11-Feb-2021

ସମ୍ବଲପୁର,(ସଂଜୀବ କୁମାର ପାଣିଗ୍ରାହୀ): ଚାଲିଛି ପ୍ରେମ ସପ୍ତାହ ବା ଭ୍ୟାଲେଣ୍ଟାଇନ୍ ଓ୍ୱିକସ୍ । ଏହା ହେଉଛି ପ୍ରେମୀ ଯୁଗଳଙ୍କ ବର୍ଷକର ପ୍ରତୀକ୍ଷାର ସମୟ । ଏହି ସପ୍ତାହରେ ପ୍ରେମକୁ ପାଇବା ପାଇଁ କିଏ ନିବେଦନ କରୁଛି ତ ଆଉ କିଏ ଚକୋଲେଟ କି ଗୋଲାପ ଉପହାର ଦେଇ ସାଥୀଙ୍କୁ ମନେଇବାକୁ ପ୍ରୟାସ କରୁଛି । କିନ୍ତୁ ପ୍ରତାରଣ ପରେ ବି ପ୍ରେମିକକୁ ନିଜ ପାଖରେ ପାଇବା ପାଇଁ ବ୍ୟାକୁଳ ହେଉଛନ୍ତି ଜଣେ ମହିଳା । ମହିଳାଜଣଙ୍କ ୫ ଦିନ ହେବ ଏ ଥାନାରୁ ସେ ଥାନା, ଏ କାର୍ଯ୍ୟାଳୟରୁ ସେ କାର୍ଯ୍ୟାଳୟକୁ ଘୁରି ବୁଲୁଥିବା ଘଟଣା ସମ୍ବଲପୁର ସହରରେ ବେଶ୍‌ ଚର୍ଚ୍ଚାର ବିଷୟ ପାଲଟିଛି ।

ସୂଚନା ଅନୁସାରେ, ଦଳାଇପଡ଼ାର ଜଣେ ଯୁବକଙ୍କ ଦ୍ୱାରା ସଦର ଥାନା ଅଞ୍ଚଳର ଜଣେ ଯୁବତୀ ଦୁଷ୍କର୍ମର ଶିକାର ହୋଇଥିଲେ । ତେବେ ଯୁବକ ଜଣଙ୍କ ବିବାହ ପ୍ରତିଶ୍ରୁତି ଦେବା ପରେ ଥାନାରେ ବି ମାମଲା ହୋଇନଥିଲା । ପରେ ଯୁବକ ଜଣଙ୍କ ପୀଡ଼ିତାଙ୍କୁ ନେଇ ନିଜ ପାଖରେ ରଖିଥିଲେ । ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠେ । ପରେ କୋର୍ଟରେ ଉଭୟ ବିବାହ କରିଥିଲେ  । ଏହା ପରେ ଦୀର୍ଘ ୨ ବର୍ଷ ଧରି ଉଭୟେ ସ୍ୱାମୀ-ସ୍ତ୍ରୀ ଭଳି ରହୁଥିଲେ । କିନ୍ତୁ ଦମ୍ପତିଙ୍କ ମଧ୍ୟରେ ବିବାଦ ଉଗ୍ରରୂପ ଧାରଣ କରିବା ପରେ ଯୁବକ ଜଣଙ୍କ ସ୍ତ୍ରୀକୁ ଘରୁ କାଢ଼ି ଦେଇଥିଲେ । କୌଣସି ଉପାୟ ନପାଇ ଆତ୍ମହତ୍ୟା ଉଦ୍ୟମ କରିଥିଲେ ମହିଳା ।

ତାଙ୍କୁ ଉଦ୍ଧାର ପରେ ସେ ସ୍ୱାମୀ ପାଖକୁ ଫେରିବାକୁ ଜିଦ୍‌ ଧରି ବସି ରହିଛନ୍ତି । କିନ୍ତୁ ସ୍ୱାମୀ ତାଙ୍କୁ ରଖିବାକୁ ନାରାଜ। ପୋଲିସ୍‌ କହିବା ପରେ ବି ସେ ସ୍ୱାମୀ ବିରୋଧରେ ଏତଲା ଦେଉନାହାଁନ୍ତି । କେବଳ ସ୍ୱାମୀ ପାଖକୁ ଫେରିଯିବାକୁ ଜିଦ୍‌ ଧରି ଦିନ ଦିନ ଧରି ଅଖିଆ ଅପିଆ ପଡ଼ିରହିଛନ୍ତି । ଶୁଣିବାକୁ କାହାଣୀଟି କୌଣସି ଚଳଚ୍ଚିତ୍ର ଭଳି ଲାଗୁଥିଲେ ମଧ୍ୟ ମାତ୍ର ସମ୍ବଲପୁର ସହରରେ ଘଟିଥିବା ଏହି ଘଟଣା ଭାଲେଣ୍ଟାଇନ୍‌ ସପ୍ତାହର ଚର୍ଚ୍ଚିତ ପ୍ରସଙ୍ଗ ପାଲଟିଛି ।