14-Apr-2022

ବଲାଙ୍ଗିର (ପ୍ରେରଣା ଖବର) ବଲାଙ୍ଗିର ସହରରେ ବହୁ ବେସାହାରା ଅସହାୟ ଲୋକ ଭୋକ ଉପାସରେ ରୋଗଗ୍ରସ୍ତ ହୋଇ ଏଣେତେଣେ ବୁଲୁଛନ୍ତି। ତାଙ୍କୁ ନିଜର କରି ମଣିଷପଣିଆ ଦେଖାଇ ମନୁଷ୍ୟର କର୍ତ୍ତବ୍ୟ ନିର୍ବାହ କରିବା ହେଉଛି ବଲାଙ୍ଗିର ସ୍ବେଚ୍ଛାସେବୀ ସଂଗଠନର ଏକ ଲକ୍ଷ୍ୟ।

ଗତ କିଛିଦିନ ହେଲା ଜଣେ ଅସହାୟ ବ୍ୟକ୍ତି ବଲାଙ୍ଗିର ସହର ମଧ୍ୟରେ ବୁଲୁଥିଲେ। ବଲାଙ୍ଗିର ସ୍ୱେଚ୍ଛାସେବୀ ସଂଗଠନ ଖବର ପାଇ ତାଙ୍କୁ ସାହାଯ୍ୟ ର ହାତ ବଢ଼ାଇ ଥିଲେ l ରତନ ବରିହା, ବୟସ ୩୫ ପାଖାପାଖି ହେବ। କୌଣସି କାରଣ ବଶତଃ କିଛିଦିନ ଆଗରୁ ସେ ଖାଲି ପାଦରେ ଚାଲି ଚାଲି ତାଙ୍କ ଗ୍ରାମ କୁଡ଼ାସିଂହାରୁ ବଲାଙ୍ଗିରକୁ ଚାଲି ଆସିଥିବାର ସେ କହିଲେ ଏବଂ ୪/୫ ଦିନ ହେଲା ସେ ଭୋକିଲା ଥିବାର ଜଣେଇଥିଲେ। ସଂଗେ ସଂଗେ ବଲାଙ୍ଗିର ସ୍ୱେଚ୍ଛାସେବୀ ସଂଗଠନ ର କର୍ମକର୍ତ୍ତା ମାନେ  ପ୍ରଥମେ ତାଙ୍କ ପାଇଁ କିଛି ଖାଇବା ପିଇବା ବ୍ୟବସ୍ଥା କଲା ପରେ ତାଙ୍କୁ କିଛି ସଫା ବସ୍ତ୍ର ପିନ୍ଧେଇ ତୁରନ୍ତ ଭୀମ ଭୋଇ ହସ୍ପିଟାଲକୁ ନେଇ ଯାଇଥିଲେ ।ଏତେ ତୀକ୍ଷ୍ଣ ଖରାରେ ନ ଖାଇ ନ ପିଇ ଚାଲି ଚାଲି ସେ ଦୁର୍ବଳ

ହେଇଯାଇଥିବା ସଙ୍ଗେ ତାଙ୍କ ପାଦରେ ଫୋଟକା ପଡିଯାଇ ଥିବାର ଡାକ୍ତର ଜଣେଇଲେ। ଡାକ୍ତରଙ୍କ ପରାମର୍ଶ ଅନୁଯାୟୀ ସ୍ବେଚ୍ଛାସେବୀ ଆନୁଷ୍ଠାନର କର୍ମକର୍ତ୍ତା ମାନେ ତୁରନ୍ତ ତାଙ୍କୁ ଚିକିତ୍ସା କରେଇବା ସହିତ ହସ୍ପିଟାଲରେ ୨/୩ ଦିନ ରଖିବାର ବ୍ୟବସ୍ଥା କରୁଥିଲେ l ଆଗକୁ ମଧ୍ୟ ସେ ସୁସ୍ଥ ହେଲାପରେ କିପରି ବ୍ୟବସ୍ଥିତ ହେଇ ରହିପାରିବେ ସେ ନେଇ ସଂଗଠନ ର ସଭ୍ଯ ମାନେ ଆଶ୍ରୟ ଗୃହରେ ରହିବାର ବ୍ୟବସ୍ଥା କରିଥିଲେ । ଭୀମଭୋଇ ହସ୍ପିଟାଲର କର୍ମଚାରୀଙ୍କ ସହିତ ନବକିଶୋର ସାହୁ (ଡ଼ିଏସଏସଓ, ବଲାଙ୍ଗିର) ଙ୍କ ସମେତ ବଲାଙ୍ଗିର ସ୍ବେଚ୍ଛାସେବୀ ସଂଗଠନର ସନ୍ତୋଷ ପଟ୍ଟନାୟକ, ଅକ୍ଷୟ ପ୍ରଧାନ, ସୁମିତ ମିଶ୍ର ଓ ଗୋବିନ୍ଦ ଶତପଥୀ ଙ୍କ ସହିତ ଶେଲଟର ହୋମର ସଞ୍ଜୟ ପ୍ରଧାନ ଓ ସଞ୍ଜୟ ମାଛଖଣ୍ଡ ଉପସ୍ଥିତ ରହି ସେହି ଅସହାୟଙ୍କ ସମସ୍ତ ବ୍ୟବସ୍ଥା ନିର୍ବାହ କରିଥିଲେ।