17-Jan-2022

ବିନିକା(ହିମାଂଶୁ ଶେଖର ପୁଟେଲ): ଆଉ ଦିନକ ପରେ ଅର୍ଥାତ ସୋମବାର ୧୭ତାରିଖ ଠାରୁ ନାମାଙ୍କନ ପ୍ରକ୍ରିୟା ଆରମ୍ଭ ହୋଇ ୨୧ତାରିଖ ପର୍ଯ୍ୟନ୍ତ ଚାଲିବ ।ସେଥିପାଇଁ ଆଶାୟୀ ପ୍ରାର୍ଥୀ/ପ୍ରାର୍ଥୀନୀ ମାନେ ସମର୍ଥକ ଯୋଗାଡ଼ କରିବାରେ ବ୍ୟସ୍ତ ।ଜିଲ୍ଲା ପରିଷଦ ଆସନ ପାଇଁ ଦଳୀୟ ଟିକେଟ ବ୍ୟବସ୍ଥା ଥିବାରୁ ପ୍ରମୁଖ ରାଜନୈତିକ ଦଳ ବିଜେଡ଼ି,ବିଜେପି ଓ କଂଗ୍ରେସ ମଧ୍ୟରେ ଅଙ୍କକଷା ଯୋର ଧରିଛି।ତେବେ ଶାସକ ବିଜେଡ଼ି ଦଳରୁ ପ୍ରାର୍ଥୀ ହେବା ପାଇଁ ଅନ୍ୟ ଦଳ ଠାରୁ ଆଶାୟୀଙ୍କ ସଂଖ୍ୟା ଅଧିକ ରହିଛି ।ବିନିକା ବ୍ଲକର ଚରଦା,ଭଣ୍ଡାର, ଶିଂହିଯୁବା,ସିନ୍ଦୁରପୁର,ବାବୁପାଲି,ବାଙ୍କିଘିରିଡି ଆଦି ୬ଟି ପଞ୍ଚାୟତକୁ ନେଇ ଗଠିତ ୧ନଂ ଜୋନ ଅନୁସୂଚିତ ଜାତି ମହିଳାଙ୍କ ପାଇଁ ଉଦ୍ଦିଷ୍ଟ ଥିବାରୁ ଏହି ଆସନ ପାଇଁ ବିଜୁ ଜନତା ଦଳରୁ ଟିକେଶ୍ଵରି ମହାନନ୍ଦ,ଅରୁଣା ହରିପାଲ,ଦେବଜାନୀ ମହାନନ୍ଦ,ସସ୍ମିତା ହାତୀ ପ୍ରମୁଖ ଟିକେଟ ଦୋୖଡରେ ଅଛନ୍ତି।ସେହିପରି ବିଜେପିରୁ ପ୍ରମିଳା କଳତା,ଗୁରୁବାରି ହାତୀ ଏବଂ କଂଗ୍ରେସ ଦଳ ପକ୍ଷରୁ ମଞ୍ଜୁଲତା ମହାନନ୍ଦ,ସୌଦାମିନୀ କୁହଁର ଟିକେଟ ଆଶାୟୀରେ ରହିଛନ୍ତି । ଏହି ଜୋନ ପାଇଁ ୪୩ହଜାର୮୨୩ଜଣ ଭୋଟର ତାଙ୍କର ମନପସନ୍ଦ ପ୍ରାର୍ଥୀନୀ ଙ୍କୁ ଭୋଟ ଦେଇ ବାଚ୍ଛିବେ । ଅନ୍ୟ ପକ୍ଷରେ ବ୍ଲକର ଶଙ୍କରା,ମହଦା,ବାଉଁସୁନି,ମହାଦେବପାଲି,ସେଲଡି, କଇଁନ୍ତରା,ଜୁଳୁଣ୍ଡା,କୁହିବାହାଲ,ସିଲାଟି,ମେଘେଲା ଆଦି ୧୦ଟି ପଞ୍ଚାୟତକୁ ନେଇ ଗଠିତ ୨ନଂ ଜୋନ ଅନୁସୂଚିତ ଜାତିଙ୍କ ଉଦିଷ୍ଠ ରହିଥିବାରୁ ବିଜୁ ଜନତା ଦଳ ପକ୍ଷରୁ ବଶିଷ୍ଠ ଭରାସାଗର,ବିଶ୍ଵାମିତ୍ର ତାଣ୍ଡି,ପରୀକ୍ଷିତ ବାଗ,ସୁବାସ ଝାଙ୍କର,ମନୋଜ ଦୀପ,ଶୁକଦେବ ଦଣ୍ଡିଆ ପ୍ରମୁଖ ଟିକେଟ ଦାବିଦାରରେ ରହିଥିବା ଜଣାପଡିଛି । ସେହିପରି ବିଜେପି ଦଳରୁ ଯୁବ ଇଞ୍ଜିନିୟର ବାବୁଳୁ ବିଶି,ଜାତକ ସେଠୀ,ପ୍ରବୀଣ ବିଶ୍ଵାଳ ଏବଂ କଂଗ୍ରେସ ଦଳ ପକ୍ଷରୁ ରାଜ୍ୟ କାର୍ଯ୍ୟକାରିଣୀ ସଦସ୍ୟ ପ୍ରଦୀପ ସେଠୀ,ସୁବାସ ସେଠୀ,ରବୀନ୍ଦ୍ର ଭଏନା ପ୍ରମୁଖ ଟିକେଟ ଦୋୖଡରେ ଅଛନ୍ତି । ଏହି ଆସନ ପାଇଁ ୪୭ହଜାର୨୯୫ ଜଣ ଭୋଟର ମତଦାନ କରିବେ ।