23-Jun-2026

ବରପାଲି- (ସୁଦାମ ଦୀପ )
 ବରଗଡ଼ ଜିଲ୍ଲା ବରପାଲି ଥାନା ସତଳମା ଗ୍ରାମ ପଞ୍ଚାୟତ ଅନ୍ତର୍ଗତ ଏକ କେନାଲ ନିକଟରୁ ଉଦ୍ଧାର ହୋଇଥିବା ଅଜ୍ଞାତ ମହିଳାଙ୍କ ମୃତଦେହ ଘଟଣାର ସଫଳ ପର୍ଦ୍ଦାଫାଶ କରିଛି ବରଗଡ଼ ପୋଲିସ,ଧାର ଦେଇଥିବା ଟଙ୍କା ଫେରସ୍ତ ମାଗିବାରୁ ଜଣେ ୫୫ ବର୍ଷୀୟା ମହିଳାଙ୍କୁ ହତ୍ୟା କରାଯାଇଥିବା ପୋଲିସ ତଦନ୍ତରୁ ଜଣାପଡ଼ିଛି। ଏହି ଘଟଣାରେ ମୁଖ୍ୟ ଅଭିଯୁକ୍ତ ରମାକାନ୍ତ ପୂଜାରୀଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ମୃତ ମହିଳା ହେଲେ ବଲାଙ୍ଗୀର ଜିଲ୍ଲା ଦେଓଗାଁ ଥାନା ଅନ୍ତର୍ଗତ ସାହାଜବାହାଲ ଗାଁର ମମତା ହୋତା (୫୫)। ଗତ ୨୧ ତାରିଖ ସକାଳେ ସତଳମା ଅଞ୍ଚଳର ଏକ କେନାଲ ମୁହାଣରେ ତାଙ୍କ ମୃତଦେହ ପଡ଼ିଥିବା ଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ। ସରପଞ୍ଚଙ୍କ ସ୍ୱାମୀ ରାଘବ ନାଏକଙ୍କ ଏତଲା ଆଧାରରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ବରଗଡ଼ ଏସପିଙ୍କ ନିର୍ଦ୍ଦେଶରେ ବରଗଡ଼ ଏସଡିପିଓ, ଟାଉନ ଥାନା ଆଇଆଇସି ଓ ବରପାଲି ଆଇଆଇସିଙ୍କୁ ନେଇ ତିନୋଟି ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା। ସାଇଣ୍ଟିଫିକ୍ ଟିମ୍ ସହାୟତାରେ ଘଟଣାସ୍ଥଳରୁ ବିଭିନ୍ନ ପ୍ରମାଣ ସଂଗ୍ରହ କରାଯାଇଥିଲା।
ସାମାଜିକ ଗଣମାଧ୍ୟମରେ ମୃତଦେହର ଫଟୋ ପ୍ରଚାର ହେବା ପରେ ପରିବାର ଲୋକେ ମମତାଙ୍କୁ ଚିହ୍ନଟ କରିଥିଲେ। ତଦନ୍ତ ସମୟରେ ଜଣାପଡ଼ିଥିଲା ଯେ
ବେହେରାମାଲ ଗାଁର ରମାକାନ୍ତ ପୂଜାରୀ ମମତାଙ୍କଠାରୁ କିଛି ଟଙ୍କା ଧାର ନେଇଥିଲେ। ଟଙ୍କା ଫେରାଇବାକୁ ମମତା ବାରମ୍ବାର ଚାପ ପକାଉଥିବାରୁ ରମାକାନ୍ତ ତାଙ୍କୁ ହତ୍ୟା କରିଥିବା ପୋଲିସ ତଦନ୍ତରୁ ସ୍ପଷ୍ଟ ହୋଇଛି। ହତ୍ୟା ପରେ ଅଭିଯୁକ୍ତ ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ମୃତଦେହକୁ କେନାଲ ନିକଟରେ ଫିଙ୍ଗି ଦେଇଥିବା ଜଣାପଡ଼ିଛି। ପୋଲିସ ଅଭିଯୁକ୍ତକୁ ଗିରଫ କରି ତାଙ୍କ ବିରୋଧରେ ହତ୍ୟା ସମେତ ବିଭିନ୍ନ ସଙ୍ଗୀନ ଦଫା ଲଗାଇ କୋର୍ଟ ଚାଲାଣ କରିଛି।
ଅତି କମ୍ ସମୟ ମଧ୍ୟରେ ଅଜ୍ଞାତ ଶବ ଉଦ୍ଧାର ମାମଲାର ସମାଧାନ କରି ଅଭିଯୁକ୍ତକୁ ଧରିବାରେ ବରଗଡ଼ ପୋଲିସର ତ୍ୱରିତ ଓ ଦକ୍ଷ ତଦନ୍ତକୁ ସାଧାରଣରେ ପ୍ରଶଂସା କରାଯାଉଛି।