15-Feb-2022

ବିନିକା(ହିମାଂଶୁ ଶେଖର ପୁଟେଲ) ପୁରୁଷ ପ୍ରଧାନ ସମାଜରୁ ନାରୀକୁ ମୁକ୍ତ କରିବା ଓ ସମାଜର ମୁଖ୍ୟ ସ୍ରୋତରେ ସାମିଲ କରିବା ପାଇଁ ସରକାର ମହିଳା ସଶକ୍ତିକରଣ ଯୋଜନାରେ ଅନେକ ପଦକ୍ଷେପ ନେଇଛନ୍ତି ।ପ୍ରତିଟି କ୍ଷେତ୍ରରେ ମହିଳାଙ୍କୁ ଅଗ୍ରାଧିକାର ଦେବା ପାଇଁ ୫୦ପ୍ରତିଶତ ସଂରକ୍ଷଣ ବ୍ୟବସ୍ଥା ଲାଗୁ କରିଛନ୍ତି । ଏବେ ସମଗ୍ର ରାଜ୍ୟରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଚାଲିଥିବା ବେଳେ ମହିଳା ପ୍ରାର୍ଥୀମାନେ ମଧ୍ୟ ପୁରୁଷଙ୍କ ଭଳି ସମାନ୍ତରାଳ ଭାବରେ ରାଜନୀତିକୁ ଓହ୍ଲାଇଛନ୍ତି ।ହେଲେ ମହିଳା ପ୍ରାର୍ଥୀ ମାନେ ସ୍ୱତପ୍ରବୃତ ଭାବେ ନୁହଁ ନିଜ ସ୍ବାମୀ କିମ୍ବା ପରିବାରଙ୍କ ଚାପରେ ପଡି ରାଜନୀତିରେ ସାମିଲ ହେବାକୁ ବାଧ୍ୟ ହେଉଛନ୍ତି ।କେବଳ ନିର୍ବାଚନ ପୂର୍ବ କଥା ନୁହଁ,ମହିଳା ପ୍ରାର୍ଥୀ ଜଣକ ନିର୍ବାଚନରେ ଜିତିବା ପରେ ତାଙ୍କ ହାତରେ ସମସ୍ତ କ୍ଷମତା ରହିବା କଥା 
କିନ୍ତୁ ସେପରି ନହୋଇ ନିଜ ସ୍ବାମୀ କିମ୍ବା ପରିବାରର ଯେକୌଣସି ସଦସ୍ୟଙ୍କ ହାତରେ ରହୁଛି ଅଖଣ୍ଡ କ୍ଷମତା । ଯାହାକି ଷ୍ଟାମ୍ପପେଡ ହୋଇ ରହି ଯାଆନ୍ତି ମହିଳା ଜନପ୍ରତିନିଧି ଜଣକ ।ପରିସ୍ଥିତି ଏପରି ହେଉଛି ଯେ ପ୍ରତିଦ୍ବନ୍ଦିତା କରିଥିବା ମହିଳା ପ୍ରାର୍ଥୀଙ୍କ ପରିଚୟ ହିଁ ହଜିଯାଉଛି ।ପରିବାରର ଅନ୍ୟ କେହିଜଣେ ପୁରୁଷଙ୍କ ନାମ ହିଁ ତାଙ୍କ ଯୋଗ୍ୟତାର ମାପକାଠି ସାଜୁଛି ।ସରକାରଙ୍କ ସଂରକ୍ଷଣ ନୀତି ଯୋଗୁଁ ପୁରୁଷ ମାନେ ବାଧ୍ୟ ବାଧକତା କରି ନିଜ ଝିଅ,ବୋହୂ,ସ୍ତ୍ରୀଙ୍କୁ ରାଜନୀତି ମଇଦାନରେ ଆଣି ନାମକୁମାତ୍ର ସରକାରଙ୍କ ସଂରକ୍ଷଣ ନୀତିକୁ ଫାଙ୍କିବା ପାଇଁ ଘରର ମହିଳାଙ୍କୁ ଢାଲ କରି ବ୍ୟବହାର କରୁଛନ୍ତି ।ପୁରୁଷ ପ୍ରଧାନ ସମାଜରେ ହାତ ଗଣତି କେତେଜଣ ମହିଳାଙ୍କୁ ବାଦ୍ ଦେଲେ ରାଜନୀତି କ୍ଷେତ୍ରରେ ମହିଳାମାନେ ସେତେଟା ରୁଚି ରଖୁନଥିବା ଜଣାପଡ଼ିଛି ।କେବଳ ପରିବାର ବର୍ଗଙ୍କ ଚାପ ଯୋଗୁଁ ରାଜନୀତିରେ ଆସି କାଠ କଣ୍ଢେଇ ସାଜୁଛନ୍ତି । ପଞ୍ଚାୟତ ନିର୍ବାଚନ ପାଇଁ ପ୍ରଚାର ଜୋର ଧରିଥିବା ବେଳେ ଆଶାୟୀ ମହିଳା ପ୍ରାର୍ଥୀଙ୍କ ପରିବାରର ପୁରୁଷଙ୍କ ଠାରେ ତପ୍ତରତା ଅଧିକ ଦେଖିବାକୁ ମିଳୁଛି । ଘରଘର ବୁଲି ନିଜ ସପକ୍ଷରେ ଭୋଟ ମାଗିବା ସହିତ ବିକାଶର ପ୍ରତିଶ୍ରୁତି ଦେଉଛନ୍ତି ।ଏମିତିକି କିଛି ସରକାରୀ କର୍ମଚାରୀ ମଧ୍ୟ ନିଜ ସ୍ତ୍ରୀ,ଝିଅ,ବୋହୂଙ୍କୁ ପଞ୍ଚାୟତ ନିର୍ବାଚନରେ ଉଠାଇ ସନ୍ଧ୍ୟା ହେଲେ ଘରଘର ବୁଲି ଭୋଟ ମାଗୁଥିବା ସହ ଭୋଜି ଭାତରେ ମସଗୁଲ ହେଉଥିବା ଦେଖିବାକୁ ମିଳୁଛି ।ଗତକିଛି ବର୍ଷ ହେବ ପ୍ରତିନିଧି ସଂସ୍କୃତି ଜୋର ଧରିଛି । ମନ୍ତ୍ରୀ ଟିଏ କିମ୍ବା ବିଧାୟକ ଟିଏ ହେଲେ ନିଜ ନିର୍ବାଚନ ମଣ୍ଡଳୀରେ ଜଣେଜଣେ ଲେଖାଏଁ ପ୍ରତିନିଧି ନିଯୁକ୍ତି କରନ୍ତି । ସେମାନଙ୍କ ଅନୁପସ୍ଥିତିରେ ଲୋକଙ୍କ ସମସ୍ୟା ବୁଝିବା ସହ ସାହାଯ୍ୟ କରିବା ପାଇଁ ସେହି ପରମ୍ପରା ଏବେ ପଞ୍ଚାୟତ ସ୍ତରରେ ମଧ୍ୟ ଦେଖିବାକୁ ମିଳିଲାଣି ।ଯଦି ଜଣେ ମହିଳା ପ୍ରାର୍ଥୀ ସରପଞ୍ଚ,ସମିତିସଭ୍ୟ କିମ୍ବା ବ୍ଳକ ଅଧ୍ୟକ୍ଷ ପଦରେ ନିର୍ବାଚିତ ହୁଅନ୍ତି ତାହାହେଲେ ସେ ନିଜ ପରିବାରର ସ୍ବାମୀ କିମ୍ବା ଅନ୍ୟ ଜଣେ ପୁରୁଷଙ୍କ ନିଜ ପ୍ରତିନିଧି ଭାବେ ଉପସ୍ଥାପିତ କରୁଛନ୍ତି ।ଯାହା ଫଳରେ ମହିଳା ପ୍ରାର୍ଥୀ ଜଣକ କେବଳ ରବରଷ୍ଟାମ୍ପ ଭଳି ରହୁଥିବା ବେଳେ ତାଙ୍କ ପ୍ରତିନିଧି ପ୍ରଭୃତ କ୍ଷମତାର ଅଧିକାରୀ ଭାବେ ଉଭା ହୋଇ ସମସ୍ତ ସୁବିଧା ସୁଯୋଗ ଉପଭୋଗ କରୁଛନ୍ତି ।କ୍ଷମତାର ଲୋଭ ସତେ ଯେମିତି ପୁରୁଷ ପ୍ରଧାନ ସମାଜର ମାପକାଠି ସାଜିଛି କହିଲେ ଅତୁକ୍ତି ହେବ ନାହିଁ ।ଯଦ୍ୱାରା ସରକାର ମହିଳାଙ୍କ ପାଇଁ ଲାଗୁ କରିଥିବା ସଂରକ୍ଷଣ ବ୍ୟବସ୍ଥାର ଖୋଲାଖୋଲି ଉଲଂଘନ ହେଉଛି ।ଏଥିସହ ଯେଉଁ ମହତ ଉଦ୍ଦେଶ୍ୟ ନେଇ ସଂରକ୍ଷଣ ବିଲ ପାରିତ ହୋଇଥିଲା ତାର ପ୍ରକୃତ ଉଦ୍ଦେଶ୍ୟ ସାଧିତ ହୋଇ ପାରୁନାହିଁ । ଏଣୁ ନିର୍ବାଚନ ଆୟୋଗ ଏହି ଦିଗପ୍ରତି ଦୃଷ୍ଟି ଦେଇ ମହିଳା ଜନ ପ୍ରତିନିଧିଙ୍କୁ ତାଙ୍କ ଦାୟିତ୍ଵ ଓ କର୍ତ୍ତବ୍ୟ ପ୍ରତି ଜାଗ୍ରତ କରିବା ପାଇଁ ବିଭିନ୍ନ ମହଲରେ ମତ ପ୍ରକାଶ ପାଇଛି