20-Dec-2020

ନୂଆଦିଲ୍ଲୀ,(ପ୍ରେରଣା ଖବର ବ୍ୟୁରୋ) : ଯକ୍ଷ୍ମା ରୋଗ ଏକ ଗୁରୁତର ରୋଗ ।  ଦେଶରେ ପାଖାପାଖି ୨୮ ଲକ୍ଷ ଲୋକ ଟିବି ବା ଯକ୍ଷ୍ମା ରୋଗରେ ଆକ୍ରାନ୍ତ ହୋଇଥିବା ବେଳେ ପ୍ରାୟ ୪.୨ ଲକ୍ଷ ରୋଗୀଙ୍କର ଏଥିରେ ମୃତ୍ୟୁ ହୋଇଛି । ଯଦି ଆଦିବାସୀଙ୍କୁ ନଜରକୁ ନେବା ତେବେ ଏମାନଙ୍କ ମଧ୍ୟରେ ଅଣ- ଆଦିବାସୀଙ୍କ ଅପେକ୍ଷା ଯକ୍ଷ୍ମା ରୋଗୀ ତିନି ଗୁଣା ଅଧିକ ।ଏହି ସଂଖ୍ୟା ଯଥେଷ୍ଟ ଅଧିକ ହୋଇଥିବାରୁ ସରକାର ଏହି ରୋଗରେ ବିପଦରେ ଥିବା ଆଦିବାସୀଙ୍କୁ ଏଥିରୁ ମୁକ୍ତ କରିବା ପାଇଁ ଚେଷ୍ଟା କରୁଛନ୍ତି।  ଏଥିପାଇଁ ଜନଜାତି ମନ୍ତ୍ରଣାଳୟ ଏବଂ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ମଧ୍ୟରେ ଏକ ଚୁକ୍ତି ନାମା ସ୍ୱାକ୍ଷରିତ ହୋଇଛି । ଏଥିସହ ଆଦିବାସୀଙ୍କ ଠାରୁ ଟିବି ରୋଗକୁ ସଂପୂର୍ଣ୍ଣ ଶେଷ କରିବା ପାଇଁ ଯୋଜନା କରାଯାଉଛି । ଏଥିରେ ରୋଗୀକୁ ପୁଷ୍ଟିକର ଖାଦ୍ୟ ପାଇଁ ମାସକୁ ୫୦୦ ଟଙ୍କା ଆର୍ଥିକ ସହାୟତା ଦିଆଯିବା ସହ  ଚିକିତ୍ସା ଓ ଅନ୍ୟାନ୍ୟ ସୁବିଧା ଉପଲବ୍ଧ ରହିବ ।  ୧୭୭ ଉଚ୍ଚ ପ୍ରାଧାନ୍ୟ ଜିଲ୍ଲା ଗୁଡିକୁ ବିଶେଷ ଧ୍ୟାନ ଦିଆଯିବ । ଏହି ଜିଲ୍ଲା ଗୁଡ଼ିକରେ ଆଦିବାସୀଙ୍କ ସଂଖ୍ୟା ୫୦ ପ୍ରତିଶତରୁ ଅଧିକ । 

ଆଦିବାସୀ ମାନଙ୍କୁ ଯକ୍ଷ୍ମା ରୋଗରୁ ମୁକ୍ତ କରିବାର କାର୍ଯ୍ୟ  ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଅଧିନରେ ଯକ୍ଷ୍ମା ବିଲୋପ କାର୍ଯ୍ୟକ୍ରମ ଅଧୀନରେ କରାଯିବ । ଆଦିବାସୀ କଲ୍ୟାଣ ମନ୍ତ୍ରୀ ଅର୍ଜୁନ ମୁଣ୍ଡା କହିଛନ୍ତି ଯେ, ଅଧିକାଂଶ ମନ୍ତ୍ରଣାଳୟ ଆଦିବାସୀଙ୍କ କଲ୍ୟାଣ ପାଇଁ ବଜେଟର କିଛି ଅଂଶ ରହିଛି । ବର୍ତ୍ତମାନ ଆମେ ମନ୍ତ୍ରଣାଳୟ ସହିତ ଆଦିବାସୀଙ୍କ ସ୍ୱାର୍ଥରେ ଏହି ଅଂଶକୁ ଠିକ୍ ଭବେ ବ୍ୟବହାର କରିବା ପାଇଁ କାର୍ଯ୍ୟ କରୁଛୁ ।  ଏଥିପାଇଁ କେତେକ ମନ୍ତ୍ରଣାଳୟ ସହିତ ଚୁକ୍ତି ମଧ୍ୟ ହୋଇଛି । 

ଜାତୀୟ ଯକ୍ଷ୍ମା ବିଲୋପ ଯୋଜନା ଅଧୀନରେ ଏକ ଆଦିବାସୀ କାର୍ଯ୍ୟ ଯୋଜନା ପ୍ରସ୍ତୁତ କରାଯାଇଛି, ଏଥିରେ ଆଦିବାସୀ ଅଞ୍ଚଳରେ ସ୍ବାସ୍ଥ୍ୟ ସୁବିଧା ଜିଲ୍ଲା ସ୍ତରକୁ ବୃଦ୍ଧି କରାଯିବ । ତହସିଲ ସ୍ତରରେ ବହୁ ସଂଖ୍ୟକ ମାଇକ୍ରୋ ସ୍କୋପି କେନ୍ଦ୍ର ଏବଂ ଟିବି ୟୁନିଟ ସ୍ଥାପନ କରାଯିବ । ଏହା ସହ ଆଦିବାସୀ ଅଞ୍ଚଳରେ କାର୍ଯ୍ୟ କରୁଥିବା କର୍ମଚାରୀଙ୍କୁ ଅତିରିକ୍ତ ଭତ୍ତା ଦିଆଯିବ।  ଯକ୍ଷ୍ମା ରୋଗୀଙ୍କୁ ଆର୍ଥିକ ସହାୟତା ଦିଆଯିବ ଯେଉଁଥିରେ ତାଙ୍କୁ ପୁଷ୍ଟିକର ଖାଦ୍ୟ ପାଇଁ ମାସକୁ ୫୦୦ ଟଙ୍କା ଏବଂ ପରିବହନ ପାଇଁ ଥରେ ୭୫୦ ଟଙ୍କା ଦିଆଯିବ । 

ଏହି ଯୋଜନା ଅନୁସାରେ କେନ୍ଦ୍ରୀୟ ଟିବି ଡିଭିଜନ ଆଦିବାସୀ ମନ୍ତ୍ରଣାଳୟକୁ ବୈଷୟିକ ସହାୟତା ପ୍ରଦାନ କରିବ । ସେହିପରି ରାଜ୍ୟ ଟିବି ସେଲ ଏହାର ରାଜ୍ୟ ସହଭୋଗୀ ମାନଙ୍କୁ ଜିଲ୍ଲା ସ୍ତରରେ ଏକ ସ୍ଵତନ୍ତ୍ର କାର୍ଯ୍ୟ ଯୋଜନା ପ୍ରସ୍ତୁତ କରିବାରେ ସାହାଯ୍ୟ କରିବ । ଆଦିବାସୀ ମନ୍ତ୍ରଣାଳୟକୁ ଆଦିବାସୀ ପ୍ରାଧାନ୍ୟ ପ୍ରାପ୍ତ ଜିଲ୍ଲାମାନଙ୍କରେ ଜନସ୍ବାସ୍ଥ୍ୟ ସୁବିଧା ନିକଟରେ ଟିବି ସ୍କ୍ରିନିଂ ଓ ଚିକିତ୍ସା କେନ୍ଦ୍ର ସ୍ଥାପନ କରିବାରେ ସହାୟତା କରିବ । ଏହା ବ୍ୟତୀତ ଯକ୍ଷ୍ମା ସଚେତନତା,ସୁବିଧା ଓ ଚିକିତ୍ସା ପାଇଁ ମଧ୍ୟ ତାଲିମ ଦିଆଯିବ । ୧୭୭ ଆଦିବାସୀ ପ୍ରାଧାନ୍ୟ ଜିଲ୍ଲାରେ ଯକ୍ଷ୍ମା ସହିତ ମୁକାବିଲା କରିବା ପାଇଁ ମନ୍ତ୍ରଣାଳୟ ଏକ ଯୋଜନା ପ୍ରସ୍ତୁତ କରିବେ । ଜନସାଧାରଣଙ୍କ ପ୍ରତିନିଧି,ସମ୍ପ୍ରଦାୟର ନେତା,ସ୍ୱେଚ୍ଛା ସେବୀ ଗୋଷ୍ଠୀ ଓ ଆଦିବାସୀ ନେତାମାନେ ଯକ୍ଷ୍ମା ଶୀଘ୍ର ଚିହ୍ନଟ ପାଇଁ ରାଜ୍ୟ ତଥା ଜିଲ୍ଲା ସ୍ତରରେ କାର୍ଯ୍ୟକଳାପରେ ଅନ୍ତର୍ଭୁକ୍ତ ହେବେ ।