14-Sep-2026

ବଲାଙ୍ଗିର(ପ୍ରେରଣା ଖବର)ବଲାଙ୍ଗିରକୁ ଦେଶର ପ୍ରମୁଖ ସହରଗୁଡ଼ିକ ସହ ଦ୍ରୁତ ଓ ଆଧୁନିକ ରେଳ ସଂଯୋଗରେ ଯୋଡ଼ିବା ପାଇଁ  ତତ୍କାଳୀନ ସାଂସଦ ରାଜ୍ୟସଭା ଶ୍ରୀ ନିରଞ୍ଜନ ବିଶିଙ୍କ ପକ୍ଷରୁ ଉଠାଯାଇଥିବା ବନ୍ଦେ ଭାରତ ଏକ୍ସପ୍ରେସ ଚଳାଚଳ ଦାବି ଉପରେ କେନ୍ଦ୍ର ରେଳ ମନ୍ତ୍ରାଳୟର ରେଳବୋର୍ଡ ପ୍ରତିକ୍ରିୟା ଜଣାଇଛି।
 ଶ୍ରୀ ବିଶି ୩୦ ମାର୍ଚ୍ଚ ୨୦୨୬ରେ ପ୍ରଧାନମନ୍ତ୍ରୀଙ୍କୁ  ପତ୍ର ଲେଖି ବଲାଙ୍ଗିରରୁ ନୂଆଦିଲ୍ଲୀ, ବାରାଣସୀ, ବେଙ୍ଗାଲୁରୁ ଓ ଜମ୍ମୁକୁ ବନ୍ଦେ ଭାରତ ଏକ୍ସପ୍ରେସ ଚଳାଚଳ ପାଇଁ ଦାବି ଉପସ୍ଥାପନ କରିଥିଲେ। ଏହି ପ୍ରସ୍ତାବକୁ ନେଇ ରେଳବୋର୍ଡର କାର୍ଯ୍ୟନିର୍ବାହୀ ନିର୍ଦ୍ଦେଶକ (କୋଚିଂ–୧) ସୁଦୀଶ ଭି.ସି. ୯ ସେପ୍ଟେମ୍ବର ୨୦୨୬ରେ ଡ଼. ବିଶିଙ୍କୁ ଲିଖିତ ଉତ୍ତର ଦେଇଛନ୍ତି। 
ରେଳବୋର୍ଡ ସୂଚନା ଅନୁଯାୟୀ, ବର୍ତ୍ତମାନ ବଲାଙ୍ଗିରକୁ ୬୬ଟି ଟ୍ରେନ୍ ସେବା ରହିଛି,ଏଥିମଧ୍ୟରୁ ବେଙ୍ଗାଲୁରୁ ସହ ୪ ଯୋଡ଼ା ଏବଂ ବାରାଣସୀ ସହ ଗୋଟିଏ ଯୋଡ଼ା ଟ୍ରେନ୍ ସଂଯୋଗ ରହିଛି। ବଲାଙ୍ଗିର–ଟିଟିଲାଗଡ଼ ମଧ୍ୟରେ ୨୬ ଯୋଡ଼ା ଟ୍ରେନ୍ ଚଳାଚଳ କରୁଥିବାବେଳେ ଦିଲ୍ଲୀ ଯାତ୍ରୀଙ୍କ ପାଇଁ ଟିଟିଲାଗଡ଼ରୁ ୧୨୮୦୭/୧୨୮୦୮ ବିଶାଖାପାଟଣାମ–ହଜରତ ନିଜାମୁଦ୍ଦିନ ସମତା ଏକ୍ସପ୍ରେସ ଉପଲବ୍ଧ ଥିବା ରେଳବୋର୍ଡ ଉଲ୍ଲେଖ କରିଛି। 
ଗୁରୁତ୍ୱପୂର୍ଣ୍ଣ ଭାବେ ରେଳବୋର୍ଡ କହିଛି ଯେ, ବନ୍ଦେ ଭାରତ ସମେତ ନୂତନ ଟ୍ରେନ୍ ସେବା ପ୍ରଚଳନ ଭାରତୀୟ ରେଳବାଇର ଏକ ଚାଲୁ ପ୍ରକ୍ରିୟା, ଯାହା ଯାତ୍ରୀ ଚାହିଦା, ଟ୍ରାଫିକ୍ ଯୁକ୍ତିସଙ୍ଗତତା, ପରିଚାଳନାଗତ ସମ୍ଭାବ୍ୟତା ଓ ସମ୍ବଳର ଉପଲବ୍ଧତା ଉପରେ ନିର୍ଭରଶୀଳ ବୋଲି ଉତ୍ତର ରେ ଜଣାଇଛନ୍ତି l
ଶ୍ରୀ ବିଶି କହିଛନ୍ତି ଯେ ପଶ୍ଚିମ ଓଡ଼ିଶାର ବଲାଙ୍ଗିର ଭଳି ଗୁରୁତ୍ୱପୂର୍ଣ୍ଣ ଜିଲ୍ଲାକୁ ଦେଶର ରାଜଧାନୀ ଓ ପ୍ରମୁଖ ଧାର୍ମିକ, ଶିକ୍ଷା ଓ ଆର୍ଥିକ କେନ୍ଦ୍ର ସହ ଉନ୍ନତ ରେଳ ସଂଯୋଗ ଦେବା ଅଞ୍ଚଳର ସାମଗ୍ରିକ ବିକାଶ ପାଇଁ ଅତ୍ୟନ୍ତ ଆବଶ୍ୟକ। ତେଣୁ ବଲାଙ୍ଗିରରୁ ବନ୍ଦେ ଭାରତ ଚଳାଚଳ ଦାବିକୁ ସେ ରେଳ ମନ୍ତ୍ରାଳୟ ନିକଟରେ ଅବ୍ୟାହତ ରଖିବେ ବୋଲି କହିଛନ୍ତି।