10-Jan-2021

ଭୁବନେଶ୍ବର,(ପ୍ରେରଣା ଖବର ବ୍ୟୁରୋ) : ଖୁବଶୀଘ୍ର ଭୁବନେଶ୍ବରରୁ ପୁନେକୁ ଉଡାଣ ଉଡିବ ଏୟାର ଏସିଆ । ଯାତ୍ରୀଙ୍କ ପାଇଁ ସୁବିଧା ଯୋଗାଇବ ଏହି ବିମାନସେବା । କୋଲକାତାରୁ ଭୁବନେଶ୍ବର ଦେଇ ବିମାନ ଯିବ ପୁନେ । ସରକାର ପ୍ରତି ଉଡ଼ାଣ ପିଛା ଏଟିଏଫ୍‌ ଉପରେ ଭାଟ୍‌ କର ବାବଦରେ କମ୍ପାନିକୁ ୫୦ ହଜାର ଟଙ୍କା ଛାଡ଼ କରିବେ ବୋଲି ନିଷ୍ପତ୍ତି ନେଇଛନ୍ତି ।

 ଆନ୍ତଃରାଜ୍ୟ ବିମାନ ଚଳାଚଳରେ ସରକାରଙ୍କର ଏପରି ଅଜବ ନିଷ୍ପତ୍ତିକୁ ନେଇ ବିବାଦ ଦେଖାଦେଇଛି । ରାଜ୍ୟରୁ ଦୈନିକ ୨୭ଟି ବିମାନ ବିଭିନ୍ନ ରାଜ୍ୟକୁ ଚଳାଚଳ କରୁଥିଲା ବେଳେ ଏହି ନିର୍ଦ୍ଦିଷ୍ଟ କମ୍ପାନି ପ୍ରତି କାହିଁକି ଅନୁକମ୍ପା ଦେଖାଇଛନ୍ତି, ତାହାକୁ ନେଇ ପ୍ରଶ୍ନ ଉଠୁଛି ।

ମିଳିଥିବା ସୂଚନା ଅନୁଯାୟୀ, କୋଲକାତାରୁ ଭୁବନେଶ୍ବର ବିମାନବନ୍ଦର ଦେଇ ପୁନେକୁ ଉଡ଼ାଣ ସେବା ଯୋଗାଇବାକୁ ଏୟାର ଏସିଆ (ଇଣ୍ଡିଆ) ଲିମିଟେଡ଼୍‌ ପ୍ରସ୍ତାବ ଦେଇଥିଲା । ଏଥିପାଇଁ କମ୍ପାନି କିଛି ସର୍ତ୍ତ ରଖିଥିଲା । ଏଟିଏଫ୍‌ ଉପରେ ଭାଟ୍‌ ଛାଡ଼, ଅବତରଣ ଓ ପାର୍କିଂ ବାବଦରେ ପ୍ରତି ରାଉଣ୍ଡ୍‌ ଅପ୍‌ ଉଡ଼ାଣ ପିଛା ୧ ଲକ୍ଷ ୨୬ ହଜାର ୭୨୯ ଟଙ୍କା ଲେଖାଏଁ ବର୍ଷକ ପାଇଁ ଛାଡ଼ କରିବାକୁ ପ୍ରସ୍ତାବ ଦେଇଥିଲା । କମ୍ପାନିର ଏହି ପ୍ରସ୍ତାବ ଉପରେ ବାଣିଜ୍ୟ ଓ ପରିବହନ ବିଭାଗ ତର୍ଜମା କରି ଏସବୁ ବାବଦରେ ୫୦ ହଜାର ଟଙ୍କା ଛାଡ଼ କରିବାକୁ ନିଷ୍ପତ୍ତି ନେଇଥିଲା । ପରେ ମୁଖ୍ୟମନ୍ତ୍ରୀଙ୍କ ଅନୁମୋଦନ ପାଇଁ ଫାଇଲ ପଠାଯାଇଥିଲା । ମୁଖ୍ୟମନ୍ତ୍ରୀ ବିଭାଗର ଏହି ପ୍ରସ୍ତାବ ଉପରେ ମୋହର ମାରିଛନ୍ତି । ଏହି ରିହାତି କମ୍ପାନିକୁ ପ୍ରଥମ ୩ ମାସ ପାଇଁ ଦେବାକୁ ନିଷ୍ପତ୍ତି ହୋଇଛି ।
ସରକାରଙ୍କ ଏହି ରହସ୍ୟମୟ ନିଷ୍ପତ୍ତି ଏକାଧିକ ପ୍ରଶ୍ନବାଚୀ ସୃଷ୍ଟି କରୁଛି। ପୂର୍ବରୁ ଆନ୍ତର୍ଜାତିକ ବିମାନସେବା ଆରମ୍ଭ କରିବାକୁ ଏୟାର ଏସିଆକୁ ସରକାର ଏପରି ଆର୍ଥିକ ପ୍ରୋତ୍ସାହନ ଦେଇଥିଲେ । କିନ୍ତୁ ଆନ୍ତଃରାଜ୍ୟ ବିମାନ ଚଳାଚଳ ପାଇଁ ଏପରି ପ୍ରୋତ୍ସାହନ ପ୍ରଥମ ଘଟଣା । ଭୁବନେଶ୍ବର ବିମାନବନ୍ଦରରୁ ୮ରୁ ୧୦ଟି ରାଜ୍ୟକୁ ଦୈନିକ ୨୭ଟି ବିମାନ ଚଳାଚଳ କରୁଛି । ଆବଶ୍ୟକ ସଂଖ୍ୟକ ଯାତ୍ରୀ ନ ହେଉଥିଲେ ବି ଅନ୍ୟ କମ୍ପାନିମାନେ ସେମାନଙ୍କ ସେବା ଜାରି ରଖିଛନ୍ତି । ଏୟାର ଏସିଆ ମଧ୍ୟ ଭୁବନେଶ୍ବରରୁ ଦିଲ୍ଲୀ, ମୁମ୍ବାଇ ଓ ବେଙ୍ଗାଳୁରୁକୁ ବିମାନସେବା ଯୋଗାଉଛି । ଅନ୍ୟ କୌଣସି କମ୍ପାନିକୁ ସରକାର ଆର୍ଥିକ ପ୍ରୋତ୍ସାହନ ଯୋଗାଉ ନାହାନ୍ତି । କିନ୍ତୁ ଏୟାର ଏସିଆର ପୁନେକୁ ବିମାନସେବା ପାଇଁ ସରକାର କାହିଁକି ଏପରି ଅନୁକମ୍ପା ଦେଖାଇଲେ ତାହା ବୁଝାପଡ଼ୁନି ।