15-Feb-2022

ବଲାଙ୍ଗୀର,(ମଳୟ ମିଶ୍ରଙ୍କ ରିପୋର୍ଟ): ଆସନ୍ତାକାଲି ଠାରୁ ଆରମ୍ଭହେଉଛି ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ପ୍ରଥମ ଭୋଟଗ୍ରହଣ ।  ତେବେ ଏଥର ବଲାଙ୍ଗୀରଜିଲ୍ଲାରେ ପ୍ରଥମଥର ପାଇଁ ଏକ ନୂତନ ପରିବର୍ତ୍ତନର ଆଭାସ ମିଳୁଛି । ତାହାହେଲା , ବହୁସଂଖ୍ୟାରେ ଭୋଟରଙ୍କ ସଚେତନତା ବୃଦ୍ଧି । ମୁହଁ ଖୋଲି ସେମାନେ ସମସ୍ତ ପ୍ରାର୍ଥୀଙ୍କୁ ସମର୍ଥନ କଲାପରି ଭାବଭଙ୍ଗୀ ଦେଖାଉଛନ୍ତି । ଯିଏ ଯାହା ଦେଲା ନେଇଯାଉଛନ୍ତି । ଟଙ୍କାପଇସା ବି ଗ୍ରହଣ କରିବାକୁ ମନା କରୁନାହାଁନ୍ତି । ସବୁଠାରୁ ମଜାକଥା ହେଲା, ସେମାନଙ୍କୁ ଏହି କୌଶଳଟି  ଚତୁର ରାଜନେତା ବା ପ୍ରାର୍ଥୀମାନେ ହିଁ ଶିଖାଇଛନ୍ତି ଯେ  'ଯାହାଠୁଁ ଯେତେ ନେବାକଥା ନିଅ ଓ ଆମକୁ ଭୋଟ୍ ଦିଅ  ! ' ତେବେ ତାଙ୍କଠୁଁ ଭୋଟର ଆଉପାଦେ ଆଗରେ । ଏକଥା ଶିଖାଉଥିବା ନେତା ବା ପ୍ରାର୍ଥୀଙ୍କୁ ବି ଶେଷରେ ଚିତାକାଟି ଦେବାର ସମ୍ଭାବନା ରହିଥିବା ସୂଚନା ମିଳୁଛି ।  ' ନରୋତ୍ତମ ଦାସ କହେ....' ନୀତିରେ ସେମାନେ ସେମାନଙ୍କର ଗୁପ୍ତଭୋଟଟିକୁ

ସେମାନଙ୍କର ପସନ୍ଦର ପ୍ରାର୍ଥୀଙ୍କୁ ଦେବାକୁ ସ୍ଥିରକରି ସାରିଛନ୍ତି । ତେଣୁ ଏବେ ବି ଅନ୍ତିମ ମୁହୂର୍ତ୍ତରେ ଭୋଟରଙ୍କ ମନ ଜାଣିବା ପ୍ରାର୍ଥୀଙ୍କ ପାଇଁ କାଠିକର ପାଠ ହୋଇପଡିଛି । ଭୋଟର, ଜନସାଧାରଣ ଓ ରାଜନୈତିକ ବିଶ୍ଳେଷଣକାରୀଙ୍କ ସହ ଆଲୋଚନାରୁ ଯାହା ଜଣାପଡୁଛି, ଗାଁ ଗହଳର ଅଶିକ୍ଷିତ ଭୋଟରମାନେ ବି ଏଥର ପୂର୍ବଥର ଗୁଡିକର କଟୁ ତିକ୍ତ ଅଭିଜ୍ଞତାରୁ ଓ  ସଭ୍ୟ, ସରପଞ୍ଚ, ଚେୟାରମ୍ୟାନ୍ ବା ନିର୍ବାଚିତ ପ୍ରତିନିଧିମାନଙ୍କର  ସ୍ବାର୍ଥପର ଲୁଣ୍ଠନ ପ୍ରବୃତ୍ତି ଓ ପ୍ରତାରଣା ଯୋଗୁଁ ଭୀଷଣ ବିରକ୍ତ ହୋଇପଡି ଆଉ ସେମାନଙ୍କୁ ବିଶ୍ବାସକୁ ନେଉନାହାଁନ୍ତି । ସେମାନଙ୍କ ମିଥ୍ୟା ପ୍ରତିଶ୍ରୁତିରେ ଭୁଲୁନାହାଁନ୍ତି । କେବଳ କ୍ଷମତାଲାଳସା ପାଇଁ କେମିତି ବାୟା ହେଇପଡିଛନ୍ତି, ତାହା ବୁଝିପାରି ପାନେ ଦେବାକୁ ମନେ ମନେ ସଂକଳ୍ପ କଲେଣି । ଉପରେ ଗୋଟେ ଭାବ ଓ ଭିତରେ ଅସଲ ଭାବ ଲୁଚାଇ ରଖୁଥିବା ଲକ୍ଷ୍ୟ କରାଯାଇଛି ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ଏହା ଯେ, ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଭୋଟରମାନେ ନୂତନ, ସଚ୍ଚୋଟ, ପାରଙ୍ଗମ ଓ ଭରସାଯୋଗ୍ୟ ପ୍ରାର୍ଥୀଙ୍କୁ ଦଳମତ ଶିକ୍ଷା ନିର୍ବିଶେଷରେ ବାଛିବାକୁ ମନଭିତରେ ସ୍ଥିର କରିସାରିଛନ୍ତି ।  ଆମ ଗଣତାନ୍ତ୍ରିକ ବ୍ୟବସ୍ଥାରେ ଇଏ ଏକ ଶୁଭସଂକେତ ବୋଲି ଜଣାପଡୁଛି । ଏଭଳି ମାହୋଲ ଅନୁମାନ କରି ରାଜନୈତିକ ପର୍ଯ୍ୟବେକ୍ଷକମାନେ କହିଲେଣି, ଏଥର ପଇସା କାମ ଦେବନି । ଭୋଟରମାନେ ପଇସା ଖାଇ ଯାହାକୁ ଦେବାକଥା, ଦେବେ । ପଇସା ହଜମ୍  - ଖେଳ ଖତମ୍  ! '
ଏଣୁ ଦେଖାଯାଉ, ଫଳ କ'ଣ ହେଉଛି  ?