27-Jun-2021

ବଲାଙ୍ଗିର (ପ୍ରେରଣା ଖବର ବ୍ୟୁରୋ) ଅନ୍ଧାରୀ ଜଙ୍ଗଲର ସଂରକ୍ଷକ, ସମ୍ବଲପୁର ବିଶ୍ୱବିଦ୍ୟାଳୟର ପୂର୍ବତନ କୁଳପତି ତଥା ସୁନାମଧନ୍ୟ ଆଦର୍ଶ ପରିବେଶ କର୍ମୀ ପ୍ରଫେସର ଧ୍ରୁବରାଜ ନାଏକ ଆଉ ନାହାନ୍ତି । ଆଜି ସକାଳେ ଝାରସୁଗୁଡା ଜିଲ୍ଲା ଲଇକେରା ବ୍ଲକ ଅନ୍ତର୍ଗତ କୁଅଁରମାଲ ଗ୍ରାମର ଜଣେ ଦୁର୍ବୃତ୍ତଙ୍କ ଟାଙ୍ଗିଆ ଚୋଟରେ ସେ ମୃତ୍ୟୁବରଣ କରିଥିବା ସୂଚନା ମିଳିଛି । ପୋଲିସ ଅଭିଯୁକ୍ତ ପ୍ରବୀଣ ଧରୁଆ ଓରଫ ରିନିତଙ୍କୁ ଗ୍ରାମବାସୀ ଓ ଜଙ୍ଗଲ ସାଥୀଙ୍କ ସହଯୋଗରେ ଅନ୍ଧାରୀ ଜଙ୍ଗଲ ଭିତରୁ କାବୁ କରିଥିବା ଏସ୍‌ପି ବିକାଶ ଚନ୍ଦ୍ର ଦାଶ ସୂଚନା ଦେଇଛନ୍ତି । ଆଜି ସକାଳେ ପ୍ରଫେସର ନାଏକ ଘରେ ନ ଥିବା ସମୟରେ ପ୍ରବୀଣ ଏକ ଟାଙ୍ଗିଆ ଧରି ସିଧାସଳଖ ତାଙ୍କ ଘରର ଶୟନ କକ୍ଷକୁ ପ୍ରବେଶ କରିଥିଲା । ପ୍ରଫେସର ନାଏକ ବାହାରୁ ଆସି ଅଭିଯୁକ୍ତକୁ ଶୟନ କକ୍ଷରୁ ବାହାରି ଯିବା ପାଇଁ କହିଥିଲେ । ଏହାପରେ ଅଭିଯୁକ୍ତ ଜଣକ ବାହାରକୁ ବାହାରି ପ୍ରବଳ ପାଟିତୁଣ୍ଡ କରିଥିଲା । ପାଟିତୁଣ୍ଡ କରିବା ପାଇଁ ବାରଣ କରିବାରୁ ପ୍ରଫେସର ନାଏକଙ୍କୁ ଟାଙ୍ଗିଆରେ ଏକ ଚୋଟ ମାରିଥିଲା । ଗୁରୁତର ଅବସ୍ଥାରେ ପ୍ରଫେସର ନାଏକଙ୍କୁ ପରିବାର ଲୋକେ ଝାରସୁଗୁଡା ସହର ସ୍ଥିତ ଏକ ନର୍ସିଂ ହୋମରେ ଭର୍ତ୍ତି କରିଥିଲେ । ମାତ୍ର ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କ ପ୍ରାଣବାୟୁ ଉଡିଯାଇଥିଲା । ଏହି ଘଟଣା ପଛରେ ଗ୍ରାମର ଏକ ପୋଖରୀ କିମ୍ବା ଜମି ବିବାଦ ଥିବା ମଧ୍ୟ ପୋଲିସ ସନ୍ଦେହ କରୁଛି । ତଦନ୍ତ ବେଳେ ଏହି ସମସ୍ତ ଦିଗକୁ ଧ୍ୟାନ ଦିଆଯିବ ବୋଲି ଏସ୍‌ପି କହିଛନ୍ତି । ଜାଳେଣି କାଠ ପାଇଁ ଅନ୍ଧାରୀ ଜଙ୍ଗଲକୁ କେବଳ ରବିବାର ଦିନ ଯିବା ପାଇଁ ଅନୁମତି ଥିବାରୁ ଆଜି ମହିଳାମାନେ ଏଥିନିମନ୍ତେ ଜଙ୍ଗଲ ଭିତରକୁ ପ୍ରବେଶ କରିଥିଲେ । ତେବେ ଏହି ମହିଳା ମାନେ ଅଭିଯୁକ୍ତଙ୍କୁ ପଇସା ଦେବା ପାଇଁ ରୋକଠୋକ ମନା କରିବା ପରେ ସେ ମଦ୍ୟପାନ କରିବା ଲାଗି ପ୍ରଫେସର ନାଏକଙ୍କୁ ଶହେ ଟଙ୍କା ମାଗିଥିଲା । ପ୍ରଫେସର ନାଏକ ମଧ୍ୟ ମନା କରିବାରୁ ପରେ ସେ ଏପରି କାଣ୍ଡ ଭିଆଇଥିବା ପ୍ରଫେସର ନାଏକଙ୍କ ପରିବାର ଲୋକ କହିଛନ୍ତି ।  ପ୍ରଫେସର ନାଏକଙ୍କ ବିୟୋଗ ଖବର ପ୍ରଚାରିତ ହେବା ମାତ୍ରେ ପଶ୍ଚିମ ଓଡିଶା ସମେତ ରାଜ୍ୟର ଶିକ୍ଷା ଜଗତରେ ଶୋକର ଛାୟା ଖେଳିଯାଇଛି । 
 
 ୧୯୩୮ ମସିହା ଜୁନ୍ ୧୨ ତାରିଖରେ ଝାରସୁଗୁଡା ଜିଲ୍ଲା ଲଇକେରା ବ୍ଲକ କୁଅଁରମାଲ ଗ୍ରାମରେ ଜନ୍ମଗ୍ରହଣ କରିଥିବା ପ୍ରଫେସର ନାଏକ ଝାରସୁଗୁଡା ଓ ସୁନ୍ଦରଗଡରେ ସ୍କୁଲ ଶିକ୍ଷା ସମାପ୍ତ କରିବା ପରେ ସମ୍ବଲପୁର ଗଙ୍ଗାଧର ମେହେର କଲେଜରୁ ୧୯୬୦ ମସିହାରେ ସ୍ନାତକ ଡିଗ୍ରୀ ହାସଲ କରିଥିଲେ । ପରେ ବନାରସ ହିନ୍ଦୁ ବିଶ୍ୱବିଦ୍ୟାଳୟରୁ ଏମ୍‌ଏସ୍‌ସି ଜୁଲୋଜିରେ ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହୋଇ ସ୍ୱର୍ଣ୍ଣ ପଦକ ହାସଲ କରିଥିଲେ । ଏହାଛଡା ସେ ସେହିଠାରୁ ଜର୍ମାନ ଭାଷାରେ ଡିପ୍ଲୋମା କରିଥିଲେ । ୧୯୬୨ ମସିହାରେ ଓଡିଶା ଶିକ୍ଷା ସେବାରେ ଯୋଗ ଦେଇ ୧୯୭୩ ପର୍ଯ୍ୟନ୍ତ ଅଧ୍ୟାପନା କରିଥିଲେ । ପରେ ୧୯୭୩ ମସହାରେ ଉତ୍କଳ ବିଶ୍ୱବିଦ୍ୟାଳୟରେ ଜୁଲୋଜି ବିଭାଗର ପ୍ରାଧ୍ୟାପକ ରୂପେ ଯୋଗ ଦେବା ପରେ ୧୯୮୪ ମସିହାରୁ ୧୯୯୮ ମସିହା ପର୍ଯ୍ୟନ୍ତ ପ୍ରଫେସର ପ୍ରଫେସର ଓ ବିଭାଗୀୟ ମୁଖ୍ୟ କାର୍ଯ୍ୟ କରିଥିଲେ । ଏହି ସମୟ ମଧ୍ୟରେ ସେ ଯୁକ୍ତରାଷ୍ଟ୍ର ଆମେରିକା, ଜାପାନର ବିଭିନ୍ନ ବିଶ୍ୱବିଦ୍ୟାଳରେ ଭିଜିଟିଂ ସାଇଣ୍‌ଟିସ୍ଟ ରୂପେ କାର୍ଯ୍ୟ କରିଛନ୍ତି । ୧୯୯୮ ମସିହାରେ ପ୍ରଫେସର ନାଏକ ଅବସର ଗ୍ରହଣ କରିବା ପରେ ସମ୍ବଲପୁର ବିଶ୍ୱବିଦ୍ୟାଳୟର କୁଳପତି ରୂପେ ନିଯୁକ୍ତ ହୋଇ ତିନିବର୍ଷ ଧରି ସଫଳତାର ସହ କାର୍ଯ୍ୟ ତୁଲାଇଥିଲେ । ଏହି ପଦବୀରୁ ଅବ୍ୟାହତି ପରେ ଦୀର୍ଘ ଚାଳିଶ ବର୍ଷ ପୂର୍ବେ ଛାଡିଥିବା ନିଜ ପୈତୃକ ଗ୍ରାମ କୁଅଁରମାଲକୁ ଫେରିଯାଇଥିଲେ । ସେଠାରେ ଚାଷବାସ କରିବା ସାଙ୍ଗକୁ ଅନ୍ଧାରୀ ଜଙ୍ଗଲର ସଂରକ୍ଷଣ ପାଇଁ ଗ୍ରାମବାସୀ ଲାଗିପଡିଥିଲେ । ୧୯୯୦ ମସିହାରୁ ସରକାରୀ ପ୍ରୋତ୍ସାହନ ଦ୍ୱାରା ଗ୍ରାମ ଗୁଡିକରେ ବନ ସୁରକ୍ଷା ସମିତି ମାନ ଗଠିତ ହୋଇଥିଲେ ମଧ୍ୟ ସମନ୍ୱୟ ଅଭାବରୁ ତାହା ବିଶେଷ ଫଳପ୍ରଦ ହୋଇ ନ ଥିଲା । ଏହି ପୃଷ୍ଠଭୂମିରେ ପ୍ରଫେସର ନାଏକଙ୍କ ପୁଅ ଇଂ ସୁବ୍ରତ ନାଏକ ଅନ୍ଧାରୀ ଜଙ୍ଗଲର ସଂରକ୍ଷଣ ପାଇଁ ବିଶେଷ ଉଦ୍ୟମ କରିଥିଲେ । ତେବେ ୨୦୦୮ ମସିହାରେ ସୁବ୍ରତଙ୍କ ସଡକ ଦୁର୍ଘଟଣାରେ ଅକାଳ ବିୟୋଗ ପରେ ମଧ୍ୟ ପ୍ରଫେସର ନାଏକ ଏହି ସଂରକ୍ଷଣ କାର୍ଯ୍ୟକୁ କାରି ରଖିଥିଲେ । ବୃତ୍ତିରେ ଜଣେ ବିଜ୍ଞାନୀ ଥିବାରୁ ଏହାକୁ ବୈଜ୍ଞାନିକ ଢଙ୍ଗରେ ପରିଚାଳନା କରି ଅଭୁତପୂର୍ବ ସଫଳତା ପାଇଥିଲେ । ଅନ୍ଧାରୀ ଜଙ୍ଗଲର ସଫଳତା ବିଷୟଟିକୁ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଯୁକ୍ତ ଦୁଇ ବିଜ୍ଞାନ ଛାତ୍ରଛାତ୍ରୀଙ୍କ ପାଠ୍ୟପୁସ୍ତକରେ ସ୍ଥାନିତ କରିଛନ୍ତି ।

 ବିରଳ ଜୈବ ମଣ୍ଡଳ ଅନ୍ଧାରୀ ଜଙ୍ଗଲର ସୁରକ୍ଷା ପାଇଁ ସେ ଅଭିଯାନ ଚଳାଇ ସମ୍ପ୍ରତି ସହରମୁହାଁ ହେଉଥିବା ଯୁବପୀଢିଙ୍କ ପାଇଁ ପ୍ରଫେସର ନାଏକ ଜଣେ ଆଦର୍ଶ । ତାଙ୍କର ସମ୍ପୂର୍ଣ୍ଣ କର୍ମମୟ ଜୀବନ ସହରୀ ଚାକଚକ୍ୟ ଭିତରେ ବିତିଥିଲେ ହେଁ ନିଜ ଜନ୍ମମଟି ପ୍ରତି ତାଙ୍କ ଅତୁଟ ମୋହ ଓ ପରିବେଶ ସଂରକ୍ଷଣ ପ୍ରତି ପ୍ରତିବଦ୍ଧତା ତାଙ୍କୁ ତାଙ୍କ ପୈତୃକ ଗ୍ରାମକୁ ଟାଣିନେଇଥିଲା । ପରିଣତ ବୟସରେ ମଧ୍ୟ ଛାତ୍ରଛାତ୍ରୀ ମାନଙ୍କ ସହ ମିଶି ପ୍ରଫେସର ନାଏକ ସାଇକେଲରେ ବୁଲି ପରିବେଶ ସଂରକ୍ଷଣ ପାଇଁ ସଚେତନତା ସୃଷ୍ଟି କରିବା କାର୍ଯ୍ୟରେ ଲାଗିଥିଲେ । ଏଥିପାଇଁ ତାଙ୍କୁ ଓଡିଶା ବିଜ୍ଞାନ ଏକାଡେମୀ ପକ୍ଷରୁ ‘ବିଶିଷ୍ଟ ବୈଜ୍ଞାନିକ ସମ୍ମାନ’, ରାଜ୍ୟ ସରକାରଙ୍କ ପକ୍ଷରୁ ‘ପ୍ରକୃତିମିତ୍ର’ ଓ ‘କୃତୀ କୃଷକ ସମ୍ମାନ’ ସମେତ ବିଭିନ୍ନ ଅନୁଷ୍ଠାନ ପକ୍ଷରୁ ବହୁ ସମ୍ମାନରେ ଭୂଷିତ କରାଯାଇଛି ।