19-Jun-2021

ଗୋଶାଳା,(ସଂଜୀବପାଣିଗ୍ରାହୀଙ୍କରିପୋର୍ଟ): ସମ୍ବଲପୁର "ସମାଜ" କାର୍ଯ୍ୟାଳୟର ମୁଦ୍ରଣ ମେସିନ ସହାୟକ ହୃଦୟ ରଞ୍ଜନ ଜେନା (୪୫) ଗତ ବୁଧବାର ରାତିରେ ରେମେଡ ଛକ ନିକଟରେ ସଡକ ଦୁର୍ଘଟଣାରେ ଗୁରୁତର ଆହତ ହୋଇ ବୁର୍ଲା ମେଡିକାଲରେ ଚିକିତ୍ସାଧିନ ଥିବାବେଳେ ଗୁରୁବାର ସଂଧ୍ୟାରେ ମୃତ୍ୟୁ ଘଟିଛି I ଏନେଇ ଅଏଁଠାପାଲି ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଥିବାବେଳେ, ଶବ ବ୍ୟବଛ୍ଛେଦ ପରେ ଶବକୁ ପରିବାର ବର୍ଗଙ୍କୁ ହସ୍ତାନ୍ତର ହୋଇଛି।ହୃଦୟ ଜଣେ ଶାନ୍ତ,ସରଳ, ମେଳାପି ବ୍ୟକ୍ତି ଭାବରେ,ଅଞ୍ଚଳର ବେଶ ଜଣାଶୁଣା ଥିବାବେଳେ, ଅଞ୍ଚଳରେ ଶୋକର ଛାୟା ଖେଳିଯାଇଛି। ମିଳିଥିବା ସୂଚନା ମୁତାବକ ସେ "ସମାଜ" କାର୍ଯ୍ୟାଳୟରେ ରାତି ଡ୍ୟୁଟି ରୁ କାମସାରି ପ୍ରତିଦିନ ଭଳି ଘରକୁ ଫେରୁଥିବାବେଳେ ସଡକ ଦୁର୍ଘଟଣାରେ ଗୁରୁତର ହୋଇ ପଡିଥିଲେ।ପୋଲିସ ଖବର ପାଇ ହୃଦୟକୁ ଉଦ୍ଧାର କରି ଭୀମସାର ବୁର୍ଲା ଡାକ୍ତରଖାନାରେ ଭର୍ତ୍ତି କରିଥିଲେ।ସେଠାରେ ବିଭାଗିୟ ଡାକ୍ତରଙ୍କ ଅପ୍ରାଣ ଉଦ୍ୟମ ପରେ ମଧ୍ୟ ବଞ୍ଚାଇପାରି ନଥିଲେ।ଗୁରୁବାର ସଧ୍ୟାରେ ଚିକିତ୍ସାଧିନ ଅବସ୍ଥାରେ କେନ୍ଦ୍ରିୟ ଆଇସିୟୁରେ ପ୍ରାଣବାୟୁ ଉଡିଯାଇଥିଲା।ଶୁକ୍ରବାର ପୂର୍ବାହ୍ନରେ ଶବ ବ୍ୟବଛ୍ଛେଦ ପରେ ପ୍ରଥମେ ବରେଇପାଲି ସ୍ଥିତ "ସମାଜ" କାର୍ଯ୍ୟାଳୟକୁ ଶବ ନିଆଯାଇଥିଲାବେଳେ, ସେଠାରେ ହୃଦୟଙ୍କୁ ଶ୍ରଦ୍ଧାଞ୍ଜଳୀ ଦିଆଯାଇଥିଲା।ପରେ ଚିପିଲିମା ଗାଁସ୍ଥିତ ବାସଭବନକୁ ଅଣାଯିବାପରେ ଶୋକାକୁଳ ପରିବେଶ ସହ କାନ୍ଦବୋବାଳିରେ ଗାଁ ଉଛୁଳି ପଡିଥିଲା।ତାଙ୍କର ଅନ୍ତିମ ଶଯ୍ୟା ନିକଟରେ ତିନି ଭାଇ,ମାଁ,ସ୍ତ୍ରୀ,ଦୁଇ ପୁଅ , ମାମୁଁ,ମାଇଁ,  ପଡୋଶି ସହ ମାନ୍ୟଗଣ୍ୟ ବ୍ୟକ୍ତିବିଶେଷ ଅନ୍ତିମ ଦର୍ଶନ କରିଥିଲେ।ଶବ ଶୋଭାଯାତ୍ରା ସହ ଚିପିଲିମା ଶ୍ମଶାନକୁ ନେବାପରେ ବିଧି ମୁତାବକ ବଡ ପୁଅ ମୁଖାଗ୍ନି ଦେଇଥିଲେ।ଏପରି ଏକ ଦୁଃଖଦ ଖବର ରେ ଅଞ୍ଚଳର ବୁଦ୍ଧିଜୀବୀ ତଥା ସଚେତନ ମହଲରେ ଗଭୀର ଶୋକପ୍ରକାଶ କରାଯାଇଛି। ପ୍ରକାଶ ଥାଉକି ହୃଦୟର ବାପା କୀର୍ତ୍ତନ ଜେନା ମଧ୍ୟ କଟକ "ସମାଜ" କାର୍ଯ୍ୟାଳୟରେ କାର୍ଯ୍ୟରତ ଅବସ୍ଥାରେ ମୃତ୍ୟୁବରଣ କରିଥିବାବେଳେ,ତାଙ୍କର ସ୍ଥାନରେ ହୃଦୟ ଚାକିରିରେ ଅବସ୍ଥାପିତ ଥିଲେ I