇଁ ଜଳସେଚନ ବିଭାଗ ଟେଣ୍ଡର ବାହାର କଲା । ଜଳସେଚନ ବିଭାଗର ଭବାନୀପାଟଣା ସ୍ଥିତ ତେଲବେସିନର ମୁଖ୍ୟନିର୍ମାଣଯନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ବିଧିବଦ୍ଧ ଭାବରେ ଏହି ଆଇଏସଏସ ନିର୍ମାଣ ପାଇଁ ୯୧କୋଟି ୧୧ଲକ୍ଷ ୧୯ହଜାର ୮୩୦ ଟଙ୍କାର ଟେଣ୍ଡର ପ୍ରକାଶ ପାଇଛି । ଇ-ପ୍ରକ୍ୟୁରମେଣ୍ଟ ନୋଟିସନମ୍ବର-ଇପିସି/୦୨/୨୦୨୬-୨୭ ତଥା ବିଡ ଆଇଡେଣ୍ଟିଫିକେସନ ନମ୍ବର-ବିଡ-୦୩/୨୬-୨୭ରେ ଏହା ତେଲବେସିନ ଚିଫଇଞ୍ଜିନିୟରଙ୍କ କାର୍ଯ୍ୟାଳୟରୁ ଏହା ବାହାରିଛି । ଟେଣ୍ଡର ପରେ ଦୁଇବର୍ଷ ମଧ୍ୟରେ ଏହାର ନିର୍ମାଣ କାମ ସରିବ ବୋଲି ନିର୍ଦ୍ଧାରଣ କରାଯାଇଛି । ପ୍ରକାଶ ଯେ, ସୋନଗଡ ନଦୀରେ ବର୍ଷାପରେ ପାଣି ଶୁଖିଯାଉଛି । ଯାହା ଫଳରେ ଦେଓଗାଁ ଓ ସଦରବ୍ଲକ ଅଞ୍ଚଳର ଅନେକ ଗ୍ରାମକୁ ପାନୀୟଜଳ ଯୋଗାଣ ହୋଇପାରୁନାହିଁ । ଏହି ଆଇଏସଏସ ନିର୍ମାଣ ହେଲେ ଉଭୟ ଦେଓଗାଁ ବ୍ଲକ ଓ ସଦରବ୍ଲକ ଅଞ୍ଚଳର ପ୍ରାୟ ୫୦ଟି ଗ୍ରାମର ଲୋକ ଉପକୃତ ହୋଇପାରିବେ । ଭୂତଳ ଜଳସ୍ତର ବଢିବା ସାଙ୍ଗକୁ ଏଠାରୁ ଉଠାଜଳସେଚନ ମାଧ୍ୟମରେ ଚାଷିଙ୍କ ଜମିକୁ ଜଳସେଚିତ କରାଯାଇ ପାରିବ । ମୁଖ୍ୟତଃ ଚାଷିଙ୍କ ଜମିକୁ ଜଳସେଚନ ଓ ଗ୍ରାମ୍ୟ ପାନୀୟ ଜଳଯୋଗାଣ ପ୍ରକଲ୍ପଗୁଡିକ ଅଧିକ ପରିମାଣରେ ଉପକୃତ ହେବେ । କେବଳ ସେତକି ନୁହେଁ ଏଠାରୁ ମାତ୍ର ଦେଢକିଲୋମିଟର ଦୂରରେ ଥିବା ବୁଢାଡଙ୍ଗର ପାହାଡ ସହିତ ଏହାକୁ ଇକୋଟୁରିଜମରେ ସାମିଲ କଲେ ଅଞ୍ଚଳର ସାମଗ୍ରୀକ ବିକାଶ ମଧ୍ୟ ହୋଇପାରିବ । ଏହି ପ୍ରକଲ୍ପ ପାଇଁ ଦେଓଗାଁ ବ୍ଲକର ପୂର୍ବତନ ଅଧ୍ୟକ୍ଷ ଲକ୍ଷ୍ମଣ କୁମାର ମେହେର ତଥା ସୋନଗଡ ବ୍ୟାରେଜ ଏକ୍ସନକମିଟିର ସଭାପତି ସ୍ଥାନୀୟ ଜନସାଧାରଣଙ୍କୁ ନେଇ ଅନେକଥର ଆନ୍ଦୋଳନ କରୁଥିଲେ । ପୂର୍ବ ନବୀନ ସରକାର ଅମଳରେ ଘୋଷିତ ପ୍ରକଲ୍ପର ବିଳମ୍ବକୁ ନେଇ ସ୍ଥାନୀୟ ବିଧାୟକ କଳିକେଶ ନାରାୟଣ ସିଂଦେଓ ବିଧାନସଭାରେ ପ୍ରଶ୍ନ କରିବା ସହିତ ଜଳସେଚନ ବିଭାଗ ଦାୟୀତ୍ୱରେ ଥିବା ମୁଖ୍ୟମନ୍ତ୍ରୀ ମୋହନଚରଣ ମାଝୀଙ୍କୁ ଚିଠିଲେଖି ହସ୍ତକ୍ଷେପ କରିବାକୁ ଦାବି କରିଥିଲେ । ଏହି ପ୍ରକଲ୍ପ ପାଇଁ ବର୍ତ୍ତମାନର ମୁଖ୍ୟଶାସନସଚିବ ଶ୍ରୀମତୀ ଅନୁ ଗର୍ଗ,ତତକାଳିନ ଜଳସେଚନ ବିଭାଗର ଇନଞ୍ଜିନିୟରିଂ ଇନ ଚିଫ ଚନ୍ଦ୍ରଶେଖର ପାଢୀ ଓ ବର୍ତ୍ତମାନର ଜଳସେଚନ ବିଭାଗର ପ୍ରମୁଖ ଶାସନସଚିବ ଶ୍ରୀମତୀ ଶୋଭା ଶର୍ମା ତତ୍‌ପରତା ଦେଖାଇଥିଲେ । ଡିପିଆର ପ୍ରସ୍ତୁତ ହୋଇ ଏବେ ଶେଷରେ ସୋନଗଡ ନଦୀର ସିକୁଆଁ ଆଇଏସଏସ ପାଇଁ ଟେଣ୍ଡର ବାହାରିବା ପରେ ବିଭିନ୍ନ ମହଲରେ ଖୁସିର ମାହୋଲ ଦେଖାଯାଇଛି । ମୁଖ୍ୟମନ୍ତ୍ରୀ ମୋହନଚରଣ ମାଝୀ ଓ ବିଧାୟକ କଳିକେଶନାରାୟଣ ସିଂଦେଓଙ୍କୁ ଅଞ୍ଚଳବାସୀଙ୍କ ପକ୍ଷରୁ ସୋନଗଡ ଏକ୍ସନ କମିଟିର ସଭାପତି ଲକ୍ଷ୍ମଣକୁମାର କୃତଜ୍ଞତା ଜଣାଇଛନ୍ତି ।

ସିକୁଆଁରେ ବିଧାୟକ କଳିକେଶଙ୍କୁ ଭବ୍ୟସମ୍ବର୍ଦ୍ଧନା

ବଲାଙ୍ଗୀର,-ସୋନଗଡ ନଦୀରେ ସିକୁଆଁଠାରେ ଆଇଏସଏସ ନିର୍ମାଣ ପାଇଁ ଜଳସେଚନ ବିଭାଗ ପକ୍ଷରୁ ଟେଣ୍ଡର ବାହାରିବା ପରେ ଦେଓଗାଁ ଅଞ୍ଚଳରେ ଖୁସିର ଲହରି ଖେଳିଯାଇଛି । ପ୍ରକଲ୍ପରେ ସଫଳତା ପରେ ବିଧାୟକ କଳିକେଶନାରାୟଣ ସିଂଦେଓଙ୍କ ଉଦ୍ୟମକୁ ପ୍ରଶଂସା କରାଯାଇଛି । ସେଥିପାଇଁ ଆଜି ସିକୁଆଁଠାରେ ଆୟୋଜିତ ଏକ କାର୍ଯ୍ୟକ୍ରମରେ ଚାଷି ତଥା ଗ୍ରାମବାସୀ ବିଧାୟକ କଳିକେଶନାରାୟଣ ସିଂଦେଓ ଓ ସୋନଗଡ ପ୍ରକଲ୍ପ ଏକ୍ସନ କମିଟିର ସଭାପତି ପୂର୍ବତନ ବ୍ଲକଅଧ୍ୟକ୍ଷ ଲକ୍ଷ୍ମଣକୁମାର ମେହେରଙ୍କୁ ଭବ୍ୟ ସମ୍ବର୍ଦ୍ଧନା ଜ୍ଞାପନ କରାଯାଇଛି । ଆଜି ଦିନ ୧୨ଟା ସମୟରେ ବିଧାୟକ କଳିକେଶ ପହଞ୍ଚିବା ପରେ ତାଙ୍କୁ ଏକ ଶୋଭାଯାତ୍ରାରେ ସିକୁଆଁ ଶିବମନ୍ଦିର ପର୍ଯ୍ୟନ୍ତ ନିଆଯାଇଥିଲା । ସେଠାରେ ଏକ୍ସନକମିଟିର ସଂପାଦକ ଶୈଳେନ୍ଦ୍ରକୁମାର ସାହୁଙ୍କ ସଂଯୋଜନାରେ ଆୟୋଜିତ କାର୍ଯ୍ୟକ୍ରମରେ ବିଧାୟକଙ୍କୁ ଭବ୍ୟ ସମ୍ବର୍ଦ୍ଧନା ଦିଆଯାଇଥିଲା । ପ୍ରକାଶ ଯେ,ସୋନଗଡ ନଦୀରେ ସିକୁଆଁଠାରେ ଏହି ଆଇଏସଏସ ନିର୍ମାଣ କରିବାକୁ ବହୁବର୍ଷ ହେଲା ଆନ୍ଦୋଳନ ଚାଲିଥିଲା । ଏବେ ତାହା ସଫଳ ହୋଇଛି । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଦେଓଗାଁ ବ୍ଲକଅଧ୍ୟକ୍ଷ ଦୟାନିଧି ଖମାରୀ,ବିଧାୟକଙ୍କ ଦେଓଗାଁ ବ୍ଲକପ୍ରତିନିଧି ସୁଶିଳ ଚାନ୍ଦ,ବରିଷ୍ଠ ସଂଗଠକ ପ୍ରମୋଦ ବହିଦାରଙ୍କ ସମେତ ବହୁସଂଖ୍ୟାରେ ଲୋକ ଉପସ୍ଥିତ ଥିଲେ ।