21-Feb-2022

ବଲାଙ୍ଗୀର  :  ତ୍ରିସ୍ତରୀୟ ପଞ୍ଚାୟତ ନିର୍ବାଚନର ତୃତୀୟ ପର୍ଯ୍ୟାୟର ଭୋଟଗ୍ରହଣ ସରିଲା । ଆଉ ଦୁଇଟି ପର୍ଯ୍ୟାୟର ମତଦାନ ବାକି ଅଛି ।  ଚଳିତଥର ସରପଞ୍ଚ, ସଭ୍ୟ ଓ ଦଳୀୟ ଭିତ୍ତିରେ ଜିଲ୍ଲାପରିଷଦ ସଭ୍ୟ ପ୍ରାର୍ଥୀମାନେ ବିପୁଳ ଖର୍ଚ୍ଚବାର୍ଚ୍ଚ କରୁଥିବା କୁହାଯାଉଛି । ଭୋଟ ପ୍ରତି ୩ ହଜାରରୁ ଅଧିକା ଟଙ୍କା ଦିଆଯାଉଛି ବୋଲି ଶୁଣା ଗଲାଣି । ସରପଞ୍ଚ ପ୍ରାର୍ଥୀମାନେ ଗତଥର ୩୫ ଲକ୍ଷ ଟଙ୍କା ଖର୍ଚ୍ଚ କରିଥିବା ଶୁଣିବାକୁ ମିଳିଥିବା ବେଳେ, ଏଥର ଆହୁରି ବେଶି ଖର୍ଚ୍ଚର ଆଶା କରାଯାଉଛି । ସେହିପରି ସମିତିସଭ୍ଯ ପ୍ରାର୍ଥୀମାନଙ୍କ ପାଇଁ ଦୁଇତିନି ଲକ୍ଷ ଖର୍ଚ୍ଚାବାର୍ଚ୍ଚାର ସହାୟତା କରିବା ବ୍ଲକ୍ ଅଧ୍ୟକ୍ଷ ଆଶାୟୀ ପ୍ରାର୍ଥୀଙ୍କ ପାଇଁ ଆବଶ୍ୟକ ପଡୁଛି ।  ନିର୍ଦ୍ବନ୍ଦରେ ଜିତିଥିବା ପ୍ରାର୍ଥୀମାନେ ଗଧବେପାରରେ ଲକ୍ଷ ଲକ୍ଷ ଖର୍ଚ୍ଚ କରିଥିବାବେଳେ , ସଭ୍ୟ ଅପହରଣ , ଲୁଚାଇବା ସହ ଆହୁରି ମୂଲଚାଲର ଘୋଡାବେପାର ବାକି ରହିଛି । ଏହା ଆରମ୍ଭ ହୋଇଗଲାଣି ବୋଲି ଶୁଣାଗଲାଣି । ଶେଷରେ ଜିଲ୍ଲା ପରିଷଦ ସଭ୍ୟ ପ୍ରାର୍ଥୀମାନେ ନିଜ ନିଜ ଦଳର ନେତାଙ୍କ ଦୁଆରକୁ ଥାଳ ଧରି ଧାଉଁଛନ୍ତି । ତେବେ ଆମଜିଲ୍ଲାର  ଶାସକଦଳଛଡା ବିରୋଧୀଦଳର ନେତାମାନେ ସିଧା ଧାତୁନାସ୍ତିବାଣୀ ଶୁଣାଇଦେଉଥିବା ଶୁଣିବାକୁ ମିଳିଛି ।  କିଏ କହିଲେଣି, '  ଜିତିକରି ଆସ '  ତ କିଏ ଇସ୍ପାତମୁହଁ କରି ଗୁଁର୍ ରେଇ ଦେଲେ , ପ୍ରାର୍ଥୀଙ୍କ ପିଳେହିପାଣି  !  ଉପରୁ ଆସିଛି କି ନାହିଁ, ମାଆ ଗଙ୍ଗେ ଜାଣନ୍ତି  ?  କୁଆଡେ ଗଙ୍ଗାରେ ହାଡ ପଡିଲେ , ଆଉ ମିଳେନା ।

ତେଣୁ ନିଜଶିଙ୍ଘରେ ମାଟି ଖୋଳିବାକୁ ପ୍ରସ୍ତୁତ ରହି ପ୍ରାର୍ଥୀମାନେ ସେମାନଙ୍କର ଭାଗ୍ୟପରୀକ୍ଷା କରିବା ସାର  !  ଦେଲାବାଲାଦଳ ବି ନିଜେ ନଦେଇ ସ୍ଥାନୀୟ ପ୍ରତିନିଧି ବା ନେତାଙ୍କ ମୁଣ୍ଡରେ ଦାୟିତ୍ୱ ଲଦିଦେଇଥିବା କୁହାଯାଉଛି । ତଥାପି ତାହା 'ସମୁଦ୍ରକୁ ଶଙ୍ଖେ 'ପରି !  ଭୋଟରେ ହାଁ କରି ଅନାଇ ବସିଛନ୍ତି । ସେମାନଙ୍କ ଆଁ' ବି ଏଥରକୁ ଅଧିକା ମେଲା  । ଗିଳିଲେ ବି ହଜମ କରିଦେବେ କି ସତରେ ଦେବେ , ଭରସାନାଇଁ । ତେଣୁ ଏ ଜୁଆଖେଳରେ ହାରିଲେ କାନମୁଣ୍ଡ ଆଉଁସି ଆଶ୍ରମ ଫାଶ୍ରମକୁ ପଳେଇବା କଥା । ଜିତିଲେ ତ ପଶାଖେଳ ପରି ' କଚ୍ଚେ ପ' ବାଆର...! '