26-May-2024

 ବିନିକା(ହିମାଂଶୁ ଶେଖର ପୁଟେଲ)ପ୍ରତି ୫ବର୍ଷରେ ଥରେ ଆସୁଥିବା ଗଣତନ୍ତ୍ରର ମହାନ ପର୍ବ ସାଧାରଣ ନିର୍ବାଚନରେ ଭୋଟଦାନ କରିବା ହେଉଛି ଜଣେ ଭାରତୀୟ ନାଗରିକର କର୍ତ୍ତବ୍ୟ ।ଏଥିପାଇଁ ପ୍ରଶାସନିକ କ୍ଷେତ୍ରରେ ନିର୍ବାଚନ ପୂର୍ବରୁ ସଚେତନତା ଅବଲମ୍ବନ କରାଯାଉଛି । ହେଲେ ଅତ୍ୟନ୍ତ ପରିତାପର ବିଷୟ ଦୀର୍ଘ ଦଶନ୍ଧି ଧରି ଭୋଟ ଦାନ କରି ଆସୁଥିବା ଜଣେ ୫୫ବର୍ଷୀୟ ନାଗରିକ ଚଳିତ ସାଧାରଣ ନିର୍ବାଚନରେ ନିଜର ବହୁମୂଲ୍ୟ ମତଦାନ କରି ପାରି ନଥିବା ଜଣାପଡ଼ିଛି ।ଘଟଣାଟି ହେଉଛି ଖୋଦ ବିନିକା ସହରରେ। ସହରର ଗଡଭିତରପଡ଼ା ନିବାସୀ ବିଜେ ସାମଲ(୫୫) ଗତ ୧୯୮୦ମସିହା ଠାରୁ ବିଜ୍ଞାପିତ ପରିଷଦ ହେଉ କି ସାଧାରଣ ନିର୍ବାଚନରେ ଅଂଶ ଗ୍ରହଣ କରି ନିଜର ବହୁମୂଲ୍ୟ ଭୋଟ ଦେଇଛନ୍ତି ।ହେଲେ ଚଳିତ ନିର୍ବାଚନରେ ତାଙ୍କର ନାମ ତାଲିକାରେ କଟି ଯାଇଥିବାରୁ ସେ ଭୋଟ ଦେଇ ପାରି ନଥିଲେ ।ଭୋଟ ଚାଲିଥିବା ସମୟରେ ଦାୟିତ୍ୱରେ ଥିବା ପ୍ରିଜାଇଡିଙ୍ଗ ଅଫିସରଙ୍କୁ ଜଣାଇଥିଲେ ମଧ୍ୟ କୌଣସି ସୁଫଳ ପାଇ ନଥିଲେ ।ଯାହା ଫଳରେ କି ସେ ଚଳିତ ସାଧାରଣ ନିର୍ବାଚନରେ ଭୋଟ ଦାନରୁ ବଞ୍ଚିତ ହୋଇଛନ୍ତି ।ସୂଚନା ଯୋଗ୍ୟ ଯେ ଶ୍ରୀ ସାମଲ ତାଙ୍କ କଣ୍ଠରେ ବିଭିନ୍ନ ପଶୁ,ପକ୍ଷୀଙ୍କ ସ୍ୱର ଉଚ୍ଚାରଣ କରି ସମସ୍ତଙ୍କର ପ୍ରିୟ ପାତ୍ର ହୋଇପାରିଛନ୍ତି।ଏପରିକି ବିଭିନ୍ନ ସ୍କୁଲ,କଲେଜକୁ ବିନା ପାରିଶ୍ରମିକରେ ଯାଇ ତାଙ୍କ କଣ୍ଠରେ ସ୍ୱର ଉଚ୍ଚାରଣ କରି ଛାତ୍ରଛାତ୍ରୀ ମାନଙ୍କୁ ମୁଗ୍ଧ କରି ଆସୁଛନ୍ତି ।ଜଣେ ଭାରତୀୟ ନାଗରିକ ହୋଇ ନିର୍ବାଚନ ପର୍ବରେ ମତଦାନ ସାବ୍ୟସ୍ତ କରିବାର ସୁଯୋଗରୁ ବଞ୍ଚିତ କରିବା ନେଇ ଦୁଃଖ ପ୍ରକାଶ କରିଛନ୍ତି।