02-Jul-2021

ବେଲପଡ଼ା (ପ୍ରେରଣା ଖବର) : ବଲାଙ୍ଗୀର ଜିଲ୍ଲାରେ ଦିନ କୁ ଦିନ ବେଆଇନ  ନିଶା କାରବାର ବୃଦ୍ଧି ପାଉଥିବା ଅଭିଯୋଗ ହୋଇଆସୁଛି  । ସେହିପରି ପୋଲିସ ନିଜ ସକ୍ରିୟତା ଜାହିର କରି ଗତ ଗୁରୁବାର ଦିନ ବଲାଙ୍ଗୀର ଜିଲ୍ଲାର ପଟଣାଗଡ଼ ବେଲପଡା ମୁଖ୍ୟ ରାସ୍ତାରୁ ଏକ ଚାରିଚକିଆ ଗାଡିରେ ଚାଲାଣ ହେଉଥିବା ୧୨୦୦ ବୋତଲ ନିଶା କଫସିରଫ ଜବତ କରାଯାଇ ଥିବା ବେଳେ ପୁନଃ ଦୁଇ ଶହ ବୋତଲ କଫସିରଫ ସହ ଜଣେ ବ୍ୟକ୍ତିଙ୍କୁ ବେଲପଡା ପୋଲିସ ଗିରଫ କରିଥିବା ସୂଚନା ମିଳିଛି ।  ପୁଲିସକୁ ଖୋଲା ଚ୍ୟାଲେଞ୍ଜ ଦେଇ ମାଫିଆ ମାନେ ଖୋଲା,ଖୋଲି ଭାବେ ନିଜ କାରବାର ଚଲାଇଆସୁ ଥିବା ଜଣାଯାଇଛି ।   ଦୁଇ ଦିନ ତଳେ କପାଣି ଗାଁରୁ ୧୨ଶହ କଫସିରଫ ସହ ଏକ ଚାରି ଚକିଆ ଗାଡି ସହ ଦୁଇ ଅଭିଯୁକ୍ତ ଙ୍କୁ  ପୁଲିସ ଗିରଫ କରିଥିବା ବେଳେ ଗୁରୁବାର ସନ୍ଧ୍ୟାରେ ବେଲପଡା ତାରିଣୀ ମନ୍ଦିର ପଛପଟେ ରହୁଥିବା ଲଳିିତ କାନ୍ଦ ଙ୍କ ଘରୁ ପୁଲିସ ୨୦୦ ବୋତଲ କଫ ସିରଫ ଜବତ କରିଥିବା ଜଣାପଡିଛି । । ପ୍ରାପ୍ତ ସୂଚନା ମତେ ବହୁ ଦିନରୁ ଲଳିତ କାନ୍ଦ ନିଜ ଘରେ ନିଶା କାରବାର ବ୍ୟବସାୟ କରୁଥିଲେ । ଏସମ୍ପର୍କରେ ବେଲପଡା ପୁଲିସ ଜାଣିବା ପରେ ଗୁରୁବାର ସନ୍ଧ୍ୟାରେ ଘରେ ଚଢଉ କରି ଘରୁ ୨୦୦ ବୋତଲ କଫ ସିରଫ ଜବତ କରିବା ସହ ଲଲିତ କାନ୍ଦକୁ ବେଲପଡା ଥାନାକୁ ଆଣିଥିଲା । ଥାନାରେ କେସ ନଂ ୧୨୪/୨୧ ଅନୁଯାୟୀ ଏକ ମାମଲା ରୁଜୁ କରି ଆଜି ତାକୁ କୋର୍ଟ ଚାଳାଣ କରିଥିବା ବେଲପଡା ଥାନା ଅଧିକାରୀ ବୁଲୁ ମୁଣ୍ଡା ସୂଚନା ଦେଇଛନ୍ତି । ତେବେ ବେଲପଡା ଅଚଂଳରେ ଦେଶୀ ଓ ବିଦେଶୀ ମଦ କାରବାର ମଧ୍ୟ ଅନୁରୂପ ଭାବେ  ବୃଦ୍ଧି ପାଉଥିବାରୁ ଏହା ଉପରେ ମଧ୍ୟ ପୁଲିସ ଗୁରୁତ୍ୱ ଦେବାକୁ ଜନସାଧାରଣ ଦାବୀ ହେଉଛି ।