26-May-2024

କଣ୍ଟାମାଳ(ଜୟ କୁମାର ମହାରଣାଙ୍କ ରିପୋର୍ଟ): କଣ୍ଟାମାଳ ଅବକାରୀ ବିଭାଗ ପକ୍ଷରୁ ଚଢାଉ କରାଯାଇ ଗଞ୍ଜେଇ ଓ ବାଇକ୍ ଜବତ କରିବା ସହ ୨ ଜଣକୁ ଗିରଫ କରିଥିବା ଜଣାପଡ଼ିଛି । ସୂଚନା ଅନୁସାରେ, ବିଶ୍ଵସ୍ତ ସୂତ୍ରରୁ ଖବର ପାଇ କଣ୍ଟାମାଳ ଅବକାରୀ ଅଧିକାରୀ ସୂର୍ଯ୍ୟକାନ୍ତ ମଲ୍ଲିକଙ୍କ ନେତୃତ୍ୱରେ ଏକ ଟିମ୍ କଣ୍ଟାମାଳ ଥାନା ଅନ୍ତର୍ଗତ ଶିମିଳି ଜୋରା ଛକ ନିକଟରେ ଜଗି ବସିଥିଲେ | ଏହି ସମୟରେ ଏକ ହିରୋ ହୋଣ୍ଡା ସିଡି ଡନ ବାଇକ୍ (ଓଆର-୩୧ - ୨୪୫୨)ରେ ଗଞ୍ଜେଇ ଚୋରା ଚାଲାଣ ହେଉଥିବା ଖବର ପାଇ ଉକ୍ତ ବାଇକକୁ ଅଟକାଇ ଥିଲେ | ତଦନ୍ତ ପରେ ଗାଡିରୁ ଗଞ୍ଜେଇ ଜବତ କରିଥିବା ବେଳେ ୨ଜଣକୁ ଗିରଫ କରିଥିବା ଜଣାପଡିଛି ।ଜବତ ଗଞ୍ଜେଇର ପରିମାଣ ୩ କେଜି ହୋଇଥିବା ବେଳେ ଗିରଫ ଅଭିଯୁକ୍ତ ଦୁଇ ଜଣ ହେଲେ ସୋନପୁର ଜିଲ୍ଲା ତରଭା ଥାନା ପାଣୀମୁରା ଗ୍ରାମର ଆଶିଷ କୁମ୍ଭାର (୨୦) ଓ ଇନ୍ଦ୍ରଜିତ ସେଠୀ(୨୭) ବୋଲି ବିଭାଗ ପକ୍ଷରୁ ସୂଚନା ମିଳିଛି । ଏହି ଚଢ଼ାଉରେ ଅବକାରୀ ଅଧିକାରୀ ସୂର୍ଯ୍ୟକାନ୍ତ ମଲ୍ଲିକ, ସୁକେଶିନି କୁଜ୍ଜୁର, ସଞ୍ଜୟ ସେଠୀ ,ଶ୍ରୀକାନ୍ତ ବେହେରା ଓ ଆନନ୍ଦ ମେହେର ପ୍ରମୁଖ ଚଢ଼ାଉରେ ସାମିଲ ଥିଲେ | ଏ ସଂକ୍ରାନ୍ତରେ କଣ୍ଟାମାଳ ଅବକାରୀ କାର୍ଯ୍ୟାଳୟରେ ୨୦/୨୪-୨୫ ରେ ଏକ ମାମଲା ରୁଜୁ କରାଯାଇଥିବା ବେଳେ ଘଟଣାରେ ସଂପୃକ୍ତ ଦୁଇ ମାଫିଆଙ୍କୁ କୋର୍ଟ ଚାଲାଣ କରାଯାଇଥିବା ସହ ଅଧିକ ତଦନ୍ତ ଜାରି ରହିଥିବା କଣ୍ଟାମାଳ ଅବକାରୀ ଅଧିକାରୀ ସୂର୍ଯ୍ୟକାନ୍ତ ମଲ୍ଲିକ ସୂଚନା ଦେଇଛନ୍ତି ।