27-Jun-2021

ବଲାଙ୍ଗିର,(ପ୍ରେରଣା ଖବର)- ଓଡିଶା ତଥା ପଶ୍ଚିମଓଡିଶା ପାଇଁ ଗୌରବ ଆଣିଛି ଲୁପ୍ତପ୍ରାୟ ବାଗଡିଖେଳ । ବହୁବର୍ଷ ପୂର୍ବରୁ ଏହି ଖେଳକୁ ପଶ୍ଚିମଓଡିଶାର ଝିଅ/ପୁଅମାନେ ଖେଳିଆସୁଛନ୍ତି । କିନ୍ତୁ ଏବେ ଆଧୁନିକତାର ଛାପରେ ଏହି ଖେଳ ଲୁପ୍ତପ୍ରାୟ ହୋଇଗଲାଣି । ମୋବାଇଲ,ଟିଭିର ପ୍ରଭାବରେ ଏହି ଅଞ୍ଚଳର ପାରଂମ୍ପରିକ ଖେଳକୁଦ ସବୁ ଲୋପ ହେବାକୁ ବସିଥିବା ବେଳେ ବଲାଙ୍ଗୀରର ଜଣେ ବୋହୁ ଏହି ଖେଳକୁ କେନ୍ଦ୍ରସରକାରଙ୍କ ଶିକ୍ଷାବିଭାଗ ପକ୍ଷରୁ ଆୟୋଜିତ  ଟୟକାଥନ କମ୍ପିଟିସନକୁ ନେଇ ବିଜୟୀ ହୋଇଛନ୍ତି । ବଲାଙ୍ଗୀରର ବୋହୁ ତଥା ବଙ୍ଗାଇଗାଓଁରେ ଜବାହର ନବୋଦୟ ବିଦ୍ୟାଳୟରେ କାର୍ଯ୍ୟରତ ଇତିସ୍ମିତା ମିଶ୍ରଙ୍କ ଟିମ ଏହି କମ୍ପଟିସନରେ ଫାଇନାଲ ରାଉଣ୍ଡରେ ବିଜୟୀ ହୋଇଛନ୍ତି । ଚଳିତବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆତ୍ମନିର୍ଭରଭାରତ ପାରଂମ୍ପରିକ ଜ୍ଞାନକୌଶଲ,ଖେଳକୁଦ ପ୍ରକଲ୍ପ ଆହ୍ୱାନ କରାଯାଇଥିଲା । କେନ୍ଦ୍ରସରକାରଙ୍କ ଶିକ୍ଷାବିଭାଗ ପକ୍ଷରୁ ବୈଷୟୀକଶିକ୍ଷା କାଉନସିଲ,ମହିଳା ଓ ଶିଶୁକଲ୍ୟାଣ ବିଭାଗ,ବାଣିଜ୍ୟ ଓ ଶିଲ୍ପବିଭାଗ,ଏମଏସଏମଇ,ଟେକ୍ସଟାଇଲ,  ସୂଚନା ଓ ପ୍ରସାରଣ ବିଭାଗର ସହଯୋଗୀତାରେ ଦେଶର ସବୁଅଞ୍ଚଳରୁ ପ୍ରକଲ୍ପ ଆହ୍ୱାନ କରାଯାଇଥିଲା । ଡିଜିଟାଲ ମୋଡରେ ହୋଇଥିବା ଏହି ପ୍ରତିଯୋଗୀତାରେ ପ୍ରଥମେ ନୋଡାଲସ୍ତରୀୟ,ଫିନାଲେ ଓ ଗ୍ରାଣ୍ଡଫିନାଲେ ପର୍ଯ୍ୟନ୍ତ ଦେଶର ଅନେକ ପ୍ରତିଯୋଗୀଙ୍କ ପ୍ରକଲ୍ପ ଯାଇଥିଲା । ଶେଷରେ ବାଗଡିଖେଳ ପ୍ରକଲ୍ପକୁ ଶ୍ରେଷ୍ଠତାଲିକାରେ ସ୍ଥାନୀତ

କରାଯାଇଛି । ଏକ ବୋର୍ଡରେ ଗାରଟଣାଯାଇ ବାଘ ଓ ଛେଳିକୁ ନେଇ ଛକାପଞ୍ଝାର ଖେଳକୁ ପଶ୍ଚିମାଞ୍ଚଳରେ ବାଗଡିଖେଳ ଖେଳାଯାଏ । ଏବେ ପ୍ରାୟ ଏହା ଲୁପ୍ତହେବାକୁ ବସିଛି । ତେଣୁ ଏହି ପ୍ରକଲ୍ପକୁ ପଠାଇ ଦେଶର ଏକ ସ୍ୱତନ୍ତ୍ର ଖେଳର ପରିଚୟ ଦେବାକୁ ଚେଷ୍ଟା କରାଯାଇଛି ବୋଲି ପ୍ରକଲ୍ପର ମେନଟର ଇତିସ୍ମିତା ମିଶ୍ର କହିଛନ୍ତି । ଆସାମର ବଙ୍ଗାଇଗାଓଁ ଜବାହର ନବୋଦୟ ବିଦ୍ୟାଳୟରୁ ଯାଇଥିବା ଟିମକ୍ରୀଏଟିଭ ମାଷ୍ଟରଙ୍କ ଏହି ପ୍ରକଲ୍ପର ମେନଟର ଟିଜିଟି ଶିକ୍ଷୟୀତ୍ରୀ ଇତିଶ୍ମିତା ମିଶ୍ର ଥିବା ବେଳେ ଲିଡର ଭାବରେ ଛାତ୍ର ଦିବ୍ୟେନ୍ଦୁ ଦାସ ଓ ସଭ୍ୟଭାବରେ ରବିଶଙ୍କର,କଲ୍ୟାଣ ବ୍ରହ୍ମା ରହିଥିଲେ । ବଲାଙ୍ଗୀରର ଜଣେ ଜଣାଶୁଣା ଯୁବକ ତଥା ବଙ୍ଗାଇଗାଓଁରେ ଶିକ୍ଷକତା କରୁଥିବା ମନୋରଂଜନ ପାଢୀଙ୍କ ସ୍ତ୍ରୀ ହେଉଛନ୍ତି ଶିକ୍ଷୟୀତ୍ରୀ ଇତିସ୍ମିତା ।