18-Mar-2021

ଚଣ୍ଡୀଗଡ଼ (ପ୍ରେରଣା ଖବର ବ୍ୟୁରୋ) :: ଚଣ୍ଡୀଗଡ଼ରୁ ଏକ ଚାଞ୍ଚଲ୍ୟକର ଆତ୍ମହତ୍ୟା ମାମଲା ସାମ୍ନାକୁ ଆସିଛି। ଅମ୍ବାଲା ରୋଡ଼ ସ୍ଥିତ ମୋତିୟା ରୟାଲ ସିଟିରେ ଜଣେ ୨୮ ବର୍ଷୀୟ ଯୁବକ ୧୨ ମହଲା କୋଠାରୁ ଡେଇଁ ଆତ୍ମହତ୍ୟା କରିଛନ୍ତି। ମୃତକ ଜଣକ ହେଲେ ହିରାଜ ପଟେଲ। ତାଙ୍କ ଘର ଗୁଜରାଟରେ। କିନ୍ତୁ ଏବେ ସେ ମୋତିୟା ରୟାଲ ସିଟି ଟାୱାର ନମ୍ବର-୫ର ୧୨୦୩ ନମ୍ବର ଫ୍ଲାଟରେ ନିଜ ପତ୍ନୀଙ୍କ ସହ ରହୁଥିଲେ। ହିରାଜ ଆପାର୍ଟମେଟ ବାଲକନିରୁ ଡେଇଁବା ସମୟରେ ଘରେ ତାଙ୍କ ପତ୍ନୀ, ମା’ ଓ ଶାଶୁ ଉପସ୍ଥିତ ଥିଲେ ବୋଲି କୁହାଯାଉଛି।

ହିରାଜ ୧୨ ମହଲା କୋଠାରୁ ଡେଇଁବା ପରେ ତଳେ ପାର୍କିଙ୍ଗରେ ଥିବା ନିଜ ଫର୍ଚୁନର ଗାଡି ଉପରେ ପଡ଼ିଥିଲେ। ସେ ପଡିବ ପରେ ବହୁତ ଜୋର ଶବ୍ଦ ହୋଇଥିଲା। ଶବ୍ଦ ଶୁଣି ଆଖପାଖ ଲୋକ ଘରୁ ବାହାରି ଆସିଥିଲେ। ହିରାଜଙ୍କୁ ତୁରନ୍ତ ଏମ କେୟାର ହସ୍ପିଟାଲ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷିତ କରିଥିଲେ।

ଜିରକପୁର ଥାନା ପ୍ରଭାରୀ ଓଁକାର ସିଂହ କହିଛନ୍ତି ଯେ ଘଟଣାସ୍ଥଳରୁ କୌଣସି ସୁଇସାଇଡ ନୋଟ ମିଳିନାହିଁ। ମୃତଦେହ ବ୍ୟବଚ୍ଛେଦ ପାଇଁ ସିଭିଲ ହସ୍ପିଟାଲକୁ ପଠାଯାଇଛି। ହିରାଜଙ୍କ ଅଚାନକ ଆତ୍ମହତ୍ୟାରେ ତାଙ୍କ ପରିବାର ଶୋକରେ ଅଛନ୍ତି। ସେଥିପାଇଁ ପରିବାର ଲୋକଙ୍କ ବୟାନ ରେକର୍ଡ ହୋଇପାରିନାହିଁ | ଶବ ବ୍ୟବଛେଦ ଓ ବୟାନ ରେକର୍ଡ ପରେ ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।

ସୂଚନା ଅନୁଯାୟୀ, ହିରାଜ ମୋହାଲିର ଏକ ଘରୋଇ କମ୍ପାନୀରେ ଚାକିରୀ କରୁଥିଲେ। ୧୫ ଦିନ ପୂର୍ବରୁ ତାଙ୍କ ଚାକିରୀ ଚାଲି ଯାଇଥିଲା ଓ ସେ ନୂଆ ଚାକିରୀ ଖୋଜୁଥିଲେ। ଚାକିରୀ ନଥିଲା ବୋଲି ସେ ଡିପ୍ରେସନରେ ଥିଲେ। ପରିବାର ଲୋକଙ୍କ କହିବାନୁଯାୟୀ ସେ କିଛି ଦିନ ହେଲା ଚୁପ ଚୁପ ରହୁଥିଲେ। ହିରାଜ ଚାକିରୀ ପାଇଁ ଆତ୍ମହତ୍ୟା କରିଥାଇପାରନ୍ତି ବୋଲି ପୋଲିସ ସନ୍ଦେହ କରୁଛି। ହିରାଜ ବିବାହିତ ଥିଲେ କିନ୍ତୁ ତାଙ୍କର ପିଲାଛୁଆ ନଥିଲା।