10-Oct-2024

ମୁମ୍ବାଇ: ବିଶିଷ୍ଟ ଶିଳ୍ପପତି ରତନ ଟାଟା ଙ୍କ ଗତକାଲି ରାତିରେ ଦେହାନ୍ତ ହୋଇଯାଇଛି। ସେ ବାର୍ଦ୍ଧକ୍ୟଜନିତ ଅସୁସ୍ଥତା କାରଣରୁ ତାଙ୍କୁ ଗତ ସୋମବାର ଦିନ ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା ଚାଲିଥିଲା। ହଠାତ୍ ରକ୍ତଚାପ କମିଯିବାରୁ ତାଙ୍କୁ ମୁମ୍ବାଇର ବ୍ରିଚ୍ କ୍ୟାଣ୍ଡି ହସ୍ପିଟାଲରେ ଭର୍ତ୍ତି କରାଯାଇଥିଲା।ପରେ ତାଙ୍କୁ ଆଇସିୟୁ କୁ ସ୍ଥାନାନ୍ତର କରାଯାଇଥିଲା। ସେଠାରେ ତାଙ୍କର ମୃତ୍ୟୁ ଘଟିଥିଲା। ତାଙ୍କର ମରଶରୀରକୁ ରାଷ୍ଟ୍ରୀୟ 

ସମ୍ମାନ ସହ ଅନ୍ତିମ ସଂସ୍କାର କରାଯିବା ପାଇଁ କୋଲାବା ସ୍ଥିତ ତାଙ୍କ ବାସଭବନକୁ ନିଆଯାଇଛି। ରତନ ଟାଟା ଙ୍କ ପାର୍ଥିବ ଶରୀରକୁ ଶେଷ ଦର୍ଶନ ପାଇଁ ପୂର୍ବାହ୍ନ ୧୦ ଟା ରୁ ଅପରାହ୍ନ ୩ ଟା ପର୍ଯ୍ୟନ୍ତ ସମୟ ଧାର୍ଯ୍ୟ କରାଯାଇଛି।ତାଙ୍କ ଶେଷ ଦର୍ଶନ ନିମନ୍ତେ ଭିଡକୁ ଆଖି ଆଗରେ ରଖି ଟ୍ରାଫିକ ନିୟନ୍ତ୍ରଣ ପାଇଁ ଗାଡ଼ି ପାର୍କିଂର ବ୍ୟବସ୍ଥା କରାଯାଇଛି ବୋଲି ମୁମ୍ବାଇ ପୁଲିସର ଦକ୍ଷିଣ ଜୋନର ଅତିରିକ୍ତ କମିଶନର ଅଭିନବ ଦେଶମୁଖ ସୂଚନା ଦେଇଛନ୍ତି। ତାଙ୍କ ମୃତଶରୀରକୁ ଦର୍ଶନ ପାଇଁ ଏନ୍ ସି ପି ଏ ରେ ରଖାଯିବ।
ମହାରାଷ୍ଟ୍ର ସରକାରଙ୍କ ମନ୍ତ୍ରୀ ଦୀପକ କେଶରକର କହିଛନ୍ତି, ଶିଳ୍ପପତି ରତନ ଟାଟା ଙ୍କ ଦେହାନ୍ତ ଯୋଗୁଁ ମୁମ୍ବାଇରେ ରାଜ୍ୟ ସରକାର ସମସ୍ତ କାର୍ଯ୍ୟକ୍ରମକୁ ବାତିଲ କରିଛନ୍ତି।
୧୯୩୭ ମସିହା ଡିସେମ୍ବର ମାସ ୨୮ ତାରିଖରେ ଜନ୍ମିତ ରତନ ଟାଟା ମୁମ୍ବାଇର କ୍ୟାଥେଡ୍ରାଲ୍ ଏବଂ ଜନ୍ କନନ୍ ସ୍କୁଲରୁ ପ୍ରାରମ୍ଭିକ ଶିକ୍ଷlଗ୍ରହଣ କରିଥିଲେ। ଆମେରିକାର କର୍ଣ୍ଣେଲ ବିଶ୍ଵବିଦ୍ୟାଳୟରେ ସେ ତାଙ୍କ ଉଚ୍ଚଶିକ୍ଷା ଲାଭ କରି ସେଠାରେ ସେ ଅର୍କିଟେକ୍ଚର୍ ଏବଂ  ଷ୍ଟ୍ରକ୍ଚରାଲ୍ ଇଞ୍ଜିନିୟରିଙ୍ଗରେ ଡିଗ୍ରୀ ହାସଲ କରିଥିଲେ।
୧୯୬୨ ମସିହାରେ ସେ ଟାଟା ଗ୍ରୁପରେ ଯୋଗ ଦେବା ପୂର୍ବରୁ ଆମେରିକାରେ କିଛି ସମୟ କାମ କରିଥିଲେ।୧୯୮୧ମସିହାରେ ସେ ଟାଟା ଇଣ୍ଡଷ୍ଟ୍ରିଜ୍ ର ଅଧ୍ୟକ୍ଷ ପଦବୀ ଅଳଙ୍କୃତ କରିଥିଲେ।୧୯୯୧ ରେ ଜେ.ଆର୍.ଡି ଟାଟା ଙ୍କ ଅବସର ପରେ ରତନ ଟାଟା ସନ୍ସ୍ ର ଅଧ୍ୟକ୍ଷ ଭାବେ ଦାୟିତ୍ଵ ଗ୍ରହଣ କରିଥିଲେ।
୧୯୯୬ ମସିହାରେ ସେ ଟାଟା ଟେଲି ସର୍ଭିସେସ ପ୍ରତିଷ୍ଠା କରିଥିଲେ।ଫଳସ୍ୱରୁପ୍ ଟେଲିକମ କ୍ଷେତ୍ରରେ ଏହି ଗ୍ରୁପର ସମ୍ପ୍ରସାରଣ ହୋଇ ପାରିଥିଲା।
ଟାଟା ସଂସ୍ସ ରେ ତାଙ୍କର ନେତୃତ୍ୱ ସମୟରେ ସେ ଟେଟଲି, କୋରସ, ଏବଂ ଜାଗୁଆର ଲ୍ୟାଣ୍ଡ ରୋଭର ଭଳି କମ୍ପାନୀକୁ ଅଧିଗ୍ରହଣ କରି ଟାଟା ଗ୍ରୁପକୁ ଏକ ଘରୋଇ କମ୍ପାନୀରୁ ଏକ ବିଶ୍ବସ୍ତରୀୟ ପାୱାର ହାଉସରେ ପରିଣତ କରିଥିଲେ।
୨୦୧୨ ରେ ରତନ ଟାଟା ଅବସର ନେଲାପରେ ତାଙ୍କ ସ୍ଥାନରେ 

ସାଇରସ୍ ମିସ୍ତ୍ରୀଙ୍କୁ ଦାୟିତ୍ଵ ଦିଆଯାଇଥିଲା। ସେ ୨୦୨୨ରେ ଏକ କାର ଦୁର୍ଘଟଣାରେ ମୃତ୍ୟୁବରଣ କରିଥିଲେ।
ରତନ ଟାଟା ଙ୍କର ବଳିଷ୍ଠ ନେତୃତ୍ବ ଯୋଗୁଁ ୧୦୦ ବିଲିୟନ ଡଲାରରୁ ଅଧିକ ମୂଲ୍ୟର ଏକ ବିଶ୍ବ ବ୍ୟବସାୟିକ ସାମ୍ରାଜ୍ୟରେ ପରିଣତ ହୋଇଥିଲା। ସେ ଆଉ ଇହ ଜଗତରେ ନାହାନ୍ତି।

ପ୍ରେରଣା ପରିବାର ତରଫରୁ ତାଙ୍କର ଅମର ଆତ୍ମା ର ସଦଗତି ପାଇଁ ଭକ୍ତିପୂତ ଅଶ୍ରୁଳ  ଶ୍ରଦ୍ଧାଞ୍ଜଳି ଜ୍ଞାପନ କରୁଛୁ।