20-May-2024

ବଲାଙ୍ଗୀର(ପ୍ରେରଣା ଖବର): ଆଜି ପଞ୍ଚମ ପର୍ଯ୍ୟାୟରେ ବଲାଙ୍ଗୀର ଲୋକସଭା ସମେତ ୭ଟି ଯାକ ବିଧାନସଭା କ୍ଷେତ୍ରରେ ମତଦାନ ଚାଲିଛି । ତେବେ ସାମାନ୍ୟ କିଛି ଘଟଣାକୁ ଛାଡିଦେଲେ ଶାନ୍ତିଶୃଙ୍ଖଳାର ସହିତ ଅପରାହ୍ନ ୫ଟା ପର୍ଯ୍ୟନ୍ତ ମତଦାନ ଚାଲିଛି । ବଲାଙ୍ଗୀର ଜିଲ୍ଲାରେ ୫ଟି ବିଧାନସଭା କ୍ଷେତ୍ରରେ ମୋଟ ୧୫୪୮ଟି ବୁଥ ମଧ୍ୟରୁ ୨୩୬ଟିକୁ ସଖିବୁଥ କରାଯାଇଛି ଯେଉଁଠି କେବଳ ମହିଳାକର୍ମଚାରୀମାନେ ଭୋଟ କରାଉଛନ୍ତି । ସେହିପରି ମୋଟ ୧୦,୨୭୧ ଜଣ କର୍ମଚାରୀ ନିୟୋଜିତ ହୋଇଛନ୍ତି । ମାଓ ଅଞ୍ଚଳରେ ସୁରକ୍ଷାବ୍ୟବସ୍ଥାକୁ କଡାକଡି କରାଯାଇଛି । ଆଜି ସକାଳ ୭ଟାରେ ବଲାଙ୍ଗୀର ଜିଲ୍ଲାପାଳ ଗୌରବଶୀବାଜୀ ଇସଲୱାର ସ୍ଥାନୀୟ ରୁଗୁଡିପଡା ପ୍ରାଥମିକସ୍କୁଲର ୨୫୩ନମ୍ବର ବୁଥରେ ମତଦାନ କରିଥିଲେ । ସେହିପରି ବଲାଙ୍ଗୀର ବିଧାୟକ ନରସିଂହ ମିଶ୍ର ଓ ତାଙ୍କ ପୁଅ କଂଗ୍ରେସର ବିଧାୟକ ପ୍ରାର୍ଥି ସମରେନ୍ଦ୍ର ମିଶ୍ର ସପତ୍ନୀକ କ୍ଲବପଡାର ଲକ୍ଷ୍ମୀନାରାୟଣ ପ୍ରାଥମିକ ସ୍କୁଲର ବୁଥରେ ଭୋଟଦେଇଥିଲେ । ଠିକ ସେହିପରି ସକାଳ ୯ଟାରେ ରାଜପରିବାରର ପୂର୍ବତନମନ୍ତ୍ରୀ ବିଜେଡିର ଭେଟେରାନ ନେତା ଅନଙ୍ଗଉଦୟ ସିଂଦେଓ,ତାଙ୍କ ପତ୍ନୀ ବିଜୟଲକ୍ଷ୍ମୀ ଦେବୀ, ବିଜେଡି ବିଧାୟକପ୍ରାର୍ଥି କଳିକେଶନାରାୟଣ ସିଂଦେଓ ତାଙ୍କ ପତ୍ନୀ ମେଘନା ସିଂଦେଓ ଓ ଭାଇ ମନ୍ମଥବିଜୟ ସିଂଦେଓ ସରକାରୀ ମହିଳାମହାବିଦ୍ୟାଳୟ ବୁଥରେ ମତଦାନ କରିଥିଲେ । ଏମାନେ ସମସ୍ତେ ମତଦାନକେନ୍ଦ୍ରରେ ଲୋକଙ୍କ ସହ ଧାଡିରେ ଛିଡାହୋଇ ପ୍ରାୟ ୧୫ମିନିଟର ଅପେକ୍ଷା ପରେ ଭୋଟ ଦେଇଥିଲେ । ଚଳିତଥର ଭୋଟଦେବାକୁ ଲୋକଙ୍କ ମଧ୍ୟରେ ଆଗ୍ରହ ରହିଛି ଓ ଖୁସି ଜଣାପଡୁଛନ୍ତି ବୋଲି ତାଙ୍କର ପ୍ରତିକ୍ରୀୟାରେ କଳିକେଶନାରାୟଣ ସିଂଦେଓ କହିଛନ୍ତି । ତେବେ ସୂଚନାରୁ ଜଣାପଡିଛି ଯେ,ବଲାଙ୍ଗୀର ଲୋକସଭା କ୍ଷେତ୍ରରେ ଦିନ ୫ଟା ସୁଦ୍ଧା  ମୋଟ ୬୧.୩୫% ମତଦାନ ହୋଇଥିଲା । ବଲାଙ୍ଗୀର ବିଧାନସଭା କ୍ଷେତ୍ରରେ ମାତ୍ର ୫୬.୧୦%,ଲୋଇସିଂହାରେ ୫୮.୪୫%,ପାଟଣାଗଡରେ ୬୦.୧୦%,କଣ୍ଟାବାଞ୍ଜିରେ ୫୫.୧୫%, ଟିଟିଲାଗଡରେ ୬୧.୯୧%, ସୋନପୁରରେ ୭୧.୩୫% ଓ ବୀରମହାରାଜପୁରରେ ୬୭.୮୦% ମତଦାନ ହୋଇଛି । ବଲାଙ୍ଗୀର ନିର୍ବାଚନମଣ୍ଡଳିରେ ମତଦାନ ହାର ନୈରାଶ୍ୟଜନକ ରହିଛି । ମୁଖ୍ୟତଃ ମଧ୍ୟବିତ୍ତପରିବାର ଗୁଡିକ ମତଦାନ କରିବାକୁ ଯାଉନଥିବା ଲକ୍ଷ୍ୟ କରାଯାଇଛି । ଖୋଦ ମୁଖ୍ୟମନ୍ତ୍ରୀଙ୍କ ଲଢୁଥିବା କଣ୍ଟାବାଞ୍ଜିରେ ମଧ୍ୟ ମତଦାନ ହାର ଖୁବ କମ ରହୁଛି ।