19-May-2024

ବଲାଙ୍ଗିର(ପ୍ରେରଣା ଖବର): ବଲାଙ୍ଗୀର ସଦରଥାନା ଅନ୍ତର୍ଗତ ମାୟାବର୍ହା ଗାଁରେ ଆଜି ନିର୍ବାଚନୀ ହିଂସା ଘଟିଯାଇଛି । ବିଜେଡିକୁ ସମର୍ଥନ କରୁଥିବା ବିଶ୍ୱଜିତ ପଟେଲ ଓରଫ ଭଗବାନଙ୍କ ପରିବାରବର୍ଗଙ୍କୁ କଂଗ୍ରେସର ଗୁଣ୍ଡାମାନେ ଲୁହାରଡରେ ଆକ୍ରମଣ କରି ଲହୁଲୁହାଣ କରିଦେଇଛନ୍ତି। ଏହି ଘଟଣାରେ ବିଭୁତି ପଟେଲ, ତାଙ୍କ ପତ୍ନୀ ମନିଷା ପଟେଲ, ବାପା ଜଗନ୍ନାଥ ପଟେଲ, ରାମନାଥ ପଟେଲ,ମଧୁ ପଟେଲ, ବିବେକା ପଟେଲ ଓ ସୁରେଖା ପଟେଲ ଗୁରୁତର ଆହତ ହୋଇଛନ୍ତି। ପୋଲିସ ଜଣେ ଅଭିଯୁକ୍ତକୁ ଅଟକ ରଖି ପଚରାଉଚୁରା କରୁଛି l

 ବିଭୁତିଙ୍କ ଅଭିଯୋଗରୁ ଜଣାଯାଇଛି ଯେ, ଗତ କିଛିଦିନ ତଳେ ବିଜେଡିକୁ ସମର୍ଥନ ନକରିବାକୁ ବିଭୁତିକୁ ଧମକ ଦିଆଯାଇଥିଲା । ସେହି କାରଣରୁ ବିଭୁତି ଗାଁରେ ଚୁପ ରହିଥିଲେ। କିନ୍ତୁ ଆଜି ବିଭୁତି ସଂଧ୍ୟାରେ ପୋଖରୀରୁ ଫେରୁଥିବା ବେଳେ ସେହି ଗାଁର ଭରତ ରାଉତ ଓ କଂଗ୍ରେସ ଦଳର କିଛି ଗୁଣ୍ଡା ବୁଲେଟରେ ଆସି ବିଭୁତିକୁ ଅଶ୍ଲିଳ ଭାଷାରେ ଗାଳିଗୁଲଜ କରି ବିଜେଡିକୁ କାହିଁକି ସମର୍ଥନ କରୁଛୁ ବୋଲି କହି ଧମକ ଦେଇଥିଲେ । ସେଥିରୁ କଥା ବଢିବାରୁ ଗାଡିରୁ ଜେକରଡ ବାହାର କରି ବିଭୁତିକୁ ଆକ୍ରମଣ କରିଥିଲେ । ଏହି ଆକ୍ରମଣ ସମୟରେ ବିଭୂତିଙ୍କ ପତ୍ନୀ ମନିଷା ପଟେଲ ଓ ଅନ୍ୟମାନେ ଆସି ମନାକରିବାରୁ ତାଙ୍କୁ ମଧ୍ୟ ଗୁଣ୍ଡାମାନେ ମରଣାନ୍ତକ ଆକ୍ରମଣ କରିଥିଲେ । ବିଭୁତି ଓ ତାଙ୍କ ପତ୍ନୀ ମନୀଷାଙ୍କ ମୁଣ୍ଡରେ ଗୁରୁତର ଆଘାତ ଲାଗିଛି । ଏହି ଘଟଣା ବିଷୟରେ ସଦର ପୋଲିସ ସୂଚନା ପାଇ ମାୟାବର୍ହାରେ ପହଞ୍ଚି ଆହତମାନଙ୍କୁ ଉଦ୍ଧାର କରି ଭୀମଭୋଇ ମେଡିକାଲ କଲେଜକୁ ଆମ୍ବୁଲାନ୍ସରେ ଆଣି ଭର୍ତ୍ତି କରିଥିଲା। ଘଟଣା ବିଷୟରେ ଖବର ପାଇ ବଲାଙ୍ଗୀର ବିଜେଡି ବିଧାୟକ ପ୍ରାର୍ଥୀ କଳିକେଶ ନାରାୟଣ ସିଂଦେଓ, ତାଙ୍କ ପତ୍ନୀ ମେଘନା ସିଂଦେଓ,

ବିଜେଡିନେତା ସତ୍ୟନାରାୟଣ ଭୋଇ ପ୍ରମୁଖ ହସପିଟାଲକୁ ପହଞ୍ଚି ଆହତମାନଙ୍କ ସହିତ ଆଲୋଚନା କରି ସାନ୍ତ୍ୱନା ଦେଇଥିଲେ । ଏହି ହିଂସା ଘଟଣାକୁ କଳିକେଶ ନାରାୟଣ ସିଂଦେଓ ତୀବ୍ରନିନ୍ଦା କରିବା ସହିତ କଂଗ୍ରେସଦଳ ହାରିବା ଭୟରେ ଏବେ ବିଭିନ୍ନ ଗାଁରେ ଗଣ୍ଡଗୋଳ କରି ଲୋକଙ୍କ ଭୟଭିତ କରିବାକୁ ଚେଷ୍ଟା କରୁଛି ବୋଲି କହିଛନ୍ତି । ତେବେ ଜଣେ ଅଭିଯୁକ୍ତକୁ ଧରି ଅଟକ ରଖି ପଚରାଉଚୁରା କରାଯାଉଥିବା ସଦର ଆଇଆଇସି ରାଜକୁମାର ବିଶ୍ୱାଳ କହିଛନ୍ତି। ଗାଁରେ ପୋଲିସ ମୁତୟନ ରହିଛନ୍ତି ବୋଲି ସୂଚନା ମିଳିଛି । ତେବେ ଏନେଇ କଂଗ୍ରେସର ପ୍ରତିକ୍ରୀୟା ମିଳିପାରିନାହିଁ ।