24-Jun-2026

ବଲାଙ୍ଗୀର(ପ୍ରେରଣା ଖବର):  ଜିଲ୍ଲା ଭିତ୍ତିକ ଅନୁଷ୍ଠାନ ଲେଖକ ପରିଷଦ, ବଲାଙ୍ଗିରର ନେତୃତ୍ୱ ଓ ଚଉଷଠୀ ଯୋଗିନୀ ସାହିତ୍ୟ କଳା ପରିଷଦର ମିଳିତ ଆନୁକୂଲ୍ୟରେ ବଲାଙ୍ଗିର ଜିଲ୍ଲା ଲେଖକ ପରିଷଦର ମହାସମାବେଶ  ବଙ୍ଗୋମୁଣ୍ଡା ବ୍ଲକ ଅନ୍ତର୍ଗତ ପଞ୍ଚାୟତ ସମିତି ଡିଗ୍ରୀ କଲେଜ ପରିସରରେ ଅନୁଷ୍ଠିତ ହୋଇଯାଇଛି । କାର୍ଯ୍ୟକ୍ରମର ପ୍ରାରମ୍ଭରେ ମା’ ଦ୍ୱାରସେନୀ ଓ ସରସ୍ୱତୀଙ୍କ ଫଟୋଚିତ୍ରରେ ପୂଜାର୍ଚ୍ଚନା ତଥା କବି ସୁଶାନ୍ତ ବାଗ ଙ୍କ ଦ୍ଵାରା ମାଙ୍ଗଳିକ ଗାନ କରାଯିବା ପରେ ସଭାକାର୍ଯ୍ୟ ଆରମ୍ଭ ହୋଇଥିଲା । ଜିଲ୍ଲା ଲେଖକ ପରିଷଦ ର ସଭାପତି ଡଃ.ଜୟକୁମାର ଆଚାର୍ଯ୍ୟ ସଭାପତିତ୍ବ କରିଥିବା ଏହି ସଭାରେ କାର୍ଯ୍ୟନିର୍ବାହୀ ସଦସ୍ୟ ତଥା ଚଉଷଠୀ ଯୋଗିନୀ ସାହିତ୍ୟ କଳା ପରିଷଦର ସଭାପତି ଡଃ ନାରାୟଣ ମିଶ୍ର ଆବାହକ ଭାବରେ ମଞ୍ଚାସୀନ ଥିଲେ । ମୁଖ୍ୟଅତିଥି ଭାବରେ ରାଜ-ଖଡ଼ିଆଳର ପ୍ରବିଣ ସାହିତ୍ୟ ସଂଗଠକ ଓ ଶିକ୍ଷାବିତ ଡ଼ଃ. ଲୋହିତାକ୍ଷ ଯୋଶୀ, ସମ୍ମାନିତ ଅତିଥି ଭାବରେ 
ଲେଖକ ପରିଷଦର ଉପଦେଷ୍ଟା ସନାତନ ଠାକୁର, ଉପ-ସଭାପତି କବି ଭିକାରୀ ଚରଣ ମିଶ୍ର, କବି କ୍ଷିରୋଦ ଷଡ଼ଙ୍ଗୀ ଙ୍କ ସହିତ ବକ୍ତା ଭାବରେ ଅଧ୍ୟାପକ ଓ କବି ଡଃ. ସଞ୍ଜୟ ମିଶ୍ର, ଅଧ୍ୟାପକ ଦିଲୀପ କୁମାର ପଶାୟତ ଙ୍କ ସହିତ ବଙ୍ଗୋମୁଣ୍ଡା ବ୍ଲକ ସାମ୍ବାଦିକ ସଂଘର ସଭାପତି ରଶ୍ମି ରଞ୍ଜନ ପୁଟେଲ, ବିଶିଷ୍ଟ ସଙ୍ଗୀତଜ୍ଞ ରେଣୁରଞ୍ଜନ ବାଗ ପ୍ରମୁଖ ଅତିଥି ଭାବରେ ମଞ୍ଚାସୀନ ଥିଲେ । "କୋଶଲି ସାହିତ୍ୟ ନେ ତତ୍ତ୍ବ ଆର୍ ଦର୍ଶନ" ଶିର୍ଷକ ଆଲୋଚନାରେ ଭାଗନେଇ  ଆଧୁନିକତା କୁ ବ୍ୟାପକ ସ୍ତରରେ ଗ୍ରହଣ କରିବାର ଆବଶ୍ୟକତା ରହିଛି ବୋଲି ବକ୍ତା ଓ ଅତିଥି ମାନେ ମତ ପୋଷଣ କରିଥିଲେ । 
କାର୍ଯ୍ୟକ୍ରମକୁ କବି ଜ୍ୟୋତି ପ୍ରକାଶ ଗଡ଼ତ୍ୟା ସଂଯୋଜନା କରିଥିଲେ ।
ଲେଖକ ପରିଷଦ ର ଅନ୍ୟତମ ଉପଦେଷ୍ଟା ନାଟ୍ୟକାର ନୀଳମଣି ସାହୁ ଙ୍କ ସଭାପତିତ୍ବରେ ଅନୁଷ୍ଠିତ ଦ୍ଵିତୀୟ ଅଧିବେଶନ ରେ ଅଧ୍ୟାପିକା ମିନତୀ ରଥ ଓ ବଙ୍ଗୋମୁଣ୍ଡା ବନାଞ୍ଚଳ ଅଧିକାରୀ ପଦ୍ମନାଭ କୁମ୍ଭାରଙ୍କୁ ମାନପତ୍ର ଓ ଉପଢୌକନ ଦେଇ ସମ୍ବର୍ଦ୍ଧିତ କରାଯାଇଥିଲା ।  ତଦ୍‌‌ଅନ୍ତେ ଅନୁଷ୍ଠିତ କବିତା ଆସରରେ କବି ସୁରେଶ ଭୋଇ, ଶ୍ରୀପାଳ ପଣ୍ଡା, ମଧୁସୂଦନ ଦାସ, ସତ୍ୟନାରାୟଣ ମିଶ୍ର ପ୍ରମୁଖଙ୍କ ସଂଯୋଜନାରେ ଏକ ମନୋଜ୍ଞ କବିତା ଆସର ଅନୁଷ୍ଠିତ ହୋଇଥିଲା । ଏଥିରେ କବି ଡଃ କୌତୁକ ପନ୍ଦର, ଡଃ. ଜଗନ୍ନାଥ ସାହୁ, ଡ଼ଃ ବ୍ରଜ ମୋହନ ମେହେର,  ଲକ୍ଷ୍ମୀକାନ୍ତ ବିଭାର, ବୃନ୍ଦାବନ କୁମ୍ଭାର, ଗଣେଶ ବାରିକ୍, ରାଜିବ ସଗରିଆ, କବି ସୁଶାନ୍ତ ବାଗ ଙ୍କ ସମେତ ଜିଲ୍ଲା ଓ ଜିଲ୍ଲା ବାହାରୁ ଆସିଥିବା ଅନେକ କବି କବୟିତ୍ରୀ ସାମିଲ ହୋଇ କବିତା ପଠନ କରିଥିଲେ ।