29-Jun-2026

ସୁବର୍ଣ୍ଣପୁର, (ମନୋରଞ୍ଜନ ତ୍ରିପାଠୀ )
 ସୋନପୁର ସହରର ମଝିପଡ଼ା ରଥଖଳା ଠାରେ ବସବାସ କରୁଥିବା ମାଗୁଣୀ ସାହୁ ଙ୍କ ଘରକୁ ଆଜି ପହଞ୍ଚିଲେ ଜିଲ୍ଲାପାଳ ଡ଼. ନୃପରାଜ ସାହୁ। ସୂଚନା ଯୋଗ୍ୟ ଯେ ସୁଦୂର ବାଙ୍ଗାଲୋର ଠାରେ ଚିକିତ୍ସିତ ହୋଇ ହାର୍ଟ ଅପରେସନର ସଫଳତା ପରେ ଘରକୁ ଫେରିଛି ତାଙ୍କ ଛଅ ବର୍ଷର ନାତି ସ୍ୱପ୍ନେଶ୍ୱର । ଜିଲ୍ଲାପାଳ ତାଙ୍କ ଘରେ ପହଞ୍ଚିବା ସହ ସ୍ଵାସ୍ଥ୍ୟ ଅବସ୍ଥା ବୁଝିଛନ୍ତି  ଓ ପରିବାର ସହ ସମସ୍ତ ଘଟଣାର ଆଲୋଚନା କରିଛନ୍ତି l ପ୍ରକାଶ ଥାଉ କି ଯେ ଅବସର ପ୍ରାପ୍ତ ସମବାୟ ବ୍ୟାଙ୍କ ସୋନପୁର ମ୍ୟାନେଜର ଶ୍ରୀ ମାଗୁଣି ସାହୁଙ୍କ ନାତି ସ୍ୱପ୍ନେଶ୍ୱର (୬) ବର୍ଷ ର ହାର୍ଟ ଅପରେସନ ପାଇଁ ବିଗତ ତିନି ମାସ ପୁର୍ବରୁ ଜିଲ୍ଲାପାଳଙ୍କୁ ସାକ୍ଷାତ କରି ଗୁହାରି କରିଥିଲେ ଏ ପରିବାର । ପରେ କିଛି ସ୍ୱେଚ୍ଛାସେବୀ ଓ ଜିଲ୍ଲା ସ୍ଵାସ୍ଥ୍ୟ ବିଭାଗର କୋଡ଼ିନେଶନ ଓ ଜିଲ୍ଲାପାଳଙ୍କ ହସ୍ତକ୍ଷେପ ପରେ ସ୍ୱପ୍ନେଶ୍ୱର ର ଚିକିତ୍ସା ପାଇଁ ପ୍ରସ୍ତୁତି ଆରମ୍ଭ ହୋଇଥିଲା । ଭୁବନେଶ୍ୱର ଓ ସୁଦୂର ବାଙ୍ଗାଲୋର ଠାରେ ଚିକିତ୍ସା ବେଳେ ଡାକ୍ତର ମାନଙ୍କ ସହ ଓ ପରିବାର ସହ ଅନେକ ଥର ଯୋଗାଯୋଗ ରେ ରହି ଉନ୍ନତ ଧରଣର ଚିକିତ୍ସା ପାଇଁ ଡାକ୍ତରଙ୍କୁ ଅନୁରୋଧ କରିଥିଲେ ଜିଲ୍ଲାପାଳ ଡ. ସାହୁ । ଅପରେସନ ସଫଳତା ପରେ ଖୁସି ହୋଇ ପ୍ରଥମେ ମା ସୁରେଶ୍ଵରୀଙ୍କୁ କୃତଜ୍ଞତା ଜ୍ଞାପନ କରିଛନ୍ତି ଏ ପରିବାର । ଚିକିତ୍ସା ପ୍ରସ୍ତୁତିରେ ଏହି ପରିବାରକୁ ପ୍ରେରଣା ଯୋଗାଇଥିବା ଓ ଅପରେସନ୍ ବେଳେ ବାଙ୍ଗାଲୋର ମେଡିକାଲ୍ ଓ ଡାକ୍ତରଙ୍କ ସହ ଯୋଗାଯୋଗରେ ଥିବା ଜିଲ୍ଲାପାଳ ଡ଼. ନୃପରାଜ ସାହୁ ଙ୍କୁ ହାର୍ଦ୍ଧିକ କୃତଜ୍ଞତା ଜ୍ଞାପନ କରି ଆଜି ଭାବ ବିହ୍ୱଳ ହୋଇ ଯାଇଥିଲେ ଏହି ପରିବାର । ଏବଂ ମହତ୍ କାର୍ଯ୍ଯ ରେ ଆରଂଭ ରୁ ସଂଯୋଜନା କରିଥିବା ବରିଷ୍ଠ ନାଗରିକ ଜ୍ୟୋତି ରଞ୍ଜନ ପଟ୍ଟନାୟକ, ପ୍ରଦୀପ ପୁରୋହିତ, ଜିଲ୍ଲା ସ୍ବାସ୍ଥ୍ୟ ପରିଦର୍ଶକ ପ୍ରମୋଦ କୁମାର ସାହୁ, ସାମ୍ୱାଦିକ ମନୋରଞ୍ଜନ ତ୍ରିପାଠି, ମହାଦେବ ମଲ୍ଲିକ ଓ ଜିଲ୍ଲା ସ୍ବାସ୍ଥ୍ୟ ବିଭାଗକୁ ମଧ୍ୟ ଏହି ପରିବାର ଆଜି କୃତଜ୍ଞତା ଜଣାଇଥିଲେ । ଜିଲ୍ଲାପାଳଙ୍କ ଏହି ଉଦ୍ୟମ, ବଦାନ୍ୟତା ଓ ସଫଳତା ପରେ ଘରକୁ ପରିଦର୍ଶନ ବିଷୟ ସହର ତଥା ଜିଲ୍ଲାରେ ଖୁବ୍ ପ୍ରଶଂଶା କରାଯାଇଛି । ଏହି ଗସ୍ତ ସମୟରେ କର୍ମଯୋଗୀ ଗୋବିନ୍ଦ ମହାରଣା, ବରିଷ୍ଠ ନାଗରିକ ଜ୍ଯୋତି ରଞ୍ଜନ ପଟ୍ଟନାୟକ, ଯୁବ ସଂଗଠକ ତଥା ଯୁବ ନେତା ପୀୟୂଷ ପଣ୍ଡା ଙ୍କ ସମେତ କିଛି ସ୍ୱେଚ୍ଛାସେବୀ ଓ ସାମ୍ୱାଦିକ ଉପସ୍ଥିତ ଥିଲେ l