09-Feb-2021

ସାନଖେମୁଣ୍ଡି,(ପ୍ରେରଣା ଖବର ବ୍ୟୁରୋ): ଗଞ୍ଜାମ ଜିଲା କୁକୁଡ଼ାଖଣ୍ଡି ବ୍ଳକ  ନୂଆ ଅନନ୍ତେଇ ଗ୍ରାମରେ ଘଟିଥିବା ପାନ ଦୋକାନୀ ଦୁଷ୍ମନ୍ତ ଚୌଧୁରୀ ହତ୍ୟା ମାମଲାରେ ପୋଲିସକୁ ସଫଳତା ମିଳିଛି । ଅନନ୍ତେଇ ଗ୍ରାମର ମନୋଜ ସେଠୀ, ରାଜେଶ ଗୌଡ ଏବଂ ଉପେନ୍ଦ୍ର ନାୟକଙ୍କୁ ସୋମବାର ଦିଗପହଣ୍ଡି ପୋଲିସ ଗିରଫ କରି ବ୍ରହ୍ମପୁର ସଦର କୋର୍ଟକୁ ଚାଲାଣ କରିଛି। ପାନ ଦୋକାନୀ ଦୁଷ୍ମନ୍ତ ଚୌଧୁରୀଙ୍କ ହତ୍ୟା ମାମଲାରେ ସେମାନେ ଅଭିଯୁକ୍ତ ଥିବା ପୋଲିସ କହିଛି। 

 ଥାନା ମାମଲା ନଂ. ୨୬/୨୧ ଅନୁଯାୟୀ ଜାମିନ ଆବେଦନ ଖାରଜ ହେବାରୁ ସେମାନଙ୍କୁ ବ୍ରହ୍ମପୁର ଜେଲ ହାଜତକୁ ପଠାଇ ଦିଆଯାଇଛି।
 ସୂଚନାନୁସାରେ, ଗତ ୩୧ ତାରିଖ ରାତି ପ୍ରାୟ ୯ ଟା ରେ ସିଗାରେଟ ଓ ପାଣି ପାଉଚ ବାକିରେ ମାଗିବାକୁ କେନ୍ଦ୍ରକରି ପାନ ଦୋକାନୀ ଦୁଷ୍ମନ୍ତଙ୍କ ସହ କିଛି ଯୁବକଙ୍କ ବଚସା ହୋଇଥିଲା। ଏଥିରେ ଉତ୍ତେଜିତ ହୋଇ  ବିଳମ୍ବିତ ରାତିରେ ଦୁଷ୍ମନ୍ତଙ୍କୁ ଘରୁ ରାସ୍ତା ଉପରକୁ ଟାଣି ନେଇ କିଛି ଯୁବକ ଲୁହା ରଡରେ ମାଡ଼ ମାରିବା ସହ  ସଂଘବଦ୍ଧ ଭାବେ ତାଙ୍କ ଛାତିରେ ପଥର ଛେଚି ନୃଶଂସ ଭାବେ  ହତ୍ୟା କରିଥିଲେ।
ପୋଲିସ ଗତ ୩ ତାରିଖରେ ଏହି ମାମଲାରେ ସମ୍ପୃକ୍ତ ଥିବା ଅଭିଯୋଗରେ ନୂଆ ଅନନ୍ତେଇ ଗ୍ରାମର ଶଙ୍କର ଦାସ ଓ ବାପିନି ପାତ୍ରଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ। ଘଟଣାର ପରଦିନ ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ସବିଶେଷ ତଦନ୍ତ କରି ଫେରିଥିଲେ।  ଅଭିଯୁକ୍ତମାନଙ୍କ ନିକଟରୁ ପୋଲିସ ୨ଟି ଖଣ୍ଡା,୩ ଟି ଲୁହା ଛଡ଼ ସମେତ ଘଟଣାସ୍ଥଳରୁ ୧୫ ରୁ ଉର୍ଦ୍ଧ୍ବ ପଥର ଖଣ୍ଡ ଜବତ କରାଯାଇଥିବା ଆଇଆଇସି ବସନ୍ତ କୁମାର ସେଠୀ କହିଛନ୍ତି।