23-Aug-2026

ସମ୍ବଲପୁର:(ସଂଜୀବ ପାଣିଗ୍ରାହୀ )ସମ୍ବଲପୁର ପୋଲିସ ନାଗରିକ-କୈନ୍ଦ୍ରିକ ଏବଂ ଟେକ୍ନୋଲୋଜି-ଚାଳିତ ପୋଲିସିଂ ଦିଗରେ ଆଉ ଏକ ବଡ଼ ପଦକ୍ଷେପ ନେଇଛି l ମୋବାଇଲ୍ ମେଳା ୨.୦ ମାଧ୍ୟମରେ ହଜି ଯାଇଥିବା ୧୧୫ଟି /ଚୋରି ହୋଇଥିବା ମୋବାଇଲ୍ ଫୋନ୍ ଉଦ୍ଧାର କରାଯାଇ ଏବଂ ବିଭିନ୍ନ ମାମଲାରେ ଜବତ ହୋଇଥିବା ୪୫ ଲକ୍ଷ ଟଙ୍କା ପ୍ରକୃତ ମାଲିକଙ୍କୁ ଫେରାଇ ଦିଆଯାଇଛି l 

ଏହା ପ୍ରମାଣିତ କରୁଛି ଯେ ଟେକ୍ନୋଲୋଜିକୁ ଦୈନନ୍ଦିନ ପୋଲିସିଂରେ ସାମିଲ କଲେ ହଜିଯାଇଥିବା ସମ୍ପତ୍ତି ଅନ୍ଧାରରେ ରହିବ ନାହିଁ l ଭାରତ ସରକାରଙ୍କ ଦୂରସଞ୍ଚାର ବିଭାଗର ସଞ୍ଚାର ସାଥୀ ପୋର୍ଟାଲର CEIR (Central Equipment Identity Register) ମାଧ୍ୟମରେ ଏହି ଚୋରି ହୋଇଥିବା ଓ ହଜି ଯାଇଥିବା ୧୧୫ଟି ଫୋନ୍ ଟ୍ରେସ୍ ଓ ଉଦ୍ଧାର କରାଯାଇଛି l

 ସମ୍ବଲପୁର ପୋଲିସ ହଜିଯାଇଥିବା ଫୋନ୍ ଗୁଡ଼ିକର IMEI ବିବରଣୀ ପୋର୍ଟାଲରେ ଅପଲୋଡ୍ କରି, ନିରନ୍ତର ଟେକ୍ନିକାଲ୍ ଫଲୋଅପ୍, ଡିଭାଇସ୍ ଆକ୍ଟିଭିଟି ବିଶ୍ଳେଷଣ ଏବଂ ବିଭିନ୍ନ ସଂସ୍ଥା ସହ ସମନ୍ୱୟ ରଖି ଏହି ଫୋନ୍ ଗୁଡ଼ିକୁ ଉଦ୍ଧାର କରିଛି l ଯାଞ୍ଚ ଏବଂ ଆଇନଗତ ପ୍ରକ୍ରିୟା ପୂରା ହେବା ପରେ ଏହି ଫୋନ୍ ଗୁଡ଼ିକୁ ପ୍ରକୃତ ମାଲିକଙ୍କୁ ଫେରାଇ ଦିଆଯାଇଛି ବୋଲି ସାମ୍ବାଦିକ ସମ୍ମିଳନୀ ରେ ସମ୍ବଲପୁର ଅତିରିକ୍ତ ଆରକ୍ଷୀ ଅଧିକ୍ଷକ ଅଜୟ କୁମାର ମିଶ୍ର ସୂଚନା ଦେଇଛନ୍ତି l

ମୋବାଇଲ୍ ସହିତ ବିଭିନ୍ନ ମାମଲାରେ ଜବତ ୪୫,୦୦,୦୦୦/-ଟଙ୍କା ଟଙ୍କା ମଧ୍ୟ ଫେରାଇ ଦିଆଯାଇଛି l ଯେଉଁ ମାନେ ଜିଲ୍ଲା ର ବିଭିନ୍ନ ଥାନାରେ ଓ ସାଇବର ଥାନା ରେ ଅଭିଯୋଗ ରୁଜୁ କରିଥିଲେ ଓ ସେମାନଙ୍କୁ ଅର୍ଥ ଫେରସ୍ତ ଦିଆଯାଇଛି ସେମାନେ ହେଲେ l ରମେଶ ଚନ୍ଦ୍ର ବିଶ୍ୱାଳ — ୧୬ ଲକ୍ଷ ଟଙ୍କା, ମାନସ କୁମାର ମୁଖୋପାଧ୍ୟାୟ — ୧୨.୫୦ ଲକ୍ଷ ଟଙ୍କା, ଶ୍ୟାମ ଦୋରା — ୧୨ ଲକ୍ଷ ଟଙ୍କା, ଅଜୟ ମିଞ୍ଜ — ୪.୫୦ ଲକ୍ଷ ଟଙ୍କା l ମୋଟ୍: ୪୫ ଲକ୍ଷ ଟଙ୍କା ବୋଲି ସାମ୍ବାଦିକ ସମ୍ମିଳନୀ ରେ ସମ୍ବଲପୁର ଆରକ୍ଷୀ ଅଧିକ୍ଷକ ମୁକେଶ ଭାମୁ ଜଣାଇଛନ୍ତି l

ମୋବାଇଲ୍ ମେଳା ୨.୦ ର ସଫଳତା ସମ୍ବଲପୁର ପୋଲିସର ଟେକ୍ନୋଲୋଜି-ସକ୍ଷମ ତଦନ୍ତ, ଶୀଘ୍ର ସମ୍ପତ୍ତି ପୁନରୁଦ୍ଧାର ଏବଂ ଦାୟିତ୍ୱବାନ ପୋଲିସିଂ ଉପରେ ଗୁରୁତ୍ୱକୁ ଦର୍ଶାଉଛି l

ସମ୍ବଲପୁର ଆରକ୍ଷୀ ଅଧିକ୍ଷକ ମୁକେଶ ଭାମୁ, ଅତିରିକ୍ତ ଆରକ୍ଷୀ ଆରକ୍ଷୀ ଅଧିକ୍ଷକ ଅଜୟ କୁମାର ମିଶ୍ର, ଶ୍ରୀମନ୍ତ କୁମାର ବାରିକ, ସଦର ଏସଡିପିଓ ତୋଫାନ ବାଗ, ସାଇବର ଥାନା ର ଥାନାଧିକାରୀ ଈଶ୍ୱର ତାଣ୍ଡି ଙ୍କର ପ୍ରୟାସ ପ୍ରଶଂସାଯୋଗ୍ୟ l 

ଏହି ଅବସରରେ ଆରକ୍ଷୀ ଅଧିକ୍ଷକ ଶ୍ରୀ ଭାମୁ ଜନସାଧାରଣ ଙ୍କୁ ଅନୁରୋଧ କରିଛନ୍ତି ଯେ ଫୋନ୍ ହଜିଲେ ବା ଚୋରି ହେଲେ ତୁରନ୍ତ ଥାନାରେ ରିପୋର୍ଟ କରନ୍ତୁ ଏବଂ ସଠିକ୍ IMEI ନମ୍ବର ଦିଅନ୍ତୁ, ଯାହାଦ୍ୱାରା CEIR / ସଞ୍ଚାର ସାଥୀ ମାଧ୍ୟମରେ ଟ୍ରେସିଂ ଆରମ୍ଭ କରାଯାଇପାରିବ l ଆଜିର ଏହି ସାମ୍ବାଦିକ ସମ୍ବିଳନୀ ରେ ଜିଲ୍ଲା ପୋଲିସ ପ୍ରଶାସନ ପକ୍ଷରୁ ସାଇବର ଥାନା ଦ୍ୱାରା ଜବତ ଟଙ୍କା ଓ ମୋବାଇଲ ଗୁଡିକୁ ସମ୍ପୃକ୍ତ ବ୍ୟକ୍ତି ଙ୍କୁ ହସ୍ତାନ୍ତର କରାଯାଇଥିଲା l