17-May-2024

ବଲାଙ୍ଗିର,ବଲାଙ୍ଗୀର ଜିଲ୍ଲା ଟିଟିଲାଗଡ ନିର୍ବାଚନମଣ୍ଡଳିର ଭାଜପାପ୍ରାର୍ଥି ନବୀନ ଜୈନ ଓ ତାଙ୍କର ସମର୍ଥକ ଏକ କାର୍ଯ୍ୟକ୍ରମରୁ ଫେରୁଥିବା ବେଳେ ଇଁତଳା ଥାନା ଡୁଙ୍ଗୁରିପାଲି ପଞ୍ଚାୟତର ତେଣ୍ଡିପାଲି ନିକଟରେ ବିଜେଡିର ଗୁଣ୍ଡାମାନେ ଆତର୍କିତ ଆକ୍ରମଣ କରିଥିବା ଅଭିଯୋଗ ହୋଇଛି । ତେବେ ଡ୍ରାଇଭରର ଉପସ୍ଥିତ ବୁଦ୍ଧି ଯୋଗୁଁ ଏହି ଆକ୍ରମଣରୁ ବିଜେପି ପ୍ରାର୍ଥି ନବୀନ ଜୈନ ଅଲ୍ପକେ ରକ୍ଷା ପାଇଛନ୍ତି । ତାଙ୍କୁ ନିକଟସ୍ଥ ଗ୍ରାମର ଜଣକ ଘରେ ନେଇ ସୁରକ୍ଷିତ କରିଛାଡିଦେଇଥିଲେ ଡ୍ରାଇଭର । କିନ୍ତୁ ନବୀନଙ୍କ ସମର୍ଥକ ଡୋଳାମଣୀ ବସ୍ତିଆ ଓ ଲବେନ୍ଦ୍ର ବେହେରାଙ୍କ ଦୁବୃତ୍ତମାନେ ମରଣାନ୍ତକ ଆକ୍ରମଣ କରିବା ସହିତ ତାଙ୍କୁ ଅପହରଣ କରିନେଇଥିବା ସଇଁତଳା ଥାନାରେ ଅଭିଯୋଗ ହୋଇଥିଲା । ଏହି ଆକ୍ରମଣ ଘଟଣା ଏକ ରାଜନୈତିକ ହିଂସାକାଣ୍ଡ ଓ ତାଙ୍କୁ ଶାସକଦଳ ହତ୍ୟାଉଦ୍ୟମ କରିଥିବା ବିଷୟରେ ଭାଜପା ପ୍ରାର୍ଥି ନବୀନ ଜୈନ ନିର୍ବାଚନକମିଶନ ଓ ବଲାଙ୍ଗୀର ଏସପିଙ୍କ ପାଖରେ ଅଭିଯୋଗ କରିଥିବା କହିଛନ୍ତି । ଗତକାଲି ରାତିରେ ଘଟଣା ପରେ ସଇଁତଳା ପୋଲିସ ପହଞ୍ଚି ନବୀନ ଜୈନଙ୍କୁ ଉଦ୍ଧାର କରିଥିବା ବେଳେ ରାସ୍ତା କଡରୁ ରକ୍ତଜୁଡୁବୁଡୁ ଅବସ୍ଥାରେ ଡୋଳାମଣୀ ବସ୍ତିଆ ଓ ଲବେନ୍ଦ୍ର ବେହେରାଙ୍କୁ ଉଦ୍ଧାର କରିଥିବା ଜଣାଯାଇଛି । ଉଭୟ ଆହତଙ୍କୁ ସଇଁତଳା ହସପିଟାଲରେ ଭର୍ତ୍ତି କରି ଚିକିତ୍ସା କରାଯାଉଛି । ଏପଟେ ଘଟଣାର ଖବରପାଇ ଏସପି ଋଷିକେଶ ଖିଲାରୀଙ୍କ ନିର୍ଦ୍ଦେଶରେ ଟିଟିଲାଗଡ ଏସଡିପିଓ ଅଙ୍କିତା କୁମ୍ଭାର ସଦଳବଳେ ପହଞ୍ଚି ତେଣ୍ଡିପାଲିରୁ ନବୀନ ଜୈନଙ୍କୁ ସୁରକ୍ଷିତ ଭାବରେ ଉଦ୍ଧାର କରିଥିଲେ । ଘଟଣା ବିଷୟରେ ଖବରପାଇ ଶହଶହ ପୁରୁଷ ମହିଳା ଓ ଭାଜପା କର୍ମିମାନେ ରାତିରେ ସଇଁତଳା ଥାନାକୁ ଘେରାଉ କରିଥିଲେ । ଆହତ ହୋଇଥିବା ବିଜେପିକର୍ମି ଡୋଳାମଣୀ ବସ୍ତିଆଙ୍କ ଅଭିଯୋଗ ଆଧାରରେ ସଇଁତଳା ଥାନାରେ ମାମଲା ନମ୍ବର୨୨୨/୨୪ଦଫା ୩୨୩ ଓ ଅର୍ମସ ଏକ୍ଟରେ ରୁଜୁ କରାଯାଇ ସଇଁତଳାର ମହେନ୍ଦ୍ର ଭୋଇ,ଅମୃତ ଦଣ୍ଡସେନା,ଭୀମ ଦୋରା,କୃଷ୍ଣ ଗହିର ଓ ଅପନା ପଟେଲଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି । ସେପଟେ ମହେନ୍ଦ୍ର ଭୋଇଙ୍କ ଅଭିଯୋଗ ଆଧାରରେ ବିଜେପି ବିଧାୟକ ପ୍ରାର୍ଥି ନବୀନ ଜୈନ ଓ ତାଙ୍କ ସମର୍ଥକମାନେ ତାଙ୍କୁ ଜାତିଗତ ଆକ୍ଷେପ କରି ଗାଳିଗୁଲଜ କରିଥିବା ନେଇ ସଇଁତଳା ଥାନାରେ ମାମଲା ନମ୍ବର ୨୨୩/୨୪ ରୁଜୁ କରାଯାଇ ତଦନ୍ତ ଚାଲିଥିବା ସଇଁତଳା ଆଇଆଇସି ସୁଶାନ୍ତ ପଧାନ କହିଛନ୍ତି । ଗତକାଲି ଘଟଣାପରେ ଆଜି ପର୍ଯ୍ୟନ୍ତ ସଇଁତଳା ଅଞ୍ଚଳରେ ଉତ୍ତେଜନା ପ୍ରକାଶ ପାଉଛି । ପୋଲିସ ସ୍ଥିତିର ଅନୁଧ୍ୟାନ କରୁଛି । ଶାସକ ବିଜେଡିଦଳ ନିଶ୍ଚିତ ପରାଜୟ ଭୟରେ ଏବେ ହିଂସାତ୍ମକ ପନ୍ଥା ଆପଣେଇଛି ବୋଲି ବିଜେପିପ୍ରାର୍ଥି ନବୀନ ଜୈନ ଅଭିଯୋଗ କରିଛନ୍ତି । ସେପଟେ ବିଜେଡିର କୌଣସି ପ୍ରତିକ୍ରୀୟା ମିଳିପାରିନାହିଁ ।