10-Apr-2021

ଭୁବନେଶ୍ୱର,(ପ୍ରେରଣା ଖବର ବ୍ୟୁରୋ) : ସମ୍ପ୍ରତି ପିପିଲିରେ ରାଜନୀତିକ ପାରଦ ଉପରମୁହାଁ ହୋଇଛି  । ପ୍ରାର୍ଥୀମାନେ ନିଜ ସମର୍ଥକମାନଙ୍କୁ ଧରି ଦୁଆର ଦୁଆର ବୁଲି ଭୋଟ ଭିକ୍ଷା କରୁଛନ୍ତି  । ବିଜେଡ଼ି ପ୍ରାର୍ଥୀ ରୁଦ୍ର ମହାରଥି ଓ ବିଜେପି ପ୍ରାର୍ଥୀ ଆଶ୍ରୀତ ପଟ୍ଟନାୟକ ଦିନରାତି ଏକ କରି ଭୋଟରଙ୍କୁ ଆକୁର୍ଷ୍ଟ କରିବାରେ ଲାଗିଛନ୍ତି  । ତେବେ ଆଉ ୭ ଦିନ ପରେ ନିର୍ବାଚନ ହେବାର ଥିବାବେଳେ ପ୍ରଚାର ପାଇଁ ହାତରେ ୬ ଦିନ ରହିଛି  । କିନ୍ତୁ କଂଗ୍ରେସ ପ୍ରାର୍ଥୀ ଅଜିତ ମଙ୍ଗରାଜ ଆଉ ନିର୍ବାଚନ ପ୍ରାଚର କରିବେ ନାହିଁ  । ଖାଲି ଅଜିତ ନୁହଁନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ଠାରୁ ଆରମ୍ଭ କରି ଅନେକ ବରିଷ୍ଠ ନେତାଙ୍କ ପର୍ଯ୍ୟନ୍ତ ନିର୍ବାଚନ କରିବା ନେଇ ଆଶଙ୍କା ପ୍ରକାଶ ପାଇଛି  ।

ଅଜିତ ଏବେ କରୋନାରେ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି  । ପୂର୍ବରୁ ସେ ନିର୍ବାଚନ ପ୍ରଚାର ବେଳେ ଅସୁସ୍ଥ ହେବାରୁ ବିଶ୍ରାମ ନେଉଥିଲେ  । ତାଙ୍କୁ ଡେଲାଙ୍ଗ ଡାକ୍ତରଖାନାରେ ଭର୍ତି କରାଯାଇଥିଲା  । ସେଠାରେ ତାଙ୍କ ସ୍ଥିତି ନସୁଧୁରିବାରୁ ଅଜିତଙ୍କୁ ଭୁବନେଶ୍ୱରର ଏକ ଘରୋଇ ହସପିଟାଲକୁ ସ୍ଥାନାନ୍ତର କରାଯାଇଥିଲା  । ସ୍ୱାବ ପରୀକ୍ଷା ପରେ ତାଙ୍କୁ କରୋନା ହୋଇଥିବା ଜଣାପଡ଼ିଛି  । ଯାହାକି ଦଳୀୟ କର୍ମୀଙ୍କୁ ହତୋତ୍ସାହିତ କରିଦେଇଛି  । ସେହିପରି ପିସିସି ସଭାପତି ନିରଞ୍ଜନ ପଟ୍ଟନାୟକ ୪ ଦିନ ପାଇଁ ଆଇସୋଲେସନରେ ରହିଥିବାବେଳେ ଏହାପରେ ତାଙ୍କର ମଧ୍ୟ ପରୀକ୍ଷା ହେବ  । ପିପିଲିରେ କରୋନା ଗାଇଡ଼ଲାଇନର ଅନୁପାଳନ ହେଉନାହିଁ । ରାଜ୍ୟର ବିଭିନ୍ନ ଅଂଚଳର ନେତା ଲୋକଙ୍କ ପାଖକୁ ଯାଇ ମିଳାମିଶା କରୁଛନ୍ତି  । ଅଜିତ ଆକ୍ରାନ୍ତ ହୋଇଥିବାରୁ ତାଙ୍କର ଘନିଷ୍ଠ ସହଯୋଗୀମାନେ ବି ଆକ୍ରାନ୍ତ ହେବାର ଆଶଙ୍କା ରହିଛି  ।