05-Nov-2020

ମୁମ୍ବାଇ, (ପ୍ରେରଣା ଖବର) - ୨୦୧୮ ମସିହାରେ ଜଣେ ୫୩ ବର୍ଷୀୟ ଇଣ୍ଟେରିଅର ଡିଜାଇନର ଓ ତାଙ୍କ ମାଆଙ୍କୁ ଆତ୍ମହତ୍ୟା କରିବାକୁ ବାଧ୍ୟ କରିବା ଅଭିଯୋଗରେ ରିପବ୍ଲିକ୍‌ ଟିଭି ଏଡିଟର ଇନ ଚିଫ୍ ଅର୍ଣ୍ଣବ ଗୋସ୍ବାମୀଙ୍କ ସମେତ ତିନିଜଣଙ୍କୁ ମହାରାଷ୍ଟ୍ରର ରାଇଗଡ଼ ପୋଲିସ ବୁଧବାର ଗିରଫ କରିଥିଲା। ଏବେ ମାମଲାର ଶୁଣାଣି କରି ମହାରାଷ୍ଟ୍ରର ଅଲିବାଗସ୍ଥିତ ଅଦାଲତ ଅର୍ଣ୍ଣବଙ୍କୁ ୧୪ଦିନ ପାଇଁ ନ୍ୟାୟିକ ହେପାଜତକୁ ପଠାଇଛନ୍ତି। ତାଙ୍କ ସହ ଗିରଫ ହୋଇଥିବା ଫିରୋଜ ସେଖ୍‌ ଓ ନୀତେଶ ସାରଦାଙ୍କୁ ମଧ୍ୟ ୧୪ଦିନ ପାଇଁ ନ୍ୟାୟିକ ହେପାଜତକୁ ପଠାଯାଇଛି।

ସୂଚନା ମୁତାବକ, ନଭେମ୍ବର ୧୮ପର୍ଯ୍ୟନ୍ତ ୩ଜଣଙ୍କୁ ନ୍ୟାୟିକ ହେପାଜତରେ ରଖି ପୋଲିସ ପଚରାଉଚରା କରିବ। ଅର୍ଣ୍ଣବ ଗୋସ୍ବାମୀଙ୍କ ଓକିଲଙ୍କ ସୂଚନା ମୁତାବକ, ସେ ଜାମିନ ପାଇଁ ଆବେଦନ କରିିଥିବାବେଳେ ତଦନ୍ତ କରୁଥିବା ଅଫିସରଙ୍କୁ ଏ ନେଇ ଜବାବ ଦେବାକୁ ଅଲିବାଗ ଅଦାଲତ କହିଛନ୍ତି।

ସୂଚନାଯୋଗ୍ୟ, କନ୍‌କର୍ଡ ଡିଜାଇନ୍‌ ପ୍ରା.ଲି. ନାମକ ଏକ ଆର୍କିଟେକ୍ଟ ଫାର୍ମର ପରିଚାଳନା ନିର୍ଦ୍ଦେଶକ ଅନଭୟ ନାଏକଙ୍କର ଏକ ଷ୍ଟୁଡିଓ ନିର୍ମାଣ ବାବଦକୁ ଅର୍ଣ୍ଣବଙ୍କଠାରୁ ୮୩ ଲକ୍ଷ ଟଙ୍କା ପାଇବାକୁ ଥିଲା। ସେହିପରି ଅନ୍ୟ ଦୁଇଟି କମ୍ପାନୀ ଆଇକାଷ୍ଟ/ସ୍କାଇମିଡିଆ ଓ ସ୍ମାର୍ଟ ୱାର୍କସ୍ ମଧ୍ୟ ସେମାନଙ୍କ ବକେୟା ପରିଶୋଧ କରିନଥିଲେ। ଏହି ତିନି କମ୍ପାନୀ ମୋଟ ୫ କୋଟି ୪୦ ଲକ୍ଷ ଟଙ୍କା ବାକି ରଖିଥିଲେ। ଏଥିଯୋଗୁଁ ଆଲିବାଗ୍‌ର କବୀର ଗ୍ରାମସ୍ଥିତ ନିଜ ଫାର୍ମହାଉସ୍‌ରେ ଅନଭୟ ଓ ତାଙ୍କ ମାଆ ଆତ୍ମହତ୍ୟା କରିଥିବା ଜଣାପଡ଼ିଥିଲା। ପୋଲିସ ସେଠାରୁ ଏକ ସୁଇସାଇଡ୍‌ ନୋଟ୍‌ ଉଦ୍ଧାର କରିଥିଲା। ସେଥିରେ ଅନଭୟ ସ୍ପଷ୍ଟ ଲେଖିଥିଲେ ଯେ ଉପରୋକ୍ତ ତିନି କମ୍ପାନିରୁ ତାଙ୍କ ବକେୟା ନମିଳିବାରୁ ସେ ଓ ତାଙ୍କ ମାଆ ଆତ୍ମହତ୍ୟା ପରି ଚରମ ନିଷ୍ପତ୍ତି ନେବାକୁ ବାଧ୍ୟ ହୋଇଥିଲେ। ଅନଭୟଙ୍କ ପତ୍ନୀ ଅକ୍ଷତଙ୍କ ଅଭିଯୋଗ କ୍ରମେ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଥିଲା। ବୁଧବାର ସକାଳ ପ୍ରାୟ ୬ଟାବେଳେ ୱର୍ଲିସ୍ଥିତ ଏକ କୋଠାର ସତର ମହଲାରେ ରହୁଥିବା ଅର୍ଣ୍ଣବଙ୍କୁ ପୋଲିସ ନାଟକୀୟ ଢଙ୍ଗରେ ଗିରଫ କରିଥିଲା।