09-Mar-2026

ବଲାଙ୍ଗୀର(ପ୍ରେରଣା ଖବର): ମାର୍ଚ୍ଚ ୮-ଆନ୍ତର୍ଜାତୀୟ ମହିଳା ଦିବସ ଅବସରରେ ଜେ ଏସ୍ ଏମ୍ କଳା, ବିଜ୍ଞାନ ଓ ବାଣିଜ୍ୟ ବିଦ୍ୟାଳୟର କ୍ୟାମ୍ପସରେ ଏକ ଭବ୍ୟ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି ଅବସରରେ ଅତିଥିମାନେ, ଅଧ୍ୟାପକ-ଅଧ୍ୟାପିକା, ଛାତ୍ରଛାତ୍ରୀ ଓ ଅଭିଭାବକ ମାନେ ଉପସ୍ଥିତ ରହି ମହିଳା ସଶକ୍ତିକରଣର ସନ୍ଦେଶ ପ୍ରଚାର କରିଥିଲେ।
ମୁଖ୍ୟ ଅତିଥି ଭାବେ ବଲାଙ୍ଗୀର ସାଇବର କ୍ରାଇମ୍ ଓ ଆର୍ଥିକ ଅପରାଧ ଥାନାର ଇନ୍ସପେକ୍ଟର-ଇନ୍-ଚାର୍ଜ(ଆଇ ଆଇ ସି)

ଶ୍ରୀମତୀ ଭାରତୀ ନାୟକ ଯୋଗ ଦେଇଥିଲେ। ସେ ତାଙ୍କ ଅଭିଭାଷଣରେ ଝିଅ ଛାତ୍ରୀମାନଙ୍କୁ ସଚେତନ ହେବାକୁ, ନିଜ ଅଧିକାର ବିଷୟରେ ଜାଣିବାକୁ ଓ ସାଇବର ଅପରାଧ ପ୍ରତି ସତର୍କ ରହିବାକୁ ପରାମର୍ଶ ଦେଇଥିଲେ। ସେ ଛାତ୍ରୀମାନଙ୍କୁ ଆତ୍ମବିଶ୍ୱାସୀ ହୋଇ ଜୀବନରେ ଆଗକୁ ବଢିବାକୁ ଉତ୍ସାହିତ କରିଥିଲେ।
କାର୍ଯ୍ୟକ୍ରମର ମୁଖ୍ୟଵକ୍ତା ଭାବେ ସମାଜସେବୀ ଓ ତେଜାସ୍ୱନୀ ସାହିତ୍ୟ ଅନୁଷ୍ଠାନ, ବଲାଙ୍ଗୀରର ସଚିବା  ଶ୍ରୀମତୀ ଲିଲି ପଟେଲ ମହିଳା ଶିକ୍ଷା, ସମାଜରେ ମହିଳାଙ୍କ ଭୂମିକା ଓ ସଶକ୍ତିକରଣ ବିଷୟରେ ପ୍ରେରଣାଦାୟକ ବକ୍ତବ୍ୟ ରଖି ଥିଲେ। ତାଙ୍କର ଉତ୍ସାହଭରା ଭାଷଣ ଛାତ୍ରଛାତ୍ରୀମାନଙ୍କୁ ଗଭୀର ଭାବେ ପ୍ରେରିତ କରିଥିଲା।
ଏହି ଅବସରରେ ସମାଜସେବୀ ନୁତନ ଦାସ ଉପସ୍ଥିତ ରହି ସମାଜରେ ମହିଳାଙ୍କ ମହତ୍ତ୍ୱ ବିଷୟରେ ନିଜ ମତାମତ ରଖିଥିଲେ। କାର୍ଯ୍ୟକ୍ରମରେ କଲେଜ ଉପଦେଷ୍ଟା ମନୋରଞ୍ଜନ ସାହୁ, ଚେୟାରମ୍ୟାନ ସିଏ ଶ୍ରୀକାନ୍ତ ଶର୍ମା, ସେକ୍ରେଟାରୀ ଶ୍ରୀମତୀ ସୁମନ ଶର୍ମା, ପ୍ରଧାନ ଶିକ୍ଷ୍ୟୟତ୍ରୀ ଡ୍. ମନସ୍ମିତା ମିଶ୍ର, ଶିକ୍ଷକ-ଶିକ୍ଷିକା ଓ ଛାତ୍ରଛାତ୍ରୀଙ୍କ ଅଭିଭାବକମାନେ ମଧ୍ୟ ଉପସ୍ଥିତ ଥିଲେ।

କାର୍ଯ୍ୟକ୍ରମକୁ ଆନନ୍ଦମୟ କରିବା ପାଇଁ ଶିକ୍ଷକ ଓ ଅଭିଭାବକମାନଙ୍କ ଦ୍ୱାରା ବିଭିନ୍ନ ଖେଳ ଓ ମନୋରଞ୍ଜନାତ୍ମକ କାର୍ଯ୍ୟକ୍ରମ ଆୟୋଜନ କରାଯାଇଥିଲା।
ଶେଷରେ କଲେଜ ଉପଦେଷ୍ଟା  ଶ୍ରୀଯୁକ୍ତ ସାହୁ ଓ ଚେୟାରମ୍ୟାନ ସିଏ ଶ୍ରୀକାନ୍ତ ଶର୍ମା ଓ ପ୍ରଶାସନିକ ଅଧିକାରୀ ଶ୍ରୀ ଶେଳେସ ପାଲ ମହିଳା ଶିକ୍ଷକ ଓ କର୍ମଚାରୀମାନଙ୍କୁ ସମ୍ମାନ ସ୍ୱରୂପ ଉପହାର ବିତରଣ କରିଥିଲେ। 
ଏହି ଉତ୍ସବ ମାଧ୍ୟମରେ ମହିଳାଙ୍କ ପ୍ରତି ସମ୍ମାନ, ସମାନତା ଓ ସଶକ୍ତିକରଣର ଶକ୍ତିଶାଳୀ ସନ୍ଦେଶ ପ୍ରଚାରିତ ହୋଇଥିଲା।