30-Oct-2021

ବିନିକା(ହିମାଂଶୁ ଶେଖର ପୁଟେଲ) କେତେବେଳେ ରାସ୍ତାରେ ବନ୍ଧୁକ ଦେଖାଇ ଡକାୟତି ତ ଆଉ କେତେବେଳେ ଗାଡ଼ିର ଡିକି ଭାଙ୍ଗି ଲୁଟ ଯୋଗୁଁ ଲୋକେ ନିଜକୁ ସୁରକ୍ଷିତ ମନୁ ନାହାନ୍ତି l ସମ୍ପୂର୍ଣ୍ଣ ଭାବରେ ସୁବର୍ଣ୍ଣପୁର-ବିନିକା-ରାମପୁର ରାଜପଥ ସମସ୍ତଙ୍କ ପାଇଁ ଏକ ପ୍ରକାର ଅସୁରକ୍ଷିତ ହୋଇ ପଡିଥିବା ସାଧାରଣରେ ଚର୍ଚ୍ଚା ହେଉଛି l କିଛିଦିନ ତଳେ ଠିକ ଏହି ସମୟରେ ବନ୍ଧୁକ ଦେଖାଇ ସୁନା ଓ ଟଙ୍କା ଦୁର୍ବୃତ୍ତ ମାନେ ଲୁଟି ନେଇଥିବା ବେଳେ ଆଜି ସନ୍ଧ୍ୟାରେ ବିନିକା ବସଷ୍ଟାଣ୍ଡ ନିକଟ

ରାସ୍ତା ପାର୍ଶ୍ବରେ ଥିବା ଏକ କାର ଭିତରୁ ଅଚାନକ ଭାବେ ବ୍ୟାଗରେ ଥିବା ସୁନା,ରୂପା ଓ ଦେଢ଼ ଲକ୍ଷ ଟଙ୍କା ଉଭାନ ହୋଇ ଯିବା ଘଟଣା ସାରା ଅଞ୍ଚଳରେ ଦୁର୍ବୃତ୍ତ ମାନଙ୍କ ଚକମା କାର୍ଯ୍ୟକୁ ନେଇ ସାଧାରଣ ଲୋକଙ୍କ ଠାରେ କୋକୁଆଭୟ ସୃଷ୍ଟି କରିଛି l ଘଟଣାରୁ ପ୍ରକାଶ ଯେ ତରଭା ଅଞ୍ଚଳର ବ୍ୟବସାୟୀ ସୁନୀଲ କୁମାର ସାହୁ ତାଙ୍କ ଡ୍ରାଇଭର ସହ ଏକ କାର ଯୋଗେ ବିନିକା ଆସିଥିଲେ l ବ୍ୟବସାୟ କାମ ସାରି ସନ୍ଧ୍ୟା ପ୍ରାୟ ୬ ଘଣ୍ଟା ସମୟରେ ବିନିକା  ବସଷ୍ଟାଣ୍ଡ ରାସ୍ତା ପାର୍ଶ୍ବରେ ଥିବା କଦଳୀ ଦୋକାନ ସମ୍ଭୂଖରେ ଗାଡ଼ି ଅଟକାଇ କଦଳୀ କିଣିବାକୁ ଯାଇଥିଲେ l କଦଳୀ କିଣିବା ପରେ ଡ୍ରାଇଭରକୁ ଡାକି କଦଳୀ ନେବା ପାଇଁ କହିଥିଲେ l ଡ୍ରାଇଭର ଗାଡ଼ି କବାଟ ଖୋଲି କଦଳୀ ରଖିବା ବେଳେ ପଛ ସିଟ ରେ ଥିବା କଳା ବ୍ୟାଗରେ ଭର୍ତି ସୁନା ୧୦୪ ଶହ ଗ୍ରାମ,ରୂପା ୧ କେଜି ୨୦୦ଗ୍ରାମ ଓ ନଗଦ ଦେଢ଼ ଲକ୍ଷ ଟଙ୍କା ନଥିବା ଦେଖୁ ଆଚମ୍ବିତ ହୋଇଥିଲେ l (ଯାହାର ଆନୁମାନିକ ମୂଲ୍ୟ ୭ଲକ୍ଷ ଟଙ୍କା ହେବ) ଜନଗହଳି ପୁର୍ଣ୍ଣ ସ୍ଥାନରୁ ଆଖି ପିଚ୍ଛୁଲାକେ ଦୁର୍ବୃତ୍ତ ମାନେ ଚୋରି କରି ନେଇଯିବା ଘଟଣାକୁ ନେଇ ସାଧାରଣରେ ଚର୍ଚ୍ଚା ଜୋର ଧରିଛି l ପରେ ସୁନୀଲ ବିନିକା ଥାନାକୁ ଆସି ଅଭିଯୋଗ କରିବା ପରେ ପୋଲିସ ତରଫରୁ ଏକ ମାମଲା ରୁଜୁ କରାଯାଇଛି l ଥାନାଧିକାରୀ ପବିତ୍ର ସାହୁ ଓ ଷ୍ଟାଫ ଘଟଣା ସ୍ଥଳକୁ ପହଞ୍ଚି ତଦନ୍ତ କରିବା ସହ ସେହି ସ୍ଥାନ ମାନଙ୍କରେ ଲାଗିଥିବା ସିସିଟିଭି ଫୁଟେଜ ମଧ୍ୟ ଯାଞ୍ଚ କରିଥିବା ଜଣାପଡ଼ିଛି l