31-May-2021

ବଲାଙ୍ଗିର (ପ୍ରେରଣା ଖବର) : କୋରୋନା ଛଡାଇ ନେଇଛି ଜୀବିକା ।ବହୁ ଲୋକ ଏବେ ନିଜ ନିଜ ବୃତ୍ତି, ଜୀବିକା କୁ ହରାଇ କଣ କରିବେ ଭାବି ପାରୁ ନାହାନ୍ତି ।ଗ୍ରାମୀଣ ଜୀବନର ବୃତ୍ତିଗତ କର୍ମରୁ ଦୂରେଇ ଯେଉଁ ମାନେ ସହର ମୁହାଁ  ହେଉଥିଲେ ,ସେମାନେ ଏବେ ଅନେକ ନିଜ ନିଜ ବୃତ୍ତି ବା ରୋଜଗାରରୁ ସଂପୂର୍ଣ୍ଣ ଭାବେ  ଦୂରରେ, କାରଣ ଏଇ କୋଭିଡ ମହାମାରୀ।
ଏ ଭିତରେ ଗୋଟିଏ ବର୍ଷ  ଆମ ଜୀବନରେ ଅନେକ ପରିବର୍ତ୍ତନ ଆଣିଛି। ହା ଅନ୍ନ ର ଭାବ ନ ହେଲେ ବି ଅନେକଙ୍କ ଭିତରେ ଅସହାୟତାର ଭାବ ରହିଛି।

ଅନ୍ଧାର ସବୁବେଳେ ରହେନାହିଁ। ସମସ୍ୟା   ସବୁଦିନ  ନ ଥାଏ। ଏଇ ଭାବ ଯଦି ଲୋକଙ୍କ ଭିତରେ ଆସେ, ତେବେ ପରିବର୍ତ୍ତନ ଆସିବାକୁ ବେଳ ଲାଗେ ନାହିଁ । ଫର୍ଚା ଆଲୁଅର ସକାଳ ଆସିବାକୁ ସୂଚନା ଦିଏ।ଏମିତି କିଛି ପରିବର୍ତ୍ତନ  ଓ ନୂଆ ଆଶା ସଂଚାରିତ ହୋଇଆସିବାର ସୂଚନା ମିଳେ ବଲାଙ୍ଗୀର ଜିଲ୍ଲା ପୁଇଁତଳା ବ୍ଲକ  ଆଟଗାଁ ଗ୍ରାମର କାଳିନ୍ଦ୍ରୀ ମାଝୀଙ୍କ  ନିଜର ଉଦ୍ୟମ ରେ ଆରମ୍ଭ ହୋଇଥିବା  ଛତୁ ଉତ୍ପାଦନ କେନ୍ଦ୍ରକୁ ଦେଖିଲେ ।କୋଭିଡ ମହାମାରୀ ସମୟରେ ଜୀବିକାର ବିପନ୍ନତା ତାଙ୍କୁ ହରେଇ  ନାହିଁ, ବରଂ ନୂତନ କର୍ମରେ ନୂଆ ଆଶା ସଂଚାରିତ  

 କରିଛି l ପ୍ରଥମ ଥର ପାଇଁ ଲକଡାଉନ ସଟଡାଉନକୁ କୌଣସି ପ୍ରକାରେ ସଂଭାଳି ନେଇଥିଲେ  କାଳନ୍ଦ୍ରୀ। ସେଇ ସମୟରୁ ଜୀବିକାର ପରିବର୍ତ୍ତନ କରିବାକୁ ସେ ଆରମ୍ଭ କରିଥିଲେ ବାଟ ଖୋଜା।ନିଜର ଉଦ୍ୟମ,  କୃଷି ଓ ଉଦ୍ୟାନ ବିଭାଗକୁ ଯାଇ ସେମାନଙ୍କ ପାଖରୁ ସୂଚନା ଆଣି ଆଗରୁ ଛତୁ ଚାଷ କରୁଥିବା ଉଦ୍ୟୋଗୀ ମାନଙ୍କୁ ପଚାରି ବୁଝିଥିଲେ ସେ। ଏପରିକି  ୟୁଟ୍ବବ ରୁ ମଧ୍ୟ  ଛତୁ ଚାଷ କିପରି ଭାବରେ ହେଉଛି ଦେଖିଥିଲେ। ତାପରେ ନିଜ ଜମିରେ ବାଉଁଶ ବାନ୍ଧି,କୋଡିଏ ଫୁଟ ଓ ପଚାଶ ଫୁଟରୁ ଘର ତିଆରି ସେଠାରେ ପରୀକ୍ଷାମୂଳକ ଭାବରେ ଛତୁ ଚାଷ ଆରମ୍ଭ କରିଥିଲେ। ପ୍ରଥମ ଉଦ୍ୟମ ର ସଫଳତା ତାଙ୍କର ଭିତରେ ଭରିଦେଇଛି ଅନେକ ଆଶା।

 ଖୁବ କମ ଦିନ ଭିତରେ ସେ ବଢାଇଛନ୍ତି  ଛତୁ ଚାଷକୁ।ଅଂଚଳରେ ଲୋକଙ୍କ ଚାହିଦା  ମୁତାବକ ଏବେବି ସେ ସୁନ୍ଦର ପାଳଛତୁ ଉତ୍ପାଦନ କରି ଆସୁଛନ୍ତି । ନିଜେ ନିଜ ପରିବାର ସହାୟତାରେ ଛତୁ ଚାଷ କୁ ଆରମ୍ଭ କରିଥିବା କାଳନ୍ଦ୍ରୀ ଏବେ ଅନ୍ୟ ମାନଙ୍କ ମଧ୍ୟରେ  ବି ନୂଆ ଆଶା ସଂଚାରିତ କରିବାକୁ ଆଗଭର।ପୂର୍ବରୁ କରୁଥିବା ଜୀବିକାକୁ ଫେରିବେ ନାହିଁ ବରଂ ଛତୁଚାଷକୁ ନେଇ ସେ ଆଗକୁ ବଢିବାକୁ    ସଂକଳ୍ପ ନେଇଛନ୍ତି ।

ନିଜ ଚାଷଜମିର ବାଉଁଶର ବ୍ୟବହାର କରି ଘର ଓ ଭାଡି ପ୍ରସ୍ତୁତ କରି, ଅନ୍ୟ ମାନଙ୍କ ଜମିରେ ପଡିଥିବା  ନଡା ଓ ପୁଆଳକୁଟାକୁ ସଂଗ୍ରହ କରି ସେ ଆରମ୍ଭ କରିଛନ୍ତି  ଏଇ ଛତୁ ଚାଷ।ଶାରିରୀକ ପରିଶ୍ରମ ଉପରେ ଜୋର ଦେଇ ସେ ନିଜର ଏଇ ଉଦ୍ୟମକୁ ନୂଆ ବାଟକୁ ଆପଣେଇ ଛନ୍ତି ।