17-May-2024

ବଲାଙ୍ଗିର(ଚିତ୍ରସେନ ବେହେରା): ବଲାଙ୍ଗୀର ସଦର ରାଜନୀତି ସରଗରମ ଧରୁଛି। ଗତ କିଛିଦିନ ତଳେ କଂଗ୍ରେସ ଦଳର ଦଳୀୟ ପଦାଧିକାରୀ ମାନେ ଏକ ସର୍ଭେରିପୋର୍ଟ ସୋସିଆଲ ମିଡିଆରେ ଛାଡିଥିଲେ। ସେତେବେଳ ସେହି ଚିଠି ଏକ ଜାଲ ଚିଠି ଓ କଂଗ୍ରେସ ଭୋଟରଙ୍କୁ ବିଭ୍ରାନ୍ତ କରିବାକୁ ଉଦ୍ୟମ କରୁଛି ବୋଲି ବିଜେଡି ଦଳ ପକ୍ଷରୁ କୁହାଯାଇଥିଲା l କିନ୍ତୁ ଗତକାଲି ବିଜେଡିର ଯୁବନେତା ଅର୍କେଶ ନାରାୟଣ ସିଂଦେଓଙ୍କ ଫେସବୁକରେ କଂଗ୍ରେସର ରାଜ୍ୟ ପ୍ରଭାରୀ ଡ.ଅଜୟ କୁମାରଙ୍କ ଏକ ଚିଠି ଘୁରିବୁଲୁଥିଲା। ସେଥିରେ ଅଜୟ କୁମାର କଂଗ୍ରେସ ଦଳର ରାଷ୍ଟ୍ରୀୟ ସଭାପତି ମଲିକାର୍ଜୁନ ଖାଡଗେଙ୍କୁ ଚିଠିକରି ବଲାଙ୍ଗୀରରେ ଏକ ବଦନାମ ପରିବାରରୁ ଜଣେ ଦୁର୍ବଳ ପ୍ରାର୍ଥି ଦିଆଯାଇଥିବାରୁ କଂଗ୍ରେସର ସ୍ଥିତି ବହୁତ ଖରାପ ଅଛି ବୋଲି ଲେଖାଯାଇଥିବା ଦେଖାଯାଇଥିଲା l ପ୍ରାର୍ଥି ହୋଇଥିବା  ବିଧାୟକ ନରସିଂହ ମିଶ୍ରଙ୍କ ପୁଅ ସମରେନ୍ଦ୍ର ଜଣେ ଦୁର୍ବଳ ପ୍ରାର୍ଥି ଓ ତାଙ୍କ ପରିବାର ବିରୁଦ୍ଧରେ ଜମିହଡ଼ପ, ଗୁଣ୍ଡାଗର୍ଦ୍ଦି କରୁଥିବା ଅଭିଯୋଗ ରହିଛି । ସେଥିପାଇଁ ଭୋଟର ବିମୁଖ ରହିଥିବା ଚିଠିରେ ଉଲ୍ଲେଖ ରହିଛି। ଅବଶ୍ୟ ଏହି ଚିଠିଟି ଏକ ନକଲି ଚିଠି ଓ ତାଙ୍କ ଅଫିସିଆଲ ପେଡ ସହ ଦସ୍ତଖତକୁ ଅର୍କେଶ ଜାଲିଆତି କରିଥିବା ବିଷୟରେ ନିଜେ ଡ.ଅଜୟ କୁମାର ତାଙ୍କ ସୋସିଆଲ ମିଡିଆ ହେଣ୍ଡଲରେ ଛାଡିଥିଲେ । ଏହି ଚିଠିକୁ ନେଇ ଆଜି ବଲାଙ୍ଗୀର କଂଗ୍ରେସ ବିଧାୟକ ପ୍ରାର୍ଥି ସମରେନ୍ଦ୍ର ମିଶ୍ର ତାଙ୍କ କାର୍ଯ୍ୟକର୍ତ୍ତାଙ୍କୁ ଧରି ସାମ୍ବାଦିକ ସମ୍ବିଳନୀ କରିଛନ୍ତି । ସ୍ଥାନୀୟ ସାମ୍ବାଦିକ ଭବନଠାରେ ଆୟୋଜିତ ଏହି ସାମ୍ବାଦିକ ସମ୍ବିଳନୀରେ ସମରେନ୍ଦ୍ର ଅଭିଯୋଗ କରିଛନ୍ତି ଯେ, ବଲାଙ୍ଗୀର ରାଜପରିବାର ସଂପୂର୍ଣ୍ଣ ମିଛୁଆ । ସେମାନେ ନିର୍ବାଚନ ବେଳେ ବହୁତଗୁଡିଏ ମିଥ୍ୟାପ୍ରତିଶୃତି ଦେଇଥାନ୍ତି । ଏବେ ନିର୍ବାଚନରେ ହାରିବା ଭୟରେ ସେମାନେ କଂଗ୍ରେସଦଳର ଜଣେ ଜାତୀୟସ୍ତରର ନେତାଙ୍କ ପେଡ ଓ ଦସ୍ତଖତକୁ ଜାଲିଆତି କରି ସୋସିଆଲ ମିଡିଆରେ ଛାଡିଛନ୍ତି । ସେଥିରେ ଆମ ପରିବାର ବିରୁଦ୍ଧରେ ନିଜେ ଲେଖି କଂଗ୍ରେସଦଳର ପେଡରେ  ଅପଲୋଡ କରିଛନ୍ତି । ସେଥିପାଇଁ ଅର୍କେଶଙ୍କ ବିରୁଦ୍ଧରେ ଡ.ଅଜୟ କୁମାର ଭୁବନେଶ୍ୱର ସାଇବରସେଲ କ୍ରାଇମବ୍ରାଞ୍ଚରେ ଏକ ଏତଲା ଦେଇଛନ୍ତି। ଏହା ସହିତ ନିର୍ବାଚନକମିଶନଙ୍କୁ ମଧ୍ୟ ଅବଗତ କରାଯାଇଛି । ପୋଲିସ ତୁରନ୍ତ ଏହି ଘଟଣାର ତଦନ୍ତ କରି ଅର୍କେଶଙ୍କ ବିରୁଦ୍ଧରେ ୪୨୦ ମାମଲା ରୁଜୁ କରି ଅର୍କେଶଙ୍କୁ ଗିରଫ କରିବାକୁ ସମରେନ୍ଦ୍ର ଦାବି କରିଛନ୍ତି । ସେହିପରି ଗତକାଲି ଦେଓଗାଁ ବ୍ଲକ ବରକାନୀ ଗାଁରେ ଜଣେ ବିଜେଡି କର୍ମିଙ୍କ ଘରୁ ବିପୁଳ ପରିମାଣର ମଦପାଉଚ ଜବତ ହୋଇଥିଲା । ନିର୍ବାଚନରେ ଭୋଟରଙ୍କୁ ପ୍ରଭାବିତ କରିବାକୁ ଏହି ମଦ ଶାସକଦଳ ରଖାଇଥିଲା ଓ ସେହି ଗାଁର ଲୋକ ଇଭିଜିଲରେ ଏ ବିଷୟରେ ନିର୍ବାଚନକମିଶନଙ୍କୁ ଅବଗତ କଲାପରେ ଅବକାରୀ ବିଭାଗ ଚଢାଉ କରି ସେହି ମଦକୁ ଜବତ କରିଥିଲା । କିନ୍ତୁ ପୋଲିସ ସେଠାରେ କୌଣସି କାର୍ଯ୍ୟାନୁଷ୍ଠାନ ନନେବାରୁ ଅଭିଯୁକ୍ତମାନେ ଅଭିଯୋଗ କରିଥିବା ଗ୍ରାମବାସୀଙ୍କୁ ଜୀବନରେ ମାରିଦେବାର ଧମକ ଦେଉଥିବା ଅଭିଯୋଗ ହେଉଛି । ଠିକ ସେହିପରି ଗତ କିଛିଦିନ ତଳେ ସଦରବ୍ଲକର କୁଟୁମଡୋଲା ଗାଁରେ ହୋଇଥିବା ଏକ ବୈଠକରେ ଜଣେ ଦଳତିବର୍ଗର ଲୋକକୁ ସଦରବ୍ଲକର ଅଧ୍ୟକ୍ଷ ଗୁଲାବ ବାଗ ଜାତିଆଣ ଆକ୍ଷେପ କରି ମାଡମାରିଥିବା ଅଭିଯୋଗ ହୋଇଥିଲା । କିନ୍ତୁ ସେହି ମାମଲାରେ ମଧ୍ୟ ପୋଲିସ କିଛି ପଦକ୍ଷେପ ନେଉନାହିଁ । ବଲାଙ୍ଗୀର ପୋଲିସ ଲୋକଙ୍କୁ ନ୍ୟାୟଦେବାରେ ବିଫଳ ହୋଇଥିବା ସମରେନ୍ଦ୍ର ଅଭିଯୋଗ କରିଛନ୍ତି । କେବଳ ସେତିକି ନୁହେଁ ଅର୍କେଶଙ୍କ ପତ୍ନୀ ଅଦ୍ରୀଜା ପୋଲିସ ପାଖରୁ ନ୍ୟାୟ ନପାଇ ହଇରାଣ ହେଉଥିବା ସମରେନ୍ଦ୍ର ସାମ୍ବାଦିକ ସମ୍ବିଳନୀରେ ଅଭିଯୋଗ ଉଠାଇଛନ୍ତି । ତେବେ ସମରେନ୍ଦ୍ରଙ୍କୁ ତାଙ୍କ ପରିବାର ମଧ୍ୟରୁ ଜଣେ ହୋଟେଲମାଲିକ ତାଙ୍କ ହୋଟେଲ ପାଖରେ ଥିବା ଆଉ ଜଣକର ଜମିକୁ ହଡପ କରିବାକୁ ଉକ୍ତ ଜମିମାଲିକକୁ ଧମକ ଦେବା ସହିତ ତାଙ୍କନାମରେ ମିଥ୍ୟା ଏଟ୍ରୋସିଟି କେସ କରି ଫସାଇ ଦେଇଥିବା ଅଭିଯୋ୍‌ଗ ବିଷୟରେ ପଚାରିବାରୁ ସେ ଚିହିଁକି ଉଠି ତାର ଉତ୍ତରଦେବା ବଦଳରେ ଅଦ୍ରୀଜାକୁ ନ୍ୟାୟ ବିଷୟରେ କହିଥିଲେ । ଏହି ସାମ୍ବାଦିକ ସମ୍ବିଳନୀରେ ଅନ୍ୟମାନଙ୍କ ମଧ୍ୟରେ ଓପିସିସି ପ୍ରବକ୍ତା ଅଜିତ ପାଲ, ଜିଲ୍ଲା ମିଡିଆସେଲର ଅଜୟ ବାଲି, ଅର୍ଜୁନ ମୁଗ୍ରୀ,ନାସିର ଖାନ ପ୍ରମୁଖ ମଞ୍ଚାସୀନ ଥିଲେ ।