14-Apr-2022

ବଲାଙ୍ଗୀର  : ( ମଳୟ ମିଶ୍ରଙ୍କ ରିପୋର୍ଟ ) ଗତ ଲରମ୍ଭାଥାନା ଅନ୍ତର୍ଗତ ଚମ୍ପାସର ବନ୍ଦ ମାଙ୍ଗାନିଜ୍ ଖଣିରୁ ଜେସିବିରେ ଖୋଳି ଟ୍ରକ୍ ରେ  ଖଣିଜଦ୍ରବ୍ୟ ଚୋରାଚାଲାଣ ଘଟଣାରେ ଗ୍ରାମବାସୀ ଧରିବାରୁ ପୁଲିସ୍ ଏହି ଚୋରିରେ ସମ୍ପୃକ୍ତ ରାଜ୍ୟ ଓ ଜିଲ୍ଲା ବାହାରର ୫ ଜଣଙ୍କୁ ଗିରଫ କରି କୋର୍ଟଚାଲାଣ କରିବା ସହିତ ରାଜ୍ୟବାହାରର ଏହି ଟ୍ରକ୍ ଓ ଜେସିବିକୁ ଜବତ କରିଛି । ଏଥିରେ କେତେକ ସ୍ଥାନୀୟ ଲୋକଙ୍କ ସମ୍ପୃକ୍ତି ତଥା ପଦ୍ମପୁର ଓ ଝାରସୁଗୁଡ଼ାର ଅଣଓଡିଆ ଖଣିମାଫିଆ ମୁଖ୍ୟ ଆସାମୀ ଥିବା ପ୍ରକାଶ ପାଇବାପରେ , ଏହାର ଅଧିକ ତଦନ୍ତ ପାଇଁ ପୁଲିସ୍ ଏକ ସ୍ବତନ୍ତ୍ର ଟିମ୍ ଗଠନ କରି ବାହାକୁ ଯିବା କଥା ପ୍ରକାଶ

ପାଇଛି ।  ତେବେ ଏହି ଖଣିଚୋରି ବା ଚୋରାଚାଲାଣର ପ୍ରକୃତ ଅପରାଧୀଙ୍କୁ ଗିରଫ କରିବା ନେଇ ଲୋକଙ୍କର ପୁଲିସ୍ ବା ଖଣିବିଭାଗ ଉପରେ ଆସ୍ଥା ନାହିଁ ।  ଗତ ୨୦୦୮ରୁ ବନ୍ଦ ପଡିଥିବା ଚମ୍ପାସର ଗ୍ରାମ ନିକଟସ୍ଥ ଏହି ୨ଟି ମାଙ୍ଗାନିଜ୍ ବା ଲୁହାପଥର ଖଣିରୁ ଅତୀତରୁ ଅଦ୍ୟାବଧି ବହୁବାର ଖଣିଜପଦାର୍ଥ ଚୋରି ଓ ରାଜ୍ୟବାହାରକୁ ଚୋରାଚାଲାଣ କରାଯାଇ ଆସୁଥିବା ଲୋକଲୋଚନକୁ ଆସିଥିଲା । ଏହି କାରବାରରେ ସ୍ଥାନୀୟ ପୁଲିସ୍ , ଅଞ୍ଚଳର ରାଜନେତା , କୁଜିନେତା ଓ ଖଣିବିଭାଗ ଜଡିତ ରହିଆସିଥିବା ଚର୍ଚ୍ଚା ହୋଇଆସୁଛି । ଏଥର ମଧ୍ୟ ସ୍ଥାନୀୟ ଗ୍ରାମବାସୀମାନେ ସାହସ କରି ରାତିରେ ଏହାକୁ ଧରି ପୁଲିସ୍ ଜିମା ଦେବାରୁ ମାମଲା ଋଜୁହୋଇଛି ଓ ଅଭିଯୁକ୍ତଙ୍କୁ ଗିରଫ କରାଯାଇଛି । ତେବେ ସେମାନଙ୍କଠାରୁ ମିଳିଥିବା ତଥ୍ୟକୁ ତଦନ୍ତକାରୀ ପୁଲିସ୍ ଓ ଖଣିବିଭାଗ କେତେଦୂର କାର୍ଯ୍ୟକାରୀ କରିବ ବା ଏଥିରେ ଜଡିତ ମୁଖ୍ୟଖଣିମାଫିଆଙ୍କ ସମ୍ପର୍କରେ ଅଧିକ ତଥ୍ୟ ଆଦାୟ କରି କାର୍ଯ୍ୟାନୁଷ୍ଠାନ ଗ୍ରହଣ କରିବ , ଦେଖିବାକୁ ବାକି ରହିଲା । କାରଣ ପୂର୍ବରୁ ଏଭଳି ଅନେକଥରର ଏଭଳି ଅଭିଯୋଗ ଓ ଧରପଗଡ ଘଟଣାକୁ ପୁଲିସ୍ ନଜରଅନ୍ଦାଜ୍ କରିଦେଇଥିବା ଶୁଣାଯାଇଛି । ଏଥରକର ଘଟଣାରେ ରାଜ୍ୟ ଓ ଜିଲ୍ଲାବାହାରର ଗିରଫ ଅଭିଯୁକ୍ତମାନେ ଯେଭଳି ଗୁନ୍ଦୁଲାଗୁପା ବୟାନ ଦେଇଥିଲେ , ତହିଁରୁ ଏହି ଚୋରି ଓ ଚୋରାଚାଲାଣର ପ୍ରକୃତ ଖଣିମାଫିଆମାନେ ଧରାପଡିବାର ସମ୍ଭାବନା କମ୍ । ପୁଲିସ୍ ସେମାନଙ୍କ ମୁହଁରୁ ସବିଶେଷ ତଥ୍ୟ ଆଦାୟ କରି ତାହା ଅଦାଲତି ଆଇନଗତ ସ୍ବୀକାରୋକ୍ତି ବା 161 , 164 ରେ ମାଜିଷ୍ଟ୍ରେଟ୍ ଙ୍କ ସମ୍ମୁଖରେ ଅଭିଯୁକ୍ତଙ୍କର ସତ୍ୟପାଠ ରେକର୍ଡ କରିବା ସହ ଏହା ପଛରେ ରହିଥିବା ସ୍ଥାନୀୟ ଦଲାଲ୍ ଙ୍କ ସହ ବାହାରର ମୁଖ୍ୟମାଫିଆଙ୍କୁ ଗିରଫ କରିବା ପ୍ରକ୍ରିୟାରେ କେତେଦୂର ତତ୍ପରତା ପ୍ରକାଶ କରିବ , ଲୋକେ ଅପେକ୍ଷା କରିଛନ୍ତି । 

ସେହିପରି  ବଲାଙ୍ଗିର ଜିଲ୍ଲା  ଖଣି ଅଧିକାରୀ ଚିତ୍ତରଞ୍ଜନ ସାହୁଙ୍କ ଧରପଗଡର କିଛିଘଣ୍ଟା ପରେ ଲରମ୍ଭାଥାନାରେ ହଠାତ୍ ରାତି୧୨ଟାରେ ପହଞ୍ଚିଯିବା ମୂଳରେ ସନ୍ଦେହ ସୃଷ୍ଟି ହୋଇଛି ।  କେତେକ ସ୍ଥାନୀୟ ଆଇନଜିବୀଙ୍କ ମତରେ ଏହି ଆସାମୀ ଓ ଜବତ ଯାନବାହନକୁ ପୁଲିସ୍ ହାତରୁ ଛଡାଇଆଣି ବିଭାଗୀୟ ହେପାଜତ୍ ରେ ରଖି କୋହଳ କାର୍ଯ୍ୟାନୁଷ୍ଠାନ କରିବା ହୁଏତ ଏହି ଅଧିକାରୀଙ୍କର ପ୍ରଚ୍ଛନ୍ନ ଉଦ୍ଦେଶ୍ୟ ହୋଇପାରେ । ଯଦି ଏହା ହୋଇଥାଏ , ତେବେ ଏତେ ଶୀଘ୍ର ଜିଲ୍ଲା ଖଣି ଅଧିକାରୀ କିପରି ଓ କାହାଠାରୁ ଏଇ ଧରପଗଡର ସୂଚନା ପାଇଲେ ଓ କାହାର ଏଜେଣ୍ଟ ଭାବେ ଏଭଳି ତତ୍ପରତା ଦେଖିଇଲେ , ଏହାର ତର୍ଜମା ଆବଶ୍ୟକ ହୋଇପଡିଛି ।
ସର୍ବୋପରି ଏଥରର ଏହି ଚୋରି ଓ ଚୋରାଚାଲାଣ ତିନିଦିନ ପୂର୍ବରୁ ଆରମ୍ଭ ହୋଇଥିବା , ଧରପଗଡ ବେଳେ ଗ୍ରାମବାସୀଙ୍କ ଆଗରେ ' ଥରେ ମାଟି ପରୀକ୍ଷା ପାଇଁ ନେଉଥିବା ଓ ସେମାନେ ବାହାରର ନୂଆଲୋକ ହୋଇଥିବାରୁ କିଏ ସେମାନଙ୍କୁ ପଠେଇଛି , ଜାଣନ୍ତିନାହିଁ ଇତ୍ୟାଦି ଡାହାମିଛ ସଫେଇ ଦେବା ଇତ୍ୟାଦିର ବିଶ୍ଳେଷଣ କଲେ , ଅନେକ ଦିଗ ବାହାରୁଛି ।  ଗିରଫ ଅଭିଯୁକ୍ତମାନେ ଅଧିକାଂଶତଃ ଏକ ନିର୍ଦ୍ଦିଷ୍ଟ ସଂପ୍ରଦାୟର ରାଜ୍ୟ ତଥା ଜିଲ୍ଲା ବାହାରର ଓ ଛତିଶଗଡ , ଝାଡଖଣ୍ଡ , ଗଞ୍ଜାମଜିଲ୍ଲା ବ୍ରହ୍ମପୁର ଅଞ୍ଚଳର । ଜବତ ଟ୍ରକ୍ ଓ ଜେସିବି ବାହାରର । ଶୁଣିବାକୁ ମିଳିଥିବା ଚର୍ଚ୍ଚା ଅନୁଯାୟୀ , ଏହାର ଓ ଆଗରୁ ଏଭଳି ଚୋରି ବା ଚୋରାଚାଲାଣର ମୁଖ୍ୟମାନଙ୍କ ମଧ୍ୟରେ ବରଗଡ ଜିଲ୍ଲାର ପଦ୍ମପୁରର ଜଣେ ଓ ଝାରସୁଗୁଡ଼ାର ଜଣେ ସୁନୀଲ୍ ଶ୍ରୀବାସ୍ତବ ଖଣିମାଫିଆ ବୋଲି ପ୍ରକାଶ । ସେହିପରି ଲରମ୍ଭାର ରୁଷୁ ଓ ଅଏଁଲାତୁଙ୍ଗା ଏବଂ ପାଟଣାଗଡର କେତେକ ସ୍ଥାନୀୟ ଦଲାଲଙ୍କ ସମ୍ପୃକ୍ତି ଥିବା ଚର୍ଚ୍ଚା ହେଉଛି । 

ଏହା ସହିତ ନିକଟସ୍ଥ ପୁଡାପଦରର ୧୭୬ ଏକରର ଜମିକୁ ଗ୍ରାମବାସୀଙ୍କ ଅଗୋଚରରେ ୨୦୧୫ ରେ ତତ୍କାଳୀନ ଜିଲ୍ଲାପାଳ ସମ୍ବଲପୁର ଠିକଣାଥିବା ସୁବାସ ଅଗ୍ରବାଲ ନାମକ ଜଣକୁ ପ୍ରପେକ୍ଟିଭ୍ ଲାଇସେନ୍ସ ଦେଇଥିବା ସେହିଗ୍ରାମର ଘରଯୁଗୀ ପଣ୍ଡାଙ୍କ ଠାରୁ କିଣିଥିବା ଜମିମାଲିକ କ୍ଷେତ୍ର ପଣ୍ଡା ଏକ ଡାଇରୀଫାର୍ମ ସ୍ଥାପନ କରିବାକୁ ଯାଇ ଅସୁବିଧାରେ ପଡିଥିବା ଜଣାଯାଇଛି । ଏଣୁ ଜିଲ୍ଲାରେ ବେଆଇନ୍  ଖଣି ଲିଜ୍ ପ୍ରଦାନ ଓ ମାଙ୍ଗାନିଜ୍ , ଗ୍ରାଫାଇଟ୍ , ରତ୍ନପଥର ଆଦି ଖଣିଜଦ୍ରବ୍ୟର ଚୋରି ବା ଚୋରାଚାଲାଣରେ ସରକାରୀ ଅଧିକାରୀଙ୍କ ହାତ ଥିବା ସ୍ପଷ୍ଟ ହୋଇଯାଇଛି ।