23-Jun-2026

ସିନାପାଲି(ପରମେଶ୍ୱର ମେହେର): ନୂଆପଡା ଜିଲ୍ଲା ସିନାପାଲି ବ୍ଲକ ଟିମନପୁର ପଞ୍ଚାୟତ ଅନ୍ତର୍ଗତ ମାଲପଡା ଗ୍ରାମରେ ଏକ ଗୁରୁତର ଏବଂ ଚିନ୍ତାଜନକ ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଗ୍ରାମର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ଠାରୁ ମାତ୍ର ପ୍ରାୟ ୨୦୦ ମିଟର ଦୂରତା ମଧ୍ୟରେ ମଦ ବିକ୍ରି ହେଉଥ‌ିବା ଅଭିଯୋଗ ସାମ୍ନାକୁ ଆସିଛି। ଯେଉଁ ସ୍ଥାନରୁ ଆଗାମୀ ପିଢ଼ି ଶିକ୍ଷା, ସଂସ୍କାର ଓ ସୁନ୍ଦର ଭବିଷ୍ୟତର ପାଠ ଶିଖୁଛନ୍ତି, ସେହି ଶିକ୍ଷାନୁଷ୍ଠାନ ନିକଟରେ ନିଶା କାରବାର ଚାଲିବା ଘଟଣା ସାଧାରଣ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଛି। ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଦୀର୍ଘ ଦିନ ଧରି ଏହି ଅଞ୍ଚଳରେ ମଦ ବିକ୍ରି ଚାଲିଆସୁଥିଲେ ମଧ୍ୟ ସମ୍ପୂକୁ ବିଭାଗ ଏହା ଉପରେ କୌଣସି ଦୃଢ଼ ପଦକ୍ଷେପ ନେଉନଥିବା ଅଭିଯୋଗ ହେଉଛି। ପ୍ରତିଦିନ ସକାଳରୁ ସନ୍ଧ୍ୟା ପର୍ଯ୍ୟନ୍ତ ଶହ ଶହ ଛାତ୍ରଛାତ୍ରୀ ଏହି ରାସ୍ତା ଦେଇ ବିଦ୍ୟାଳୟକୁ ଯାତାୟାତ କରୁଥିବା ବେଳେ ନିଶାଦ୍ରବ୍ୟର ଏପରି ଖୋଲା କାରବାର ଶିକ୍ଷା ପରିବେଶକୁ ପ୍ରଭାବିତ କରୁଥିବା ମତ ପ୍ରକାଶ ପାଉଛି। ଅଭିଭାବକମାନଙ୍କ କହିବା ଅନୁଯାୟୀ, ବିଦ୍ୟାଳୟ ନିକଟରେ ମଦ ବିକ୍ରି ହେବା ଫଳରେ ପିଲାମାନଙ୍କ ମନରେ ଖରାପ ପ୍ରଭାବ ପଡ଼ିବାର ଆଶଙ୍କା ରହିଛି। ଅନେକ ସମୟରେ ମଦ୍ୟପ ବ୍ୟକ୍ତିମାନଙ୍କ ଆସାଯାଆ, ଉଚ୍ଚସ୍ବରରେ କ‌ଥାବାର୍ତ୍ତା ଏବଂ ଅଶୋଭନୀୟ ଆଚରଣ ଯୋଗୁଁ ବିଦ୍ୟାଳୟକୁ ଯାଉଥିବା ଛାତ୍ରଛାତ୍ରୀ ଓ ମହିଳାମାନେ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ମଧ୍ୟ ହେଉଛି। ଶିକ୍ଷାର ପରିବେଶ ସୃଷ୍ଟି କରିବା ପରିବର୍ତ୍ତେ ଯଦି ନିଶାର ପରିବେଶ ଗଢ଼ିଉଠେ, ତେବେ ଏହାସମାଜ ପାଇଁ ଏକ ଅଶୁଭ ସଙ୍କେତ ବୋଲି ସଚେତନ ମହଲ ମତ ପ୍ରକାଶ କରିଛନ୍ତି। ସରକାର ଗୋଟିଏ ପଟେ ନିଶାମୁକ୍ତ ସମାଜ ଗଠନ, ଶିକ୍ଷାର ଉନ୍ନତି ଓ ଯୁବପିଢ଼ୀଙ୍କୁ ସଠିକ୍ ଦିଗଦର୍ଶନ ଦେବା ପାଇଁ ବିଭିନ୍ନ ଯୋଜନା ଏବଂ ସଚେତନତା କାର୍ଯ୍ୟକ୍ରମ ଚଳାଉଥ‌ିବା ବେଳେ, ଅନ୍ୟପଟେ ବିଦ୍ୟାଳୟ ନିକଟରେ ଏଭଳି ମଦ ବିକ୍ରି ଚାଲିବା ପ୍ରଶାସନିକ ବ୍ୟବସ୍ଥା ଉପରେ ଅନେକ ପ୍ରଶ୍ନ ଉଠାଇଛି। ଏହି କାରବାର କାହାର ଛତ୍ରଛାୟାରେ ଚାଲିଛି ଏବଂ କାହିଁକି ଏହା ଉପରେ ଅଙ୍କୁଶ ଲଗାଯାଉନାହିଁ, ତାହାକୁ ନେଇ ସାଧାରଣରେ ଚର୍ଚ୍ଚା ଜୋର ଧରିଛି। ଗ୍ରାମବାସୀ, ଅଭିଭାବକ ଏବଂ ସଚେତନ ନାଗରିକମାନେ ଜିଲ୍ଲା ପ୍ରଶାସନ, ଆବକାରୀ ବିଭାଗ, ସ୍ଥାନୀୟ ପୋଲିସ ଏବଂ ବ୍ଲକ ପ୍ରଶାସନଙ୍କୁ ଏହି ଘଟଣାର ତୁରନ୍ତି ତଦନୁ କରିବା ସହ ବିଦ୍ୟାଳୟ ନିକଟରେ ଚାଲିଥିବା ମଦ ବିକ୍ରିକୁ ବନ୍ଦ କରିବାକୁ ଦାବି କରିଛନ୍ତି। ଏବେ ପ୍ରଶ୍ନ ଉଠୁଛି, ଶିକ୍ଷାର ମନ୍ଦିର ନିକଟରେ ଚାଲିଥିବା ଏହି ନିଶା କାରବାର ବିରୋଧରେ ପ୍ରଶାସନ କେବେ କଠୋର ପଦକ୍ଷେପ ନେବ ? ଛାତ୍ରଛାତ୍ରୀଙ୍କ ଭବିଷ୍ୟତ, ଶିକ୍ଷାର ପରିବେଶ ଏବଂ ସମାଜର ସୁସୁ ବିକାଶ ସହ ଜଡିତ ଏହି ଗୁରୁତର ପ୍ରସଙ୍ଗରେ ପ୍ରଶାସନ ନିରବ ରହିବ ନା ତୁରନ୍ତ କାର୍ଯ୍ୟାନୁଷ୍ଠାନ ନେବ, ତାହାକୁ ନେଇ ଅଞ୍ଚଳବାସୀ ଅପେକ୍ଷା କରିଛନ୍ତି। ଯଦି ଶୀଘ୍ର ପଦକ୍ଷେପ ନିଆନଯାଏ, ତେବେ ଆଗାମୀ ଦିନରେ ଜନଅସନ୍ତୋଷ ଆହୁରି ତୀବ୍ର ହେବା ସହ ଏହି ପ୍ରସଙ୍ଗ ବୃହତ୍ ଆନ୍ଦୋଳନର ରୂପ ନେଇପାରେ ବୋଲି ସ୍ଥାନୀୟ ଲୋକେ ଚେତାବନୀ ଦେଇଛନ୍ତି।