18-Mar-2021

ଝାରସୁଗୁଡ଼ା(ପ୍ରେରଣା ଖବର ବ୍ୟୁରୋ): ରାଜ୍ୟରେ ସାଇବର ଠକେଇ ବଢ଼ି ବଢ଼ି ଚାଲିଥିବା ବେଳେ ଝାରସୁଗୁଡା ପୋଲିସ କୁ ମିଳିଛି ବଡ ସଫଳତା। ଅନଲାଇନରେ ଲୋକଙ୍କୁ ଠକୁଥିବା ଏକ ସାଇବର ଠକକୁ ଟ୍ରାକ୍ କରି ବିହାରର ନେପାଳ ସୀମାବର୍ତ୍ତୀ ଅଞ୍ଚଳରୁ ପୋଲିସ ଗିରଫ କରିଛି।

ଖବର ଅନୁଯାୟୀ, ବେଲପାହାଡ଼ର ଜଣେ ଯୁବତୀଙ୍କୁ ଲଟେରୀ ଲାଗିଥିବା କହି ତାଙ୍କଠାରୁ ଟଙ୍କା ଠକିନେଇଥିଲା ଏହି ସାଇବରର୍ ଠକ। ଠକେଇର ଶିକାର ହୋଇଥିବା ଯୁବତୀ ଜଣକ ଗାନ୍ଧୀନଗରର ଶକ୍ତି ଛତରଙ୍କ ଝିଅ ନିତା ଛତର। ଗତ ଫେବ୍ରୁଆରୀ ୨୩ ରାତିରେ ଏକ ଅଜଣା ନମ୍ବରରୁ ନିତାଙ୍କ ପାଖକୁ ଫୋନ ଆସିଥିଲା। କୌନ ବନେଗା କରୋଡପତିର ଲଟେରୀ ବିଜେତା ହୋଇଥିବା ଦର୍ଶାଇ ବେଲପାହାଡ଼ର ଏହି ଯୁବତୀଙ୍କୁ ଫୋନ କରିଥିଲା ସାଇବର ଠକ । କୌନ ବନେଗା କରୋଡପତିରେ ୩୫ ଲକ୍ଷ ଟଙ୍କାର ଲଟେରୀ ଜିତିଛନ୍ତି ବୋଲି କହିଥିଲା । ଏହାପରେ ୫ଟି ପର୍ଯ୍ୟାୟରେ ଲକ୍ଷେ ୬୯ ହଜାର ଟଙ୍କା ଠକି ନେଇଥିଲା।

ଠକେଇର ଶିକାର ହୋଇଥିବା ଜାଣି ନିତା ପୋଲିସ ନିକଟରେ ଅଭିଯୋଗ କରିଥିଲେ। ଏକ ସ୍କ୍ୱାର୍ଡ ଗଠନ କରି ପୋଲିସ ସାଇବର ଠକଙ୍କୁ ଟ୍ରାକ କରିଥିଲା। ବିହାରର ଚମ୍ପାରନ ଜିଲ୍ଲାରୁ ଏହି ଅପରାଧୀମାନେ ନେଟୱର୍କ ଚଳାଉଥିବା ଜାଣିଥିଲା ପୋଲିସ। ଚମ୍ପାରନରୁ ନିରଜ କୁମାର ନାମକ ଏହି ଗ୍ୟାଙ୍ଗର କିଙ୍ଗପିନ୍ କୁ ଗିରଫ କରିଥିଲା ଝାରସୁଗୁଡ଼ା ପୋଲିସର ସ୍ବତନ୍ତ୍ର ସ୍କ୍ବାର୍ଡ। ନିରଜକୁ ପୋଲିସ ନେପାଳ ସୀମାରୁ ଉଠାଇ ଆଣିବାରେ ସକ୍ଷମ ହୋଇଥିବା ବେଳେ , ତାର ସହଯୋଗୀମାନେ ଖୁବ୍ ଶୀଘ୍ର ଧରାପଡିବେ ବୋଲି ଏସ.ପି କହିଛନ୍ତି ।

ତେବେ ମୁଖ୍ୟ ଆସାମୀ ନିରଜ କୁମାର ସଂଗଠିତ ଭାବେ କ୍ରାଇମ କରୁଥିଲା । ବୟସ ପାଖାପାଖି ୨୫ ହେବ । ବେଶୀ ଶିକ୍ଷିତ ହୋଇ ନଥିବା ସତ୍ତ୍ୱେ ବ୍ୟାଙ୍କ ଖାତାରୁ କିପରି ଲୁଟ କରାଯାଇ ପାରିବ ସେ ସେଥିରେ ଖୁବ ମାହିର ବୋଲି ଜଣାପଡ଼ିଛି। ଅଳ୍ପ ସମୟ ମଧ୍ୟରେ ନିରଜ ୩ କୋଟି ଟଙ୍କାର ମାଲିକ ହୋଇଥିବା ବେଳେ, ତାର ସହଯୋଗୀମାନେ ମଧ୍ୟ ମାଲାମାଲ ହୋଇଛନ୍ତି । ନିରଜ ଓ ତା ସହଯୋଗୀଙ୍କ ବିଭିନ୍ନ ବ୍ୟାଙ୍କ ଆକାଉଣ୍ଟରେ ଥିବା ୪୪ ଲକ୍ଷ ଟଙ୍କା କୁ ଫ୍ରିଜ୍ କରାଯାଇଥିବା ଝାରସୁଗୁଡ଼ା ଏସ .ପି କହିଛନ୍ତି ।

ଅପରପକ୍ଷରେ ନିରଜ କୁମାର କ୍ୟାମେରା ଆଗରେ ଅନଲାଇନ୍ ଠକେଇକୁ ସ୍ୱୀକାର କରିଛି। ଲୋଭର ବଶବର୍ତ୍ତି ହୋଇ ସିମ୍ କାର୍ଡକୁ ୧୦ ହଜାର ଟଙ୍କା ବଦଳରେ ଅନ୍ୟ ଲୁଟେରାଙ୍କୁ ଦେଇଥିଲା ବୋଲି କହି କାନ୍ଦିବାର ଅଭିନୟ କରିଥିଲା । ନିରଜ କୁମାର ଗିରଫ ଘଟଣାରେ ରାଜ୍ୟ ପୋଲିସ ମହାନିର୍ଦ୍ଦେଶକ ଜିଲ୍ଲା ପୋଲିସକୁ ପ୍ରଶଂସା କରିବା ସହ ୨୦ ହଜାର ଟଙ୍କା ପୁରସ୍କାର ରାଶି ଘୋଷଣା କରିଛନ୍ତି ।