20-May-2024

ବଲାଙ୍ଗୀର(ପ୍ରେରଣା ଖବର): ସରକାର ବିଭିନ୍ନ ଯୋଜନା କରି ଗ୍ରାମାଞ୍ଚଳର ବିକାଶ କରାଉଛନ୍ତି । କିନ୍ତୁ ରାଜନୈତିକ ଷଡଯନ୍ତ୍ରର ଶୀକାର ହୋଇ ଗାଁକୁ ରାସ୍ତା ନିର୍ମାଣ ନହେବାରୁ ନେତା ଓ ପ୍ରଶାସନ ପାଖରୁ ନୀରାଶ ହୋଇ ଶେଷରେ ଭୋଟବର୍ଜନ କରିଛନ୍ତି କୁହିମୁଣ୍ଡା ଗ୍ରାମବାସୀ । ବଲାଙ୍ଗୀର ସଦର ନିର୍ବାଚନମଣ୍ଡଳି ଦେଓଗାଁବ୍ଲକ ଉପରଝର ଗ୍ରାମପଞ୍ଚାୟତର କୁହିମୁଣ୍ଡା ଏକ ରାଜସ୍ୱଗ୍ରାମ । କିନ୍ତୁ ସ୍ୱାଧିନତାର ୭୬ବର୍ଷ ପରେ ମଧ୍ୟ ଏହି ଗ୍ରାମକୁ ସବୁଦିନିଆଁ ରାସ୍ତାଟିଏ ନିର୍ମାଣ ହୋଇପାରିନି । ବିଲ ଭିତରେ ଓ ହିଡରେ ଗାଁକୁ ଯିବାକୁ ପଡିଥାଏ । ଗାଁର ଛାତ୍ରଛାତ୍ରୀ ପାଠପଢିବାକୁ ଯିବା ହେଉକି ସ୍ୱାସ୍ଥ୍ୟସମସ୍ୟା ହେଲେ ଗାଁକୁ ଗାଡିନେଇ ଯାଇହୁଏ ନାହିଁ । ବର୍ଷାଦିନେ ସବୁଠୁ ବେଶି ଅସୁବିଧା ହୁଏ । ଉପରଝର ଗ୍ରାମପଞ୍ଚାତଠାରୁ କୁହିମୁଣ୍ଡା ଗାଁକୁ ମାତ୍ର ଦେଢ କିମି ରାସ୍ତା ପଡିଥାଏ । ସେଥିରୁ ଉପରଝର ଗାଁରୁ ଆରମ୍ଭ କରି ଆମ୍ବତୋଟା ପର୍ଯ୍ୟନ୍ତ ପଞ୍ଚାୟତରୁ ରାସ୍ତାନିର୍ମାଣ ହୋଇଛି । ଗ୍‌ାଁପଟୁ ଗ୍ରାମର ଏସଏଚଜି ମହିଳାମାନେ ନିଜଅର୍ଥରେ କିଛିଅଂଶ ରାସ୍ତାନିର୍ମାଣ କରିଛନ୍ତି । ଏକ ସଫଳ ଚାଷଙ୍କ ଗାଁ ଭାବରେ ଜଣାଯାଉଥିବା କୁହିମୁଣ୍ଡା ଗାଁକୁ ଆଉ ମାତ୍ର ୭୦୦ମିଟର ରାସ୍ତାପାଇଁ ଗ୍ରାମବାସୀ ହିନସ୍ତା ହେଉଛନ୍ତି । ସେମାନେ ଅନେକଥର ବିଧାୟକ, ଜିଲ୍ଲାପାଳ,ବିଡିଓଙ୍କ ପାଖକୁ ଯାଇ ରାସ୍ତାପାଇଁ ଗୁହାରି କରିଛନ୍ତି । କିନ୍ତୁ ତଥାପି ରାସ୍ତା ନିର୍ମାଣ ହୋଇପାରିଲା ନାହିଁ । ରାସ୍ତାନିର୍ମାଣ ହେବାକୁ ଥିବା କିଛି ଜମିକୁ ଉପରଝର ଗ୍ରାମର ଜଣେ ବ୍ୟକ୍ତି ଜବରଦଖଲ କରି ରଖିଛି ଓ ଆଉ କିଛି ରୟତି ଜମି ଅଛି । ରାସ୍ତା ନିର୍ମାଣ କରିବାକୁ ଆଲୋଚନା ହୋଇଥିଲା । ଗତ ୨୦୨୨ ମସିହାରେ ପଞ୍ଚାୟତ ନିର୍ବାଚନ ବେଳେ ଭୋଟବର୍ଜନ ନିସ୍ପତ୍ତି କରି ଜିଲ୍ଲାପାଳଙ୍କ ଆବାସିକ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ । ତତକାଳିନ ଉପଜିଲ୍ଲାପାଳଙ୍କ ଲିଖିତ ପ୍ରତିଶୃତି ପରେ ଗ୍ରାମବାସୀ ଭୋଟଦାନ କରିଥିଲେ । କିନ୍ତୁ ତଥାପି ରାସ୍ତା ନିର୍ମାଣ ହୋଇପାରିଲା ନାହିଁ । ଜଣେ ରାଜନେତାଙ୍କ ପ୍ରରୋଚନାରେ ସରକାରୀ ଜମିକୁ ଜବରଦଖଲ କରିଥିବା ବ୍ୟକ୍ତି ଜମିନଛାଡିବାକୁ ଗଣ୍ଡଗୋଳ କରିଥିଲା । ଏପରିକି ମାପଚୁପ ପାଇଁ ଆସିଥିବା ତହସିଲଦାରଙ୍କୁ ରାଜନୈତିକ ଚାପ ମଧ୍ୟ ପଡିଥିଲା । ଯାହା ଫଳରେ ଜିଲ୍ଲାପାଳଙ୍କ ନିର୍ଦ୍ଦେଶ ସତ୍ୱେ କୁହିମୁଣ୍ଡାକୁ ରାସ୍ତାନିର୍ମାଣ ହୋଇପାରିଲା ନାହିଁ । ଏବେ ୨୦୨୪

ସାଧାରଣ ନିର୍ବାଚନ ବେଳେ କୁହିମୁଣ୍ଡା ଗ୍ରାମବାସୀ ପୁଣି ଭୋଟବର୍ଜନ ନିସ୍ପତ୍ତି ନେଇଥିଲେ । ଗ୍ରାମବାସୀଙ୍କୁ ମନାଇବାକୁ ଦେଓଗାଁ ବିଡିଓ ଯାଇଥିଲେ କିନ୍ତୁ ଆଲୋଚନା ସଫଳ ହେଲା ନାହିଁ । ଗାଁମୁଣ୍ଡରେ ରାଜସ୍ୱଗ୍ରାମକୁ ରାସ୍ତାନାହିଁ ତ ଭୋଟନାହିଁ ବ୍ୟାନର ଲଗାଇ ରାଜନୈତିକଦଳ ଭୋଟପ୍ରଚାର ପାଇଁ ଗଲେ ମନା କରାଯାଇଥିଲା । ଆଜି ମତଦାନ ଦିବସରେ ଗ୍ରାମବାସୀ ଗାଁମୁଣ୍ଡରେ ବ୍ୟାନର ଲଗାଇ ଧାରଣା ଦେଇ ଭୋଦେବାକୁ କେହି ମଧ୍ୟ ଯାଇନଥିଲେ । କୁହିମୁଣ୍ଡାର ମୋଟ ୯୧ଜଣ ଭୋଟର ଆଜି ସମସ୍ତେ ଭୋଟବର୍ଜନ କରି ତାଙ୍କର ଏକତା ଦେଖାଇଛନ୍ତି ବୋଲି ଗ୍ରାମର ଶମ୍ଭୁଭୂଷଣ ସାହୁ କହିଛନ୍ତି ।