04-Apr-2026

ବଲାଙ୍ଗୀର(ପ୍ରେରଣା ଖବର)- ବଲାଙ୍ଗୀର ପୌର ପରିଷଦ ତରଫରୁ ଜିଲ୍ଲା ପରିଷଦ କାର୍ଯ୍ୟାଳୟ ସମ୍ମୁଖରେ ଏକ ମଡେଲ ଜଳ ଛତ୍ର ଆଜି ଉଦ୍ଘାଟନ କରାଯାଇଛି। ପୌରାଧ୍ୟକ୍ଷା ଲିକା ସାହୁଙ୍କ କରକମଳରେ ଏହି ଜଳ ଛତ୍ରର ଶୁଭ ଉଦ୍ଘାଟନ ହୋଇଥିଲା।
ଏହି ଜଳ ଛତ୍ରଟି ୱାର୍ଡ ନମ୍ବର ୧୯ର "ହର ଗୌରୀ ଏସଏଚଜି" ଙ୍କୁ  ନିଯୁକ୍ତି ଦିଆ ଯାଇଛି । ଏଠାରେ ସାଧାରଣ ଲୋକଙ୍କ ପାଇଁ ଲେମ୍ଭୁ ପାଣି, ଦହି ପାଣି, ରସନା ପାଣି, ମିଠା ପାଣି, ଥଣ୍ଡା ପାଣି ସହିତ ଥଣ୍ଡା ଗାମୁଛା ବ୍ୟବସ୍ଥା ରହିଛି। ସେଥିପାଇଁ ପ୍ରାଥମିକ ଚିକିତ୍ସା (ଫାଷ୍ଟ ଏଡ୍) ସୁବିଧା ମଧ୍ୟ ଉପଲବ୍ଧ ଅଛି। କୁଲର୍ ମାଧ୍ୟମରେ ଥଣ୍ଡା ପବନ ବ୍ୟବସ୍ଥା ସହିତ ପରିବେଶକୁ ସୁନ୍ଦର କରିବା ପାଇଁ ବିଭିନ୍ନ ଗଛପତ୍ର ରଖାଯାଇଛି।
ଏହି କାର୍ଯ୍ୟକ୍ରମରେ ଉପ ପୌରାଧ୍ୟକ୍ଷା ଗାୟତ୍ରୀ ଭୋଇ, ପୌର ପରିଷଦର ନିର୍ବାହୀ ଅଧିକାରୀ, କାଉନସିଲର ଶମ୍ଭୁ ନାଗ, ଗଙ୍ଗା ଚାନ୍ଦ, ଶତ୍ରୁଘ୍ନ ବାଗ, ଲଲାଟେନ୍ଦୁ ପଟ୍ଟନାୟକ ଓ ଅନ୍ୟାନ୍ୟ କର୍ମଚାରୀମାନେ ଉପସ୍ଥିତ ଥିଲେ।
ପୌର ପରିଷଦ ପକ୍ଷରୁ କୁହାଯାଇଛି ଯେ, ସହରର ବ୍ୟବସାୟୀ ସଂସ୍ଥା ଓ ବ୍ୟାଙ୍କମାନେ ଇଚ୍ଛା କଲେ ନିର୍ଦ୍ଧାରିତ ଶୁଳ୍କ ଦେଇ  ସ୍ପୋନ୍ସର ହେଇ ପାରିବେ ଓ ନିଜ କମ୍ପାନୀର ବ୍ୟାନର ଏଠାରେ ପ୍ରଦର୍ଶନ କରିପାରିବେ। ଏହା ସହିତ ଜନସାଧାରଣଙ୍କ ପକ୍ଷରୁ ଦହି ପାଣିର ବ୍ୟବସ୍ଥା ବୃଦ୍ଧି କରିବାକୁ ଅନୁରୋଧ ମଧ୍ୟ ହୋଇଛି।
ଆଗାମୀ ତିବ୍ର ଖରାକୁ ଦୃଷ୍ଟିରେ ରଖି ସହରର ବିଭିନ୍ନ ଜନଗହଳି ସ୍ଥାନରେ ଏଭଳି ଅଧିକ ମଡେଲ ଜଳ ଛତ୍ର ଖୋଲାଯିବ ବୋଲି ପୌରାଧ୍ୟକ୍ଷା  ଲିକା ସାହୁ ସୂଚନା  ଦେଇଛନ୍ତି l