14-Dec-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲା ସମେତ ପଶ୍ଚିମଓଡିଶାର ଚାଷୀଙ୍କ ଧାନ ଅମଳ ହେବାପରେ ମଧ୍ୟ ମଣ୍ଡି ଖୋଲି ସରକାର ଧାନ କିଣୁନାହାଁନ୍ତି । ମଣ୍ଡି ନଖୋଲି ଧାନ ନକିଣିବା ସରକାରଙ୍କର ଏକ ବଡଷଡଯନ୍ତ୍ର ବୋଲି ଅଭିଯୋଗ ଉଠାଇଛନ୍ତି ବଲାଙ୍ଗୀରର ପୂର୍ବତନ ସାଂସଦ ବାଲଗୋପାଳ ମିଶ୍ର । ତେଣୁ ପଶ୍ଚିମାଞ୍ଚଳର ସମସ୍ତ ଚାଷୀ ଏକ ହୋଇ ଆଗାମୀ ଦିନରେ ଆନ୍ଦୋଳନକୁ ଓହ୍ଲାଇବାକୁ ଶ୍ରୀ ଆହ୍ୱାନ ଦେଇଛନ୍ତି । ଆଜି ସ୍ଥାନୀୟ ଏସଜେ ରିଜେନ୍ସୀ ହୋଟେଲଠାରେ କୋସଲୀ କିଷାନସଭା ପକ୍ଷରୁ ଆୟୋଜିତ ଏକ ସାମ୍ବାଦିକ ସମ୍ବିଳନୀରେ ପୂର୍ବତନ ସାଂସଦ କହିଲେ ଯେ,ଚାଷିମାନେ ଗତ ଏକମାସରୁ ଉର୍ଦ୍ଧ୍ୱସମୟ ହେଲା ଧାନ ଅମଳ କରି ଖରାରେ ସୁଖାଉଛନ୍ତି । ଡିସେମ୍ବର ୧୪ ସୁଦ୍ଧା ଜିଲ୍ଲାରେ ଧାନମଣ୍ଡି ଖୋଲାଯାଇନାହିଁ । ମଣ୍ଡି ଖୋଲିବାର ବ୍ୟବସ୍ଥା କରାଯାଇ ନାହିଁ । ଏପରିକି ମାତ୍ର ୧୦% ଚାଷିଙ୍କର ଟୋକନ ଆସିଛି । ଯେଉଁମାନଙ୍କର ଟୋକନ ଆସିଛି ସେମାନେ ମଣ୍ଡିକୁ ଧାନ ନେଲେ କିଣାଯାଉନାହିଁ । ସେଥିପାଇଁ ଚାଷିମାନେ ଧାରକରଜ କରି କରିଥିବା ଚାଷର ଫସଲକୁ କମଦରରେ ଦଲାଲଙ୍କ ପାଖରେ ବିକ୍ରୀ କରିବାକୁ ବାଧ୍ୟ ହେଉଛନ୍ତି । ବରଗଡ ଜିଲ୍ଲାରେ ଚାଷିମାନେ ତାତିଲେଣି ଓ ଆନ୍ଦୋଳନକୁ ଓହ୍ଲାଇଲେଣି । ତେଣୁ ପଶ୍ଚିମଓଡିଶାର ସମସ୍ତ ଚାଷି ଓ ସଂଗଠନମାନେ ଏକ ହୋଇ ସବୁ ଜିଲ୍ଲାରେ ଆନ୍ଦୋଳନ କରନ୍ତୁ ବୋଲି ପୂର୍ବତନ ସାଂସଦ ବାଳଗୋପାଳ ମିଶ୍ର ଆହ୍ୱାନ ଦେଇଥିଲେ । ବଲାଙ୍ଗୀର ଜିଲ୍ଲାରେ ଆସନ୍ତା ୫ଦିନ ମଧ୍ୟରେ ମଣ୍ଡିଖୋଲି ଧାନ କିଣା ନଗଲେ ଚାଷିଙ୍କୁ ନେଇ ରାଜରାସ୍ତାକୁ ଓହ୍ଲାଇବୁ ଓ ସେଥିପାଇଁ ଯଦି କୌଣସି ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହୁଏ ତାହେଲେ ସେଥିପାଇଁ ସରକାର ଦାୟୀ ରହିବେ ବୋଲି ଖୋଲା ଚେତାବନୀ ଦେଇଛନ୍ତି । ଶ୍ରୀ ମିଶ୍ର ଆହୁରି କହିଲେ ଯେ,ବିଗତ ବର୍ଷ ମାନଙ୍କରେ ଚାଷୀଙ୍କ  ସୁଖିଲା ଧାନରୁ ୫କେଜି ଲେଖାଏଁ ମଣ୍ଡିକଟ କରାଯାଇଥିଲା । ଯାହାକି ଚାଷିଙ୍କ କଷ୍ଟଲବ୍ଧ ଫସଳରୁ ଲୁଟ ବୋଲି କୁହାଯିବ । ସରକାର ଇନପୁଟ ଏସିଷ୍ଟାନ୍ସ ଦେଉଛନ୍ତି କିନ୍ତୁ ଏପଟେ କ୍ୱିଣ୍ଟାଲ ପିଚ୍ଛା ୫କିଲୋ ଧାନ କାଟିଛନ୍ତି । ଫଳରେ ଚାଷିଙ୍କ ମୁଣ୍ଡରେ କ୍ଷତି ଜବରଦସ୍ତି ଲଦି ଦିଆଯାଉଛି । ଆଗକୁ କୋସଲୀ କିଷାନସଭା ପକ୍ଷରୁ ଚାଷିଙ୍କୁ ଏକଜୁଟ କରି ଆନ୍ଦୋଳନକୁ ଓହ୍ଲାଇବୁ ଓ ଅନ୍ୟ ଜିଲ୍ଲାମାନଙ୍କରେ ମଧ୍ୟ ଚାଷି ଏକ ହୋଇ ଲଢେଇକରିବାକୁ ବାଳଗୋପାଳ ଆହ୍ୱାନ ଦେଇଥିଲେ । ଠିକ ସେହିପରି ବଲାଙ୍ଗୀର ଜିଲ୍ଲାରେ ଚାଷିଙ୍କ ସମସ୍ୟାକୁ ସରକାରମାନେ ଅଣଦେଖା କରିଚାଲିଛନ୍ତି । ଜିଲ୍ଲାରେ ଜଳସେଚନହାର ବଢିପାରୁନାହିଁ । ବଲାଙ୍ଗୀର ସହର ମଧ୍ୟରେ ଗୋଟିଏ ସମୟରେ ଆଦର୍ଶବଗିଚାରେ କୃଷିଗବେଷଣା କରାଯାଉଥିଲା । ବିଭିନ୍ନ ପ୍ରଜାତିର ଫଳଗଛ,ଫୁଲଗଛ ତଥା ଫସଲମାନଙ୍କୁ ନେଇ ଗବେଷଣା କରାଯାଉଥିଲା । କିନ୍ତୁ ଆଜି ବଲାଙ୍ଗୀର ଅବହେଳିତ ହୋଇ ପଡିରହିଛି । କୃଷିବିଶ୍ୱବିଦ୍ୟାଳୟ ବଲାଙ୍ଗୀରର ନ୍ୟାର୍ଯ୍ୟ ଦାବି । କିନ୍ତୁ ବଲାଙ୍ଗୀରର ଦୁର୍ବଳ ନେତୃତ୍ୱ ଯୋଗୁଁ ତାହା ହୋଇପାରୁନାହିଁ । ଯଦି ବଲାଙ୍ଗୀରରେ ଏହା ସ୍ଥାପନ ନହେଲା ତାହେଲେ ଆଗାମୀ ଭବିଷ୍ୟତର ପିଢୀ ସେହିନେତାଙ୍କୁ କ୍ଷମା କରିବେ ନାହିଁ ବୋଲି ପୂର୍ବତନ ସାଂସଦ ଶ୍ରୀ ମିଶ୍ର କହିଥିଲେ । ଆଜିର ଏହି ସାମ୍ବାଦିକ ସମ୍ବିଳନୀରେ କୁସମେଲ ସରପଞ୍ଚ କୌସ୍ତୁଭ ସାହୁ,ଝରନୀପାଲି ସମିତିସଭ୍ୟ ନରେଶ ସାହୁ,ସରଗାଡ ସମିତିସଭ୍ୟ ବୀରେନ ସାହୁ,ପଟୁଆପାଲି  ପେକ୍ସର ସଭାପତି ପ୍ରମୋଦ ମିଶ୍ର ଓ ଆଗଲପୁର ପେକ୍ସ ସଭାପତି ଦେବେନ୍ଦ୍ର ମେହେର ପ୍ରମୁଖ ମଞ୍ଚାସୀନ ଥିଲେ ।