10-Mar-2022

ବିନିକା(ହିମାଂଶୁ ଶେଖର ପୁଟେଲ) ପୌର ପରିଷଦ ନିର୍ବାଚନ ପାଇଁ ବୁଧବାର ଥିଲା ପ୍ରାର୍ଥୀପତ୍ର ଯାଞ୍ଚ ପ୍ରକ୍ରିୟା ।ବିନିକା ଏନଏସି ଅଧ୍ୟକ୍ଷ ଆସନ ସମେତ ୧୨ଗୋଟି ୱାର୍ଡରେ କାଉନସିଲର ପଦରେ ପ୍ରତିଦ୍ବନ୍ଦିତା କରିବା ପାଇଁ ସର୍ବମୋଟ ୩୮ଜଣ ନାମାଙ୍କନ ଦାଖଲ କରିଥିଲେ । ଏଥିରୁ ୪ଜଣଙ୍କ ପ୍ରାର୍ଥୀପତ୍ର ନାକଚ ହେବାପରେ ବର୍ତ୍ତମାନ ୩୪ଜଣଙ୍କ କାଏମ ରହିଛି । ମିଳିଥିବା ସୂଚନା ଅନୁସାରେ ଆଜି ପ୍ରାର୍ଥୀପତ୍ର ଯାଞ୍ଚ ପ୍ରକ୍ରିୟା ବେଳେ ୧ନଂ ୱାର୍ଡରେ ନାମାଙ୍କନ ଦାଖଲ କରିଥିବା ବିଜେପି ପ୍ରାର୍ଥୀନି ମମତା ସେଠୀ,ବିଏସପି ପ୍ରାର୍ଥୀନୀ ରାଧାରାଣୀ ବାଘଙ୍କ ପ୍ରାର୍ଥୀପତ୍ର ନାକଚ ହେବାପରେ ବିଜେଡ଼ି ପ୍ରାର୍ଥୀନୀ କଳ୍ପନା ଦୀପ ନିର୍ଦ୍ବନ୍ଦ୍ବରେ ନିର୍ବାଚିତ ହୋଇଛନ୍ତି ।ସେହିପରି ୩ନଂ ୱାର୍ଡରେ ବିଜେପି ପ୍ରାର୍ଥୀନୀ ସସ୍ମିତା ବିଶ୍ଵାଳଙ୍କ ପ୍ରାର୍ଥୀପତ୍ର ନାକଚ ହେବାପରେ ବିଜେଡ଼ି ପ୍ରାର୍ଥୀନୀ କୁନି ଚିର୍ଗୁନ ନିର୍ଦ୍ଵନ୍ଦରେ ନିର୍ବାଚିତ ହୋଇଛନ୍ତି ।ଅନ୍ୟ ପକ୍ଷରେ ୧୨ନଂ ୱାର୍ଡର କଂଗ୍ରେସ ପ୍ରାର୍ଥୀ ସୁଦାମ ଭୋଇଙ୍କ ପ୍ରାର୍ଥୀପତ୍ର ନାକଚ ହୋଇଥିବା ବେଳେ ସେଠାରେ ବିଜେପି ବନାମ ବିଜେଡ଼ି ମଧ୍ୟରେ ଲଢେ଼ଇ ହେବ ବୋଲି ଜଣାପଡିଛି ।ସେହିପରି ବାକି ସମସ୍ତ ୱାର୍ଡର ପ୍ରାର୍ଥୀ/ପ୍ରାର୍ଥୀନୀଙ୍କ ନାମାଙ୍କନ ଠିକ ରହିଥିବା ବେଳେ ଅଧ୍ୟକ୍ଷ ପାଇଁ ପ୍ରତିଦ୍ବନ୍ଦିତା କରୁଥିବା ବିଜେଡ଼ି,ବିଜେପି,କଂଗ୍ରେସ ଓ ୨ଜଣ ସ୍ବାଧୀନ ପ୍ରାର୍ଥୀଙ୍କ ପ୍ରାର୍ଥୀପତ୍ର କାଏମ ରହିଥିବା ନିର୍ବାଚନ ଦାୟିତ୍ୱରେ ଥିବା ଅଧିକାରୀ ଉମାକାନ୍ତ ସିଂ ସୂଚନା ଦେଇଛନ୍ତି ।